Hatutan.com, (21 Setembru 2022), Díli—Ministru Finansas (MF), Rui Augusto Gomes informa ba Konsellu Ministru (KM) iha Reuniaun ordinária Kuarta (21/09/2022) katak, konstrusaun Portu Baía Tibar atinje ona 92% no sei fó inisiu ba operasaun sira iha loron 30 fulan-setembru.

Progressu Konstrusaun Projetu Portu Baía Tibar atinje 78%. Foto/MOP.

Nune’e, hahú hosi loron 01 fulan-Outubru, Portu Díli sei la simu ona roo kontentór sira, servisu ne’e sei transfere fali ba Portu Baía Tibar.

Lee Mós: Progressu Konstrusaun Portu Baía Tibar Atinje 78%

“Portu Díli nian sei kontinua atu simu roo pasajeiru no roo-boot kruzeiru sira. Lansamentu ofisiál Portu Baía Tibar nian ne’e sei hala’o iha loron 30 fulan-Novembru, loron ne’ebé mak Timor-Leste mós komemora nia loron independénsia,” Hatutan.com sita komunikadu.

Bainhira hahú halo operasaun, Portu foun no modernu ne’e sei fasilita movimentu importasaun no esportasaun sasán sira, redús atrazu, kustu tranzasaun inklui tempu libertasaun kontentór, hodi bele fasilita di’ak liután empreza no sira-nia atividade komérsiu.

Operasaun Portu Baía Tibar ne’e sei fasilita efisiénsia iha servisu alfandegáriu ne’ebé konsidera hanesan pasu importante ida ba Ministériu Finansas, iha ámbitu Reforma Fiskál no Jestaun Finansas Públikas hanesan Reforma importante ida ne’ebé mak Governu anteriór sira inisia ona desde 2015.

Efisiénsia hirak ne’e mós sei ajuda Governu liuhosi Ministériu Finansas nomós utilizadór Portu hanesan importadór sira atu kolekta reseitas ho maneira ida ne’ebé lailais, justu no transparente. 

Portu foun no modernu ne’e sei inklui ka’is ida ho bersus rua no terminál kontentór ho kapasidade movimentasaun kontentór hamutuk millaun ida kada tinan.

Portu ne’e sei liga Timor-Leste ba merkadu komérsiu globál no sei hasa’e liután Timor-Leste ninia asesu komérsiu ba merkadoria sira hanesan agrikultura, turizmu, peskas, pekuária nomós indústria sira seluk – dalan ida atu ajuda Timor-Leste diversifika ninia produsaun.

Jornalista: Rogério Pereira Cárceres