Hatutan.com, (10 Outubru 2022), Díli—Prezidente Repúblika, José Ramos-Horta apresia ho parseiru sira hanesan Asian Development Bank (ADB) no Governu rasik liu hosi Ministériu Agrikultura no Peska (MAP) ne’ebé atualiza progressu servisu bá programa kampaña nasionál rehabilitasaun kafé ne’ebé antes ne’e Xefe Estadu rasik lansa iha munisípiu Ermera.

Parseiru sira hosi ADB no MAP atualiza progressu servisu programa kampaña nasionál rehabilitasaun kafé iha munisípiu Ermera, iha Palásiu Prezidensiál Bairru-Pité, Segunda (10/10/2022).

“Xefe Estadu apresia tebes no orienta atu bele tau antensaun katak presiza duni fundu bá kafé no mós kontinua hasa’e produsaun kafé iha Timor Leste,” Diretór Jerál Kafé Plantasaun Industria, MAP, Raimundo Mau hateten iha Palásiu Prezidensiál Bairru-Pité, Segunda (10/10/2022).

Lee Mós:Governu Sei Halo Rehabilitasaun Kafé iha Tinan Ne’e

Xede Estadu husu atu hotu-hotu halo esforsu hodi konserva bee no mós udan been ne’ebé dala ruma iha situasaun balun bele tulun hadi’a produsaun kafé.

Xefe Estadu mós orienta tebes atu ministériu ho parseiru sira tau atensaun di’ak liu ba kafé no oinsa konserva bee ba plantasaun kafé.

Parseiru sira atualiza mós ba Xefe Estadu kona-bá kooperasaun ne’ebé iha área kafé ninian hetan tulun husi povu Japaun, maibé jere liu husi ADB iha Timor-Leste.

Raimundo Mau esplika, Programa ne’e hanesan kontinuasaun atividade kada tinan MAP halo rehabilitasaun, maibé tinan ida-ne’e governu tau orsamentu  signifikativu iha ne’ebé to’o fim de Dezembru 2022 bele atinje ektares 8.000 kafé tuan ne’ebé sei rehabilita.

Rehabilitasaun ho orsamentu regulár antes to’o ona ektares 20.000 sura ho MAP ninian no mós parseiru sira nian.

Agora daudaun hosi orsamentu retifikativu ba tinan 2022 sei atinji ektares 8.000 ne’ebé sei la’o hamutuk ho Asosiasaun kafé Timor no mós kooperativa kafé Timor, agora daudaun servisu iha terrenu la’o kuaze $30%.

Planu 2023, MAP ho parseiru sira hakarak rehabilita totál kafé iha Timor-Leste tomak ektares 50.000  ne’ebé sei restaura hikas atu bele hasa’e ninia produsaun no mós ninia produtividade no hasa’e ninia kualidade merkadoria ba iha rai laran no mós iha rai li’ur.

Orsamentu hosi tetu fiskál MAP ninian purvolta millaun $8, maibé ba iha retifikativu iha millaun $6.4 ba tesi kafé tuan no mós mahon ba kafé oan.

Envolve benefisiáriu kafé agkultór 2.000 iha Munisípiu neen ho totál orsamentu millaun $3.2 husi povu Japaun, millaun $2 hosi kontribuisaun governu nian.

Jornalista: Vito Salvadór