Hatutan.com, (04 Janeiru 2023), Díli-Bazeia bá prova investigasaun bá kazu projetu instalasaun  Set-Top box Rádiu Televizaun Timor Leste, Empreza Públika (RTTL,E.P), Komisaun Anti Korrupsaun (CAC, sigla portugés) konstitui Ministru Asuntu Parlamentár no Komunikasaun Sosiál (MAPKOMS), Francisco  Martins da Costa Pereira Jerónimo hosi suspeitu bá arguido.

CAC konstitui Ministru Francisco  Martins da Costa Pereira Jerónimo  nu’udár arguido tuir baze legal ka Kódigu Prosesu Penal (KPP) artigu Artigu 91 (Notifikasaun), alínea 3  ne’ebé hateten, funsionáriu judisiál, ajente polisiál  ka autoridade seluk ne’ebé lei fó kompeténsia maka halo notifikasaun tuir despaxu ka ho oden ofisioza hosi sekretaria judisiál. 

Lee Mós : Kazu Projetu Instalasaun Set-top Box RTTL,E.P, Arguida MCS Husu TDD Halo Pedidu Bá MP Fó Fila Evidénsia Balun Ne’ebé La Prienxe Krime

Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, presta tán deklarasaun iha CAC hanesan arguido, Kuarta (04/01/2023). Foto/Elio dos Santos da Costa

Ministru Francisco Martins da Costa Pereira Jerónimo, Kuarta (04/01/2023), hale’u tuku 09.04 Otl, marka prezensa iha edifísiu Komisaun Anti-Korrupsaun (CAC, sigla portugés) hodi hatán bá notifikasaun hosi sesaun investigadór CAC nian para presta deklarasaun relasiona ho kazu projetu instalasaun Set-top Box RTTL,E.P ne’ebé lori prejuízu bá Estadu ho montante orsamentu $7,680.00.

“Sim, mai atu halo deklarasaun bá iha sesaun investigadór, investigasaun kona-bá problema ne’ebé mak ita-boot sira hatene tiha ona. Mai dehan ha’u suspeitu, agora sa’e bá arguido, atu dehan tán bá saida mak ne’e, ha’u mós hein de’it, bainhira mak atu hatete loloos,” Francisco Martins da Costa Pereira Jerónimo, hatete bá jornalista sira, hafoin presta deklarasaun iha CAC.

Ministru Francisco Jerónimo, lamenta ho asaun sira hosi investigadór CAC nian, ne’ebé husu nia hanesan ministru atu bá hato’o ninia deklarasaun. Tanba tuir nia, CAC tenke respeita ierarkia bá órgaun konstitusionál Estadu ka Governu nian, tanba nia (MAPKOMS) hanesan ‘membru governu’ ida.  Nune’e, CAC tenke halo karta bá Xefe Governu Taur Matan Ruak, atu bele iha ‘koñesimentu no fó autorizasaun’.

Lee Mós : CAC Identifika Arguidu Na’in-haat Bá Projetu Instalasaun Set-top Box RTTL,E.P

“Ha’u marka prezensa iha ne’e, atu hatudu de’it katak, ha’u hakarak atu koopera ho justisa, ne’e primeiru. Mezmu  prosedura sira dala-ruma la loos, tanba Xefe investigasaun ida halo karta bá ha’u, husu ha’u hanesan ministru mai presta deklarasaun, mas  ha’u iha Primeiru-Ministru iha, tuir loloos, haruka bá tuir órgaun. Órgaun Konstitusionál ne’e, ita tenke respeita mós órgaun Konstitusionál ninia ierarkia,” Francis Jerónimo  afirma.

Ministru MAPKOMS, Francisco Martins da Costa Pereira Jerónimo, presta tán deklarasaun iha CAC hanesan arguido, Kuarta (04/01/2023). Foto/Elio dos Santos da Costa

“Bolu ha’u mai ne’e, hanesan suspeitu, maibé, to’o iha ne’e mai, dehan fali katak, ha’u sa’e fali bá arguido. Prontu, simu de’it, ha’u laiha problema. Ne’ebé, hein de’it. Ne’ebé, prontu, ne’e buat saida, prosesu sira, ne’e ha’u mai. Prontu, ha’u mai deklara tiha iha ne’e, hotu ona, no ha’u fila,” Francisco Jerónimo hateten tan.

Ministru Francisco Jerónimo to’o iha CAC, iha hale’u tuku 09:04, Otl ho karreta Estadu nian  Xapa Matrikula 00-0006 G no bainhira tuun hosi karreta akompaña kedas hosi asesór  sira balu, inklui nia seguransa pesoál hosi Korpu Seguransa Pesoál  (CSP) Polísia Nasionál Timor-Leste (PNTL).

Lee Mós : Kazu Projetu Set-Top Box RTTL, E.P, CAC Kontinua Halo Inkéritu bá Evidénsia Hosi Arguidu Sira

Jornalista: Rogério Pereira Cárceres