Hatutan.com, (09 Dezembru 2022), Díli—Empreza Aero Díli list ona aviaun ida ne’ebé tuir planu sei hahú ninia voo regulár iha Janeiru 2023 ho bandeira Timor Leste (TL).

Diretór empreza Aero Díli, Lourenço de Oliveira hamutuk ho nia funsionáriu sira hala’o press conference iha Aeroportu Comoro, Sesta (09/12/2022).

Diretór empreza Aero Díli, Lourenço de Oliveira  hateten ho prezensa aviaun ida ne’e sei garante movimentasaun timoroan sira nian iha transporte aero ho garante kualidade no kustu ne’ebé kompetitivu.

Lee Mós: Aero Díli Koordena ho MTK-ACTL Atu Halo Operasaun Komersiál ho Aviaun Airbus A320

Operasaun aviaun hosi Aero Díli ne’e sei semo ba nasaun sira ne’ebé iha ona akordu ho empreza Timor oan ne’e no hakarak hatudu katak la’ós aviaun hosi rai seluk de’it mak semo mai Timor Leste maibé Timor Leste mós iha ona ninia aviaun rasik ne’ebé bele semo ba rai seluk.

Molok atu lori aviaun mai Timor Leste, empreza Aero Díli halo uluk ona preparasaun hodi hahú kontrata instrutór na’in-tolu hosi Korea Súl, Europa no mós Indonézia, Aero mossa (pramugari) inklui mekániku sira ne’ebé iha kualifikasaun di’ak ho esperiénsia servisu di’ak no iha pilotu balun ne’ebé iha esperiénsia servisu atinje ona tinan 18 no balun 8 to’o 12 iha área aviasaun.

Diretór empreza Aero Díli, Lourenço de Oliveira hamutuk ho nia funsionáriu sira iha Aeroportu Comoro, Sesta (09/12/2022).

“Ita hahú ho Pilotu, Aeromossa, mekániku hosi estranjeiru tanba ita hakarak sira fó asisténsia ba Aero Díli durante ita iha aviaun rasik ne’ebé bele semo ba fatin hotu-hotu. Se nasaun seluk bele semo mai ita nia nasuan nusa mak ita labele semo ba sira nia nasaun,” Lourenço Oliveira hateten liu hosi konferénsia imprensa iha edifísiu Aero Díli, Aeroportu internasionál Nicolau Lobato, Comoro, Sesta (09/12/2022).

Kapasidade Air Bus ne’ebé Aero Díli iha sei bele tula pasajeiru hamutuk 180, maibé Aero Díli sei halo de’it ba 165 atu bele iha espasu natón ba pasajeiru sira hodi bele halo viajen ho di’ak.

Aviaun ne’ebé Aero Díli iha, oras-ne’e sei hala’o inspesaun iha nasaun Malázia no hafoin halo inspesaun aviaun ne’e sei lori mai tau mákina foun iha nasaun Tailândia no iha meadu Janeiru 2023 aviaun sei to’o Timor Leste hodi hahú halo operasaun regulár tuir oráriu ne’ebé iha.

Traballadór estranjeiru sira ne’ebé Aero Díli kontrata oras-ne’e hela ona iha Timor Leste no sei servisu ba empreza Aero Díli durante fulan neen hodi hein Aero Díli halo rekrutamentu ba Timoroan sira iha área pilotu, aeromossa no mekániku atu bele servisu hamutuk ho Traballadór estranjeiru ne’ebé empreza Aero Díli iha.

Diretór empreza Aero Díli, Lourenço de Oliveira.

“Air Bus mós iha komitmenru atu tulun Aero Díli hodi fasilita Timoroan sira ba eskola gratuita iha área pilotu, Aeromossa mós iha mekániku nune’e hanesan Timoroan ha’u mós iha komitmentu boot atu esplora oportunidade sira ne’ebé iha hodi fó oportunidade ba Timoroan sira tanba ha’u iha planu atu halo list ba aviaun hamutuk tolu,” nia hateten.

Kona-bá presu billete aviaun nian, sei oferese presu ida kompetitivu no garante kualidade atendimentu atu iha kompetisaun ida di’ak ho empreza aero sira hosi nasaun liur.

Emprezáriu Timoroan ne’e haktuir molok halo list ba aviaun boot (Air Bus) nia rasik eskola kona-bá pilotu no sosa rasik aviaun kiik ne’ebé halo operasaun doméstika durante tinan lima, no oras-ne’e daudaun empreza Aero Díli halo hela aluger ba aviaun rua hosi estranjeiru mak hanesan Sriwijaya Air no Air Asia hodi fasilita Timoroan sira semo ba liur no hosi rai liur mai Timor Leste.

Empreza Aero Díli oras-ne’e fó ona servisu ba Timoroan hamutuk 40 no traballadór estranjeiru hamutuk 20 ho total 60.

Jornalista: Vito Salvadór