Hatutan.com, (12 Outubru 2022), Díli—Comissão Anti Corrupção (CAC), liuhosi ekipa Medida Prevensaun no Kombate Korrupsaun, Kuarta 12 Outubru 2022, hale’u tuku 10:08 halo buska no apreensaun inklui tau alzema (borgol) na’in bá empreza DILI ETERNAL INNOVATION INFORMATION, Lda, nu’udár sósiu hosi inisiál M, ne’ebé tempu ne’ebá asume knaar hanesan Sekretária iha Gabinete Prezidente Federasaun Futeból Timor Leste (FFTL), atuál Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo.

Comissão Anti Corrupção (CAC), liuhosi ekipa Medida Prevensaun no Kombate Korrupsaun, Kuarta 12 Outubru 2022, hale’u tuku 10:08 halo buska no apreensaun inklui tau alzema (borgol) na’in bá empreza DILI ETERNAL INNOVATION INFORMATION, Lda, nu’udár sósiu hosi inisiál M, ne’ebé tempu ne’ebá asume knaar hanesan Sekretária iha Gabinete Prezidente Federasaun Futeból Timor Leste (FFTL), atuál Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Foto Hatutan.com/Elio dos Santos da Costa.

Tuir kronolojia, ekipa Medida Prevensaun no Kombate Korrupsaun CAC nian, iha parte dadeer destaka kedan hodi ba buka-tuir iha nia rezidénsia iha área Matadouro, suku Vila Verde iha tuku 10:00 otl, maibé na’in ba empreza ne’e iha hela servisu fatin sede FFTL Bairro dos Grilhos Díli.

Lee Mós:Breaking News: Kazu Instalasaun Set-Top Box RTTL,E.P, CAC “Borgol no Detein” Assesór MAPKOMS

Nune’e, ekipa ida hosi CAC deside ba direta iha sede FFTL, maibé bainhira ekipa ne’e to’o iha fatin iha tuku 10:08 otl, la hetan ona na’in ba empreza ne’e tanba nia fila hikas ona ba nia uma.

Ekipa konjunta ne’e deside fila-fali ba rezidénsia Matadouro no iha ne’ebá ekipa ida husi CAC hein hela iha ne’ebá.

Bainhira na’in ba empreza DILI ETERNAL INNOVATION INFORMATION, Lda to’o iha fatin, investigadór CAC nian ne’ebé lidera hela mandadu buska no apreensaun ne’e, halo introdusaun no esplikasaun kona-bá razaun sira-nia prezensa iha rezidénsia na’in ba empreza ne’e.

Hafoin halo esplikasaun, ekipa CAC diretamente tau alzema ka borgol na’in ba empreza ne’e, inklui  rekolla no halo apreensaun ba dokumentu sira ne’ebé iha,  inklui veíkulu ida ho marka Pajero Fortuner ho xapa matríkula A.28.832.

Ekipa CAC ne’e transporta kedan na’in ba empreza DILI ETERNAL INNOVATION INFORMATION, Lda ba iha nia servisu fatin FFTL, hodi rekolla no halo apreensaun ba dokumentu sira ne’ebé iha relasaun ho empreza ne’e.

Remata hosi FFTL, ekipa CAC nian kontinua transporta na’in ba empreza DILI ETERNAL INNOVATION INFORMATION, Lda ne’e ba edifísiu sentrál CAC nian.

Tuir informasaun ne’ebé Hatutan.com asessu katak, CAC  sei halo detensaun ba na’in ba empreza ne’e  durante oras 72.

Atuasaun CAC nian ne’e, iha relasaun ho kazu projetu instalasaun Set-Top Box, bá Rádiu no Televizaun Timor-Leste, Empréza Públika (RTTL,EP) ne’ebé diskonfia fó prezuizu ba Estadu ho montante orsamentu $7,680.00.

Iha loron ohin mós hale’u tuku 09:30 dadeer, ekipa Medida Prevensaun no Kombate Korrupsaun CAC nian halo uluk ona buska no apreensaun inklui tau alzema (borgol) ba assessór ida iha Gabinete Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, iha Palásiu Governu Díli  ho inisiál G.

Atuasaun CAC nian ne’e mós iha relasaun ho kazu projetu instalasaun Set-Top Box, bá Rádiu no Televizaun Timor-Leste, Empréza Públika (RTTL,EP) ne’ebé diskonfia fó prezuizu ba Estadu ho montante orsamentu $7,680.00.

Hosi konteúdu relatóriu, CAC konsege identifika prejuizu direta bá Estadu ho montante $7,680.00 ne’ebé identifikadu liuhosi Set Top Box hamutuk 256 ne’ebé kompañia indikadu DILI ETERNAL INNOVATION INFORMATION, Lda, seidauk halo instalasaun, maibé prejuizu ne’e sei aumenta makas bainhira kontinua halo inspesaun no kontinuasaun bá benefisiáriu hirak ne’ebé simu ona STB iha suku besik atus ida resin iha Munisípiu lima hanesan Díli, Aileu, Ermera, Liquiça no Bobonaro, tanba STB barak maka seidauk halo instalasaun no benefisiáriu rasik maka halo instalasaun la’ós kompañia.

Prejuizu indireta seluk ne’ebé Estadu sofre hamutuk $674,581.7 no prejuizu ida ne’e hetan bainhira halo komparasaun entre estimasaun kustu ba instalasaun STB ne’ebé halo hosi RTTL.EP ho valor $225.400 ho valor kontratu ba projetu ne’ebé maka asina husi MAPCOMS no kompañia DILI ETERNAL INNOVATION INFORMATION (DEII) Lda ho valor $899.981.70.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nu’udár sósiu hosi Melánia da Silva Fernandes Capela, ne’ebé tempu ne’ebá asume knaar Sekretaria iha Gabinete Prezidente FFTL.

Lee Mós: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Hafoin Ferias Judisiáriu, PGR Sei Ko’alia Kazu Set-top Box RTTL,E.P

Jornalista: Vito Salvadór