Hatutan.com, (07 Dezembru 2022), Lautem- Komandante Em-Xefe FALINTIL, Kay Rala Xanana Gusmão, louva povu Timor-Leste nia dedikasaun no determinasaun hodi luta bá restaura Timor-Leste nia independénsia.

Lee Mós : Loron 07 Dezembru, Istória Moruk Povu Timor-Leste

Xanana Gusmão sa’e motór “tum-tum” iha Postu Administrativu Lospalos, Munisípiu Lautem. Foto/Espesiál

Hanoin hikas loron invazaun Indonézia nian mai Timor-Leste iha tinan-47 liubá, 07 Dezembru 1975, Xanana Gusmão, hateten loron ida-ne’e nu’udár momentu importante hodi hanoin hikas prosesu timoroan nia luta no terus hodi manan hikas vitoria independensia ne’ebé konstrui ho ema rihun nia terus no mate.

Xanana Gusmão hateteEspen, iha tinan 47 ba kotuk, nu’udár loron ida ne’ebé povu Maubere hahú hatudu brani, hatudu hakarak duni atu ukun aan, maski la prontu ho dezafiu oin-oin. Ho nune’e,  liu tiha tinan 24 nia laran maka foin hetan independénsia. Tanba ne’e, Xanana apela bá timoroan hotu, liuliu juventude sira kontinua  kria dame bá malu iha fatin hotu- hotu hodi fó onra bá povu no gerrilleiru FALINTIL sira ne’ebé mate bele kontente akompaña Timor-Leste nia susesu bá oin.

“Ita fó ondra bá hotu-hotu ne’ebé lakon sira nia vida, nu’udár gerrilleiru ida. Iha Munisípiu Lautem  liu-liu iha Mehara  iha Fatuk Kuak-OI maka sai ha’u nia eskola bá gerrilla  hodi bele aprende lori povu ida ne’e manan funu,” Kay Rala Xanana Gusmão hateten bainhira selebra loron invazaun 07 Dezembru hamutuk ho povu Munisípiu Lautem iha Postu Administrativu Lospalos, Kuarta (07/12/2022).

Iha momentu istoriku ne’e, Kay Rala Xanana kontinua hamulak hodi husu forsa bá Na’I Maromak no forsa natureza no rai-lulik Timor kontinau proteze no satan povu no nasaun hosi risku oin-oin hodi hamutuk harii nasaun ne’e.

“Matebian sira, eroi sira tau matan nafatin bá ami hodi bele kaer metin nafatin imi nia mehi halo Timor ne’e rai di’ak ida, povu ne’e tuur hakmatek  ho domin no dame,” Xanana hamulak.

Nia hatutan, loron invazaun 7 Dezembru 1975 ne’ebé hahú hosi fronteira bá lorosa’e nu’udár  istória moruk ne’ebé Timoroan tomak sente no sei lahaluha atu konta nafatin iha istória bá timoroan sira iha futuru mai aprende no hatene istória Timor-Leste nian.

Iha oportunidade ne’e, Xanana akompaña hosi autoridade lokál no seguransa hala’o mós inseramentu kampionatu taxa rotativa Avó Nana iha Lautem ho tema “Unidade Nasonál, ami atu ba hotu ona, husik hela imi joven sira, respeita netik funu nain sira, prepara aan labele fahe malu no labele hamosu funu foun entre imi hotu imi” iha Kampu Demokrasia Futebol Lospalos Vila.

Jogu ne’e hahú loron 07 Novembru 2022 liubá partisipa hosi klube 32 hodi kontribui bá pás.

Lee Mós : 47 Tahun Setelah Invasi, Timor-Leste Surga yang Hilang dari NKRI

Jornalista: Vito Salvadór