Hatutan.com, (24 Setembru 2022), Díli– Prezidente Repúblika (PR), José Ramos-Horta, iha nia diskursu iha Assembleia Jerál Nasoins Unidas (ONU) bá da-LXXVII iha Nova Iorke, ko’alia liubá asuntu dezenvolvimentu iha rai-laran inklui situasaun pandémika globál Covid-19 no konjuntura polítika global bá pás mundiál.

Lee Mós : Ramos-Horta Partisipa Assembleia Jerál ONU bá Dala LXXVII

PR Ramos-Horta, halo diskursu iha Assembleia Jerál ONU bá da-LXXVII iha Nova Iorke. Foto/GPR

“Dezde re-eleitu iha fulan lima liubá foka bá ajenda doméstika, harii fonte entre órgaun ezekutivu, lejislativu no judisiáriu, envolve komunidade rural, urbana, joven no estudante, sosiedade sívil, líder relijioza sira, profisionál, agrikultura, negosiante, setor privadu no setor bankáriu, paz inkluziva, haburas demokrasia no instituisaun demokrátika sira no hodi hamoris fali ekonomia ne’ebé mak fraku,” sita komunikadu imprensa hosi Palásiu Prezidensiál iha Díli, Sábadu (24/09/2022).  

Xefe Estadu mós destaka servisu ho Governu, Parlamentu Nasionál no parseiru dezenvolvimentu hodi kombate extrema pobreza, subnutrisaun no raes badak, liuhosi promosaun fó susu-been inan bá bebé no prevene susu-been formula, subsídiu no apoiu bá inan isin-rua, inklui habelar edukasaun bá labarik.

Xefe Estadu mós ko’alia kona-bá susesu Timor-Leste iha dezenvolvimentu seitór saúde, liu-liu númeru doutór ne’ebé atinji ona 220 hodi atende populasaun millaun 1,5, esperansa moris ne’ebé atinji idade 71 no mós susesu iha mitigasaun no kombate COVID-19.

Relasiona ho kontextu global, Ramos-Horta hateten, populasaun iha Myanmar sente trai no abandonadu husi komunidade internasionál.

Prezidente Repúblika (PR), José Ramos-Horta, halo diskursu iha Assembleia Jerál ONU bá da-LXXVII iha Nova Iorke. Foto/GPR

“Sira husu, tamba sá iha diferente tratamentu, apoiu lalais no generoza bá populasaun sivil no refujiádu iha Ukránia, apoiu militar sofistikadu bá rezisténsia Ukránia, no la iha reasaun bá funu hasoru povu Mianmar, sira luta no mate. Konflitu iha Mianmar afeta bá seguransa no estabilidade iha nasaun viziña. Ida-ne’e bele aumenta,”  Ramos-Horta hateten.

Xefe Estadu defende nesesidade atu promove diálogu hodi rezolve Ukránia, Mianmar no krize seluk iha Mundu no husu Sekretáriu Jerál no ninia enviadu espesiál sira atu servisu maka’as hodi hamosu akordu cesar fogo, dame ne’ebé kompriensivu no permanente.

Xefe Estadu mós fó hanoin ba Rússia, Ukránia no NATO atu revé desijaun iha passadu ne’ebé hamate an, retira husi zona fronteriza, hodi permite Ukranianu sira, hodi rekonstrui sira-nia rain no moris no Rússia, retira seguransa husi Zona Fronteira.

Jornalista: Vito Salvadór