Hatutan.com, (17 Novembru 2022), Díli—Na’in bá grupu empreza Esperansa Timoroan (ETO),  Nilton Telmo Gusmão dos Santos,  espera katak kongresu bá da-haat Camara Comerçio e Industria Timor Leste (CCI-TL)  períodu 2022-2026 bele kondús no hadi’a CCI-TL sai loloos organizasaun mahon atividade komérsiu no indústria iha rai-laran.

Lee Mós : Kongresu CCI-TL, Oscar Lima Husu Governu Nia Seriedade Promove Setór Privadu Nasionál

Nain bá  grupu empreza ETO, Nilton Telmo Gusmão dos Santos. Foto/Hatutan.com

Nilton Gusmão ne’ebé oras ne’e hala’o hela servisu iha rai-li’ur no auzénsia iha kongresu CCI-TL ne’e haktuir,    prezidente eleitu CCi-TL períodu 2022-2026 la bele transforma fali CCI-TL bá interesses prezidente no grupu ne’ebé besik prezidente tanba  CCI eziste atu konsentra iha nia papél hanesan promove interesses empreza sira no mós atu defende komunidade emprezariál ein-jerál husi Dili to’o munisípiu

“Prezidente CCI-TL la bele defende de’it interese sira membru ka apoiante prezidente eleitu sira-nia interesse. Ho Kongresu ida-ne’e espera bele rezulta ka eskolla figura ida ne’ebé los atu bá tinan-haat mai sosiedade emprezariál sira hotu sente benefísiu hosi ezisténsia CCI TL,” Nilton Gusmão hato’o nia mensajen ne’e liuhosi Hatutan.com vila WhatsApp, Kinta (17/11/2022).  

Nilton Gusmão dezeju susesu  bá kongresista sira hotu, no husu mós atu ema hili tuir konsiénsia hodi hamutuk sai forsa ida bá interesse setór privadu timoroan no estranjeiru hotu ne’ebé halo nia atividade ekonómika iha Timor-Leste.

“Bá ha’u importante mak prezidente eleitu atu lori organizasaun CCI-TL sai mahon loloos ba atividade komérsiu no indústria rai-laran, labele transforma fali CCI-TL bá interesses prezidente no grupu ne’ebé besik prezidente eleitu, tan CCI-TL eziste atu konsentra iha nia papél hanesan promove interesse empreza  sira no mós atu defende komunidade emprezariál ein-jerál,” Nilton afirma tan.

Lee Mós : Istória Konflitu iha CCI-TL To’o Hamosu CNT, Jorge Serrano Vs Julio Alfaro

Jornalista : Vito Salvadór