Hatutan.com, (29 Dezembru 2022), Díli—Rezultadu Sensu tinan 2022 ne’ebé ekipa enumeradór sira hala’o durante fulan-ida hahú hosi 04 Setembru to’o 05 Outubru, rejísta populasaun 1.340.434 ho uma-ka’in 250.034 iha territóriu nasionál.

Rezultadu Sensu 2022 ida-ne’e, hato’o hosi Ministru Finansas (MF), Rui Augosto Gomes iha seremónia enseramentu sensu ne’e, iha edifísiu Diresaun Jerál Estatístika, Caicoli, Kuarta (28/12/2022).

Lee Mós: Implementasaun Sensu Populasaun no Uma-Ka’in 2022 ho Millaun $3,1

“Rezultadu Prelimináriu rejista totál populasaun hamutuk 1.340.434. Ida-ne’e hatudu katak númeru abitante kontinua aumenta. Hosi últimu Sensu iha 2015, iha aumentu númeru habitantes hamutuk 156.792, ho taxa kresimentu anuál 1,8%,” Hatutan.com sita komunikadu.

Rezultadu Prelimináriu mós hatudu katak, daudaun ne’e TL  iha uma-ka’in hamutuk 250.034 ho nia média 5,4 pessoas kada uma-ka’in. Média ne’e ki’ik oituan, kompara ho últimu sensu iha 2015-5,7 pesoas kada uma-ka’in.

Vise-Prezidente Komisaun Nasionál Sensu Populasaun no Uma-ka’in ne’e hatutan, sertamente rezultadu ida-ne’e sei hanesan rezultadu prelimináriu tanba relatóriu Finál sei públika iha fulan-abril 2023.

Tanbá ne’e, Governante ne’e mós enkoraza Organizasaun Sosiedade Sivil, Seitór Privadu, Investigadór sira inklui Entidade sira Governu nian atu uza informasaun prelimináriu hirak ne’e hodi dezeña no implementa programa sira no atividade sira iha futuru.

Iha serimónia enseramentu ne’e, Ministru Rui Gomes akompaña hosi Vise-Ministru António Freitas, Reprezentante UNFPA, Dominggas Bernardo no Prezidente Komisaun Tékniku Sensu Populasaun, Elias dos Santos Ferreira simbólikamente fahe Sertifikadu Apresiasaun bá reprezentante Master Training, ToT, Koordenadór Postu Administrativu, IT Support, Publisidade, Data Coding, Sekretariadu Sensu Nasionál, Sekretariadu Sensu Munisipál inklui Motorista sira ne’ebé mak durante ne’e envolve iha atividade nasionál ne’e.

“Liuhosi atividade Sensu ne’e, Ha’u fiar katak Ita-nia joven sira hetan esperiénsia foun ruma hosi sira nia envolvimentu iha kolekta dadus no informasaun hosi uma-kain sira. Esperiénsia ne’e rasik hamutuk ho Sertifikadu Apresiasaun ne’e bele ajuda sira iha sira nia karreira profisionál no akadémika iha futuru,” Ministru Rui Gomes konklui.

Atu apoia atividade Sensu bele la’o ho susesu, Diresaun Jerál Estatístika rekruta ona staff Sensu hamutuk 4.344 pessoas. Husi númeru ne’e 54% mane no 46% feto.

Iha 15 Agostu liubá, Prezidente Repúblika (PR), José Ramos-Horta akompaña hosi Primeiru-Ministru, Taur Matan Ruak mak lansa Sensu Populasaun no Uma-kain 2022.

Iha 15 Novembru, iha ámbitu Selebrasaun “Dia dos 8 Bilhões”, Ministru Rui Gomes no Reprezentante UNFPA mós ofisialmente lansa ona Rezultadu Prelimináriu Sensu Populasaun 2022.

Sensu Populasaun no Uma-ka’in tinan ida-ne’e mak Primeiru Sensu Populasaun ne’ebé introdus instrumentu dijitál (CAPI Android) ba enumeradór sira hodi uza kolekta dadus.

Sensu Populasaun 2022 mak últimu Sensu Populasaun realizada durante intervalu tinan 5. Bazeia ba rekomendasaun internasionál, Sensu Populasaun tuir-mai sei realiza iha tinan 10 oin mai.

Jornalista: Rogério Pereira Cárceres