Hatutan.com, (03 Outubru 2022), Díli- Vise Xefe Estadu Maior Jenerál FALINTIL-Forsa Defeza Timor Leste (F-FDTL), Calisto dos Santos Coli “Coliati” informa, nomeasaun bá xefe kaza militár foun sei hein konkordansia hosi Prezidente Repúblika (PR), José Ramos-Horta.

Lee Mós : Falur Rate Laek Sei Nomeia Veteranu Ida Substitui Renilde bá Xefe Kaza Militár

Vise Xefe Estadu Maior Jenerál FALINTIL-Forsa Defeza Timor Leste (F-FDTL), Calisto dos Santos Coli “Coliati” . Foto/Elio dos Santos da Costa

Vise-Xefe Estadu Maiór Jenerál Calisto dos Santos Coli “Coliati”, Segunda (03/10/2022),  hateten, Komandu F-FDTL sei haree kandidatu foun atu substitui fila fali Koronel Renilde Corte Real Guterres e Silva ne’ebé fila hikas bá komandu F-FDTL.

Xefe Estadu Maior F-FDTL, Tenente Jenerál Domingos Raul “Falur Rate Laek”, iha hela misaun ida ba exterior no sei fila hikas mai Timor-Leste iha loron 10 fulan-Outubru ,tamba ne’e komandu sei reuni hodi haree kandidatu ida ne’ebé maka viabel  atu okupa fila fali pozisaun xefe kaza militar iha Palásiu Prezidensiál.

“Komandu sei koordena ho Prezidensia da Republika atu haree katak Xefe Estadu konkorda ho figura ida ne’e ga lae, pois  ami sei koopera,” Colianti hateten.

Koronel Renilde Corte Real Guterres e Silva husu ona nia rejignasaun hanesan Xefe kaza militár, ho nune’e Prezidente Repúblika (PR), José Ramos-Horta nia adjuntu kampu, Maijór Francisco da Silva mak tempurariamente okupa pozisaun hanesan xefe kaza militár hodi hein desizaun komandu bá noneasaun foun.

Jornalista : Vito Salvadór