Hatutan.com, (21 Dezembru 2022), Díli- Membru Parlamentu Nasionál sira hosi Bankada sira apoiu Governu hato’o kritika síniku hasoru Prezidente Repúblika (PR), José Ramos-Horta simu posse foin fulan neen, maibé hala’o viajen estranjeiru barak liu duke hela iha rai-laran.

Lee Mós : Vizita Singapura-Malázia, Ramos-Horta Lori Xefe Aldeia Fatukama ho Joven Ida Hosi Lequidoe Inklui Seguransa Sivíl

Liuhosi plenária PN iha loron 19 fulan-Dezembru 2022, Deputadu sira bankada Governu nian ho síniku hateten Xefe Estadu José Ramos-Horta, muda ona Palasiu Prezidente Repúblika bá aviaun laran.

Prezidente Repúblika (PR), José Ramos-Horta. Foto/Elio dos Santos da Costa

Xefe Bankada PLP, Francisco de Vasconselhos lamenta liu ho atetidu Prezidente Repúblika bainhira Parlamentu Nasionál fó asentimentu atu halo  vizita Estadu bá Singapura, maibé to’o Singapura bá tan Malázia ne’ebé la hetan autorizasaun PN.

Deputadu Francisco Vasconselhos dehan, PN fó asentimentu vizita Estadu ba Singapura maibé to’o  Singapura, Chefe Casa Sivil haruka karta ida mai para kontinua vizita Estadu ba Malázia maibé Parlamentu la autoriza , PR Ramos Horta ba nafatin depois aprezenta razaun vizita privadu depois to’o Malázia simu hanesan Xefe Estadu.

Membru PN hosi Bankada KHUNTO, Deputada Olinda Guterres hatete, Prezidente Repúblika Ramos-Horta halo Palasiu Prezidente Repúblika  iha Aviaun laran de’it.

Ho síniku polítika, Deputada Olinda Guterres  hateten Prezidente Repúblika ne’e bá RDTL la’ós Prezidente bá rai li’ur  no la’ós mós Prezidente bá perdiem.

Membru PN hosi Bankada FRETILIN,  Josefa Soares husu atu Prezidente Repúblika, José Ramos-Horta labele foti desizaun mesamesak, tuir nia hakarak.

Bá kritika hosi nai no lou Deputadu sira nian ne’e, Prezidente Repúblika (PR), José Ramos-Horta, la preokupa no nia husu atu Deputadu sira di’ak liu haree sira-nia servisu.

“Ha’u hateten, kada deputadu haree nia servisu, ha’u haree ha’u nia servisu, eleisaun parlamentár besik ona, ha’u mak sei superviziona eleisaun ne’e. Ha’u mak sei marka data, depois ha’u mak sei fó posse bá Governu,” Prezidente Repúblika José Ramos-Horta, haktuir bá jornalista sira iha salaun OKA, Díli, Kuarta (21/12/2022).

Hosi sorin seluk, Prezidente Parlamentu Nasionál, Aniceto Longuinhos Guterres Lopes rasik  konsidera kestaun ne’ebé Deputadu sira hato’o hanesan interpretasaun ida, tanba ne’e parlamentu presiza haree atu hadi’a.

“Ida ne’e kestaun interpretasaun, ita tenke halo loos tiha lakuna  sira hanesan prezidente bá viajen sai hosi Timor tama tiha Atambua, embora oras ida rua de’it iha dalan, tama iha territóriu Atambua para depois tama fali ba iha Oe-Cusse ne’e halo nusa, ne’e mós presiza autorizasaun ka, entaun ita tenke trata no halo loos ita nia lakuna no ita-nia interpretasaun ne’e kabe bá Parlamentu,” Aniceto Longuinhos Guterres Lopes hateten.

Asuntu ne’ebé privadu no la’ós privadu, tuir Aniceto Guterres, tenke define klaru iha rezolusaun ruma, enkuantu bá lejislatura ida-ne’e parese la kesi lejislatura seluk.

Jornalista: Vito Salvadór