Hatutan.com, (12 Outubru 2022), Díli— Comissão Anti Corrupção (CAC) liu hosi Diretór Informasaun no Seguransa, Euclides Vidal Madeira informa katak, Suspeitu na’in-rua ba kazu Instalasaun Projetu Set-Top Box ka dexodificador Rádiu Televizaun Timor Leste, Empreza Públika (RTTL,E.P), sei submete ba primeiru interrogatóriu hafoin kompleta oras 72 iha sela detensaun CAC nian, iha Sesta 14 Oubtubru 2022.

Diretór Informasaun no Seguransa CAC, Euclides Vidal Madeira. Foto Hatutan.co,m/Elio dos Santos da Costa.

“Ita tenta possível atu aprezenta ba iha Tribunál hodi tuir primeiru interrogatóriu iha Sesta dadersan,” Euclides Vidal Madeira hateten iha edifísiu CAC Faról, Kuarta (12/10/2022).

Lee Mós:Breaking News: Kazu Instalasaun Set-Top Box RTTL,E.P, CAC “Borgol no Detein” Assesór MAPKOMS

Euclides Vidal Madeira  informa, CAC liu hosi buska no apreensaun ba suspeitu sira ne’ebé deskonfia involve direta iha prosesu instalasaun Set-top Box/dexodificador RTTL,E.P ne’e, konsege rekolla tán evidénsia foun balun hodi apoia prosesu investigasaun.

CAC hahú inisia prosesu investigasaun ida-ne’e iha tinan kotuk, no iha 26 fulan Setembru 2022, ofisialmente CAC simu mandadu buska no apreensaun aumezmu tempu halo detensaun oras 72 iha CAC no suspeitu loloos ba kazu ne’e iha na’in-tolu, maibé ida ema estranjeiru ne’ebé la konsege tama iha Timor-Leste, nune’e esklui tiha.

Tanba ne’e, halo detensaun ba ema na’in-rua, ida mak ohin halo buska no apreensaun iha Palásiu Governu no oras-ne’e ekipa kontinua rekolla tán dokumentu hanesan evidénsia iha ninia rezidénsia iha munisípiu.

Diretór ne’e dehan, kona-bá kazu Set-Top Box RTTL,EP ne’e ema hotu hatene, projetu ne’ebé Governu Xina servisu hamutuk ho Governu Timor-Leste oferese STB hamutuk 30.000 ba Governu Timor-Leste atu bele halo distribuisaun ba komunidade sira ne’ebé konsideradu vulnerável ba informasaun atu transmite, no projetu ida ne’e la’o tiha ona, prejuizu ne’ebé iha hamutuk  $674, 581.7 no detalla liu sei labele ko’alia.

Posteriormente CAC sei labele fó-sai katak ne’e involve ka la involve membru Governu,  daudaun ne’e CAC halibur hela evidénsia no ho dadus sira ne’ebé balun iha ona antes no balun ohin iha buska no apreensaun ne’e mak foin hetan tán.

“Depois ita armoniza dokumentu sira ne’e no halo analiza hotu mak ita foin termina suspeitu se tán mak ita atu halo tán buska no apreensaun. Ne’e depende ba evidénsia ne’ebé iha, koordenasaun entre prokuradór titulár no investigadór depois mak ita promove tán bá Tribunál atu hetan tán mandadu buska no apreensaun,” nia hateten tán.

Comissão Anti Corrupção (CAC) liu hosi Diretór Informasaun no Seguransa, Euclides Vidal Madeira informa katak, Suspeitu na’in-rua ba kazu Instalasaun Projetu Set-Top Box ka dexodificador Rádiu Televizaun Timor Leste, Empreza Públika (RTTL,E.P) ne’ebé sei submete ba primeiru interrogatóriu hafoin kompleta oras 72 iha sela detensaun CAC nian. Foto Hatutan.com repro/Elio dos Santos da Costa.

Buska no apreensaun ne’ebé CAC halo ba suspeitu na’in-rua ne’e iha fatin ne’ebé la hanesan, ida iha Palásiu Governu nu’udár assesór no ida seluk iha nia rezidénsia no iha servisu fatin FFTL nu’udár na’in ba empreza DILI ETERNAL INNOVATION INFORMATION, Lda. Nain rua ne’ebé halo buska no apreensaun sei submete ba detensaun durante oras 72 iha sala detensaun CAC.

“Kona-bá evidénsia ne’ebé iha ha’u bele hateten katak ajuda teb-tebes prosesu investigasaun. Iha evidénsia lubuk ida ne’ebé antes ne’e ita laiha, mais ohin liu hosi prosesu buska no apreensaun ita konsege indentifika tán evidénsia balun ne’ebé mak bele tulun tán prosesu ba kazu ida-ne’e kaundu aban bairua ba iha Tribunal. Tanba ne’e, ha’u la sita dokumentu saida-saida maibé investigadór ninia avaliasaun ba iha evidénsia dokumentu sira ita sente katak nia valór ne’e boot atu suporta prosesu investigasaun ne’e mai oin,” nia subliña.

Antes ne’e, hosi konteúdu relatóriu, CAC konsege identifika prejuizu direta bá Estadu ho montante $7,680.00 ne’ebé identifikadu liuhosi Set Top Box hamutuk 256 ne’ebé kompañia indikadu DILI ETERNAL INNOVATION INFORMATION, Lda, seidauk halo instalasaun, maibé prejuizu ne’e sei aumenta makas bainhira kontinua halo inspesaun no kontinuasaun bá benefisiáriu hirak ne’ebé simu ona STB iha suku besik atus ida resin iha Munisípiu lima hanesan Díli, Aileu, Ermera, Liquiça no Bobonaro, tanba STB barak maka seidauk halo instalasaun no benefisiáriu rasik maka halo instalasaun la’ós kompañia.

Prejuizu indireta seluk ne’ebé Estadu sofre hamutuk $674,581.7 no prejuizu ida ne’e hetan bainhira halo komparasaun entre estimasaun kustu ba instalasaun STB ne’ebé halo hosi RTTL.EP ho valor $225.400 ho valor kontratu ba projetu ne’ebé maka asina husi MAPCOMS no kompañia DILI ETERNAL INNOVATION INFORMATION (DEII) Lda ho valor $899.981.70.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nu’udár sósiu hosi Melánia da Silva Fernandes Capela, ne’ebé tempu ne’ebá asume knaar Sekretaria iha Gabinete Prezidente FFTL.

Lee Mós: Kazu Instalasaun Set-Top Box RTTL,E.P, CAC “Borgol no Detein tán” Sekretária FFTL

Jornalista: Vito Salvadór