Hatutan.com, (01 Dezembru 2022), Díli—Primeiru Ministru (PM), Taur Matan Ruak klarifika katak,  impostu ne’ebé Governu no Portu Tibar aplika ba emprezáriu sira razoável tuir kondisaun no prestasaun servisu ne’ebé iha ho atendimentu ne’ebé kualidade.

Primeiru Ministru (PM), Taur Matan Ruak.

Kona-bá impostu ne’ebé aplika iha Portu Tibar, Taur Matan Ruak hateten kada kontentór ho media 20 feet nia presu $2.300 no 40 feed nia presu $4.600 ne’e razoável tanba antes ne’e Ministériu Finansas, Portu Tibar hasoru-malu ho emprezáriu sira no esplika ona ba sira razaun kona-bá presu ka taxa importasaun iha Portu ne’e rasik.

Lee Mós: Kompañia Stevedore Lima Haruka Karta Aberta Bá PM Taur

Xefe Governu ne’e dehan, bainhira servisu di’ak no lais, nia presu mós tuir ida-ne’e, uluk iha Portu Díli, bele hein to’o semana rua to’o fulan tomak ne’e nia presu oin seluk, maibé agora fásil no lalais tebes nia presu mós tuir ida-ne’e.

“Mais ha’u husu atu parte Portu Tibar nafatin iha komunikasaun ho emprezáriu sira atu haree.  Maibé, ida-ne’e negósiu ita selu tuir sira nia prestasaun servisu,” Taur Matan Ruak hateten iha Palásiu Prezidensiál Nicolau Lobato Bairru-Pité, Kinta (01/12/2022).

Kona-bá impaktu hosi impostu ba iha sasan nia folin iha merkadu nasionál, Xefe Governu hateten ninia implikasaun ba sasán folin sa’e iha merkadu nasionál laiha tanba Timor Leste aplika sistema merkadu livre, hanesan sasán ne’ebé sosa iha Bali ho folin $100 mai to’o Timor $200, ne’e tanba ema sosa barak maibé fa’an oituan entaun nia folin sa’e, bainhira ema sosa laiha sasán rai de’it konserteza nia folin sei tun.

Kona-bá lamentasaun hosi Estevedór sira, Taur Matan Ruak hateten antes Portu ne’e hahú, sira hatene ona katak ida-ne’e risku ida, halo nusa mak Portu ne’e hotu tiha sira sei ko’alia nafatin buat ne’ebé konsekuensia hosi desizaun governu nian kuandu hari Portu ne’e.

“Kuandu harii Portu nia konsekuénsia mak ida-ne’e, katak nia moderniza, nia reduz servisu, hadi’a efisiénsia, efikásia no rapidéz tanba ne’e sira tenke preparadu atu simu ida-ne’e,” subliña.

Jornalista: Vito Salvadór