Hatutan.com, (30 Setembru 2022), Díli—Ohin delegasaun Timor-Leste  (TL) partisipa iha reuniaun da-haat Grupu traballu Organizasaun Mundiál Komérsiu (OMK), iha Kuartél Jerál OMK Jenébra, Suísa  hodi hametin liu tán relasaun diplomasia komersiál, bainhira sai duni membru bá organizasaun ne’e.

Delegasaun Timor Leste ho Japaun hasai foto hamutuk hafoin enkontru bilaterál iha Jenebra (27/09/2022). Foto/Média MKAE.

“Prezensa Timor-Leste iha reuniaun grupu traballu hodi bele hametin relasaun diplomasia komersiál, bainhira sai duni membru OMK,” Hatutan.com sita komunikadu iha Sesta, (30/09/2022).

Lee Mós: Adezaun Bá OMK Fó Impaktu Pozitivu Bá Ekonomia TL

Delegasaun TL xefia hosi Xefe Negosiadór Adezaun Timor-Leste ba OMK, atuál Ministru Koordenadór ba Assuntu Ekonómiku (MKAE), Joaquim Amaral ne’ebé hetan akompañamentu hosi Vise-Ministru Komérsiu no Indústria, Domingos Lopes Antunes no Reprezentante Permanente Timor-Leste iha Jenebra Maria de Lurdes Martins de Sousa Bessa, hamutuk ho reprezentante sira hosi liña ministériu no ajénsia autónoma sira.

Kompozisaun  no kriasaun  grupu traballu bazeia ba despaixu hosi Primeiru-Ministru, Taur Matan Ruak  Nú 009/PM/III/2020, loron 16 marsu kona-bá  kriasaun  grupu traballu tékniku  kona-bá adezaun TL ba OMK.

Konsidera katak, reuniaun Grupu Traballu Dahaat nu’udár reuniaun ne’ebé desizivu tebes ba Timor-Leste nia prontidaun ba kompromisu adezaun nian sei sai pontu partida ba esforsu hotu ne’ebé durante nee Timor-Leste hakat liu ona.

Tamba, bainhira reuniaun grupu traballu dahaat remata,Timor-Leste presiza atu organiza reuniaun grupu traballu dalaida tán, nune’e Timor-Leste prienxe instrumentu aseitasaun ho nia notifikasaun einvigór haktuir hosi protokolu adezaun nian.

Reuniaun grupu traballu dahaat adezaun TL ba OMK sei sai momentu opurtuna nu’udár  forma kompromissu bazeia ba kronograma ka roteiru indikativu ne’ebé Timor-Leste estabelese tiha ona antes.

Delegasaun Timor-Leste ne’ebé dezloka sai hosi TL iha loron 23 setembru 2022 hala’o tiha ona enkontru bilaterá ho pais membru OMK balun.

Iha loron 26 setembru 2022, Joaquim Amaral ho nia komitiva hala’o enkontru ho delegasaun hosi Kanadá no Uniaun Europeia hodi ko’alia kona-bá oferta sira ne’ebé TL  submete ona ba país membru OMK sira iha fulan Juñu.

Nune’e mós,  iha loron 27 setembru 2022, Delegasaun TL kuntinua hala’o  enkontru bilaterál ho país membru OMK sira seluk hanesan Filipinas no Japaun kona-bá oferta ne’ebé TL konklui tiha ona iha fulan hirak liu bá.

Iha okaziaun durante sesaun reuniaun entre TL ho  Filipinas, rai rua ne’e konkorda ona hodi selebra  akordu asinatura kona-bá bens no serbisu ne’ebé tuir planu sei realiza iha fulan Outubru tinan 2022.

Iha loron 29 setembru 2022, Joaquim Amaral ho delegasaun TL, hala’o mós enkontru bilaterál ho país membru OMK sira seluk hanesan Tailándia no Estadu Unidus Amerika.

Iha loron hanesan, delegasaun TL lideradu hosi Vise-Ministru Komérsiu no Indústria, Domingos Lopes Antunes ho nia komitiva hala’o mós enkontru ho Organizasaun Mundiál ba Propriedade Intelektuál nian – World Intellectual Property Organization (WIPO) iha kuartél jerál WIPO nian iha Jenebra, Suísa.

Prezensa TL iha reuniaun grupu traballu ne’e sei sai mós opurtunidade ba  Timor-Leste hodi bele iha direitu hanesan ho pais membru OMK sira seluk hosi akordu komérsiu ne’ebé livre ho forma hodi otimiza ba bem-estar ninia povu rasik inklui hodi komersializa produtu TL nian ba pais membru OMK sira seluk.

TL ofisialmente hatama ninia pedidu  hodi sai membru OMK inisia iha loron 07 abril 2015, bainhira Konsellu Jerál  OMK  simu TL nia inskrisaun. 

Atu realiza kompromissu ne’e, iha loron  07 dezembru 2016, TL harii grupu traballu adezaun ba OMK hodi hahú diskute ho seriedade kona-bá vontade TL nian hodi sai membru ba organizasaun ne’e.

Jornalista: Elio dos Santos da Costa