Hatutan.com, (17 Outubru 2022), Díli- Líder Karizmátiku no atual Prezidente partidu CNRT, Kay Rala Xanana Gusmão, apresia servisu Diretor Nasional Informasaun Interna Servisu Nasionál Intelijénsia (DNII-SNI) Ajente Xefe Polísia Gastão Piedade ho ekipa polisiál ne’ebé konsege trava osan fíziku $130,000 iha Aeroportu Internasionál Nicolau Lobato, Díli, foin lalais ne’e.

Lee Mós : Vídeo Viral, Dezentendimentu SNI ho Dirijente KHUNTO Kona-bá Osan $130.000

Líder Karizmátiku no atual Prezidente partidu CNRT, Kay Rala Xanana Gusmão. Foto/Media GPR

Xanana Gusmão ba jornalista sira iha Palásiu Prezidensiál Nicolau Lobato, Segunda (17/10/2022), hateten públiku hatene kaer osan iha Aeroportu Internasionál Nicolau Lobato ne’e, jornalista balun husu atu fó komentáriu, maibé nia dehan lae tanba ne’e  iha ona entidade Estadu nian ne’ebé kaer ukun ne’e husu sira bá, labele interfere labele dehan tenke halo ida ne’e, no halo ida ne’eba.

“Ha’u apresia tebes-tebes atitude Servisu Nasionál Investigasaun hala’o misaun ida ne’e, tanba bainhira ita bá Bali ka Jakarta ka lao bá ne’ebé sempre simu karta ne’ebé dehan tuir lei Indonézia labele lori osa fíziku liu $10,000 ita bele dehan,” Kay Rala Xanana Gusmão hateten.

Hanesan sidadaun ida haree katak servisu Diretor Nasional Informasaun Interna Servisu Nasional Intelejensia (DNII-SNI) Gastão Piadade halo ne’e tuir regra, tanba Timor Leste tama ASEAN mak husik arbiru de’it ne’e lá’os membru ASEAN ne’ebé loos, hanesan aproveita de’it tama de’it ASEAN.

Lee Mós : Vise-Ministru Justisa “Haruka Duni” Karta Bá PM, Vise-MI ho Komandu PNTL Ezonera Gastão Peidade

Entertantu, Kona-ba membru Governu ne’ebé halo intervensaun ne’e Xanana dehan estadu ne’e sei frazil, tanba instituisaun Estadu seidauk kumpre didi’ak sira nia funsaun.

Molok ne’e, entidade oin-oin hatoo sira nia lamentasaun hodi kestiona intervensaun máximu partidu KHUNTO José dos Santos “Naimori Bukar” ho membru Governu na’in-rua hanesan Vise Ministru  Justisa José Edmundo Caetano ho   Vise-Ministru Interior, António Armindo, halo hasoru  Diretór Nasional Informasaun Interna Servisu Nasional Intelejensia (DNII-SNI) Gastão Piedade ne’ebé ho maneira halo intervensaun hasoru desizaun ne’ebé tuir lolos sei hein indentifikasaun no investigasaun. Tamba tuir Lei Numeru 5/2013 Artigu 10 ko’alia kona-bá Brankeamentu Kapital no Finansiamentu Terrorizmu, maka ema hotu tenke hakruk bá lei.

Lee Mós : Kazu Osan $130,000, Sekretáriu Jerál FRETILIN Lakohi Halo Interferénsia Polítika

Jornalista: Vito Salvadór