Hatutan.com, (11 Janeiru 2023), Díli—Prezidente Repúblika (PR), José Ramos-Horta respeita órgaun soberanu ida-idak ninia kompeténsia, nune’e sei la halo intervensaun ba servisu Tribunál nian, maibé husu atu Tribunál kontinua hala’o servisu ho lealdade ba Lei hodi garante sidadaun sira nia direitu ba justisa ne’ebé loos no justu.

Reprezentante UNIZMA-PRO-RDTL, hasoru-malu ho Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, Kuarta (11/01/2023).

Advogadu hosi Fundasaun Lia Loos, Celestino Guterres ne’ebé fó asisténsia legál ba Unizma Pró RDTL/CPD-RDTL hateten, Prezidente Repúblika konvida mai atu esklarese kona-bá rai Ai-meti laran ne’ebé durante ne’e sai polémika.

Lee Mós: Unisma Pro RDTL/CPD-RDTL Kestiona Desizaun Tribunál bá Rai Ai-meti Laran

Hosi parte advogadu hakarak atu konfirma katak, Prezidente Repúblika bolu mai atu rona faktu sira ne’ebé hosi advogadu hato’o no Xefe Estadu sei haree.

“Órgaun soberanu iha nia kompeténsia rasik no Xefe Estadu rasik esplika katak, nia sei la halo intervensaun ba prosesu judisiáriu ida-ne’e, maibé prosesu hotu-hotu la’o iha Tribunál nia kompeténsia, nune’e Tribunál mak sei deside,” Advogadu Celestino Guterres hateten iha Palásiu Prezidensiál Nicolau Lobato Bairru-Pité, Kuarta (11/01/2023).

Kona-bá kazu rai Ai-meti laran, ida-ne’e hanesan baibain bainhira ida manán, ida lakon sempre iha rekursu, entaun rekursu ne’e halo tiha ona no rekursu estraordináriu ne’e halo tiha ona, desizaun mós iha ona.

Maibé, iha prosesu ezekusaun mak sei halo hela opozisaun ba ezekusaun ne’e, tuir rekursu ne’ebé agora sa’e hela ba Tribunál Rekursu no para hela iha Tribunál Rekursu nia kompeténsia.

Atu esplika klaru ba públiku katak, primeiru ezekusaun hosi autór ka advogadu hatama tiha ona entaun hosi advogadu ba kliente rai Ai-meti laran foti opozisaun hasoru no hatama fila-fali ba Tribunál Rekursu ho Tribunál Distritál Dili no notifikasaun mai tiha ona katak kazu ezekusaun ne’e suspende tiha ona inklui prosesu rekursu agora para hela iha Tribunál Rekursu nia kompeténsia.

“Mensajen badak hosi Xefe Estadu fó maka advogadu hotu-hotu no se de’it mak servisu bá lei hotu-hotu bele atende kliente sira ho di’ak, atende sira nia direitu ho di’ak atu labele prezudika sira,” nia informa.

Portavóz UNIZMA-PRO-RDTL, Ivo Seqeuira hateten Prezidente Repúblika hato’o katak, desizaun ne’ebé iha nia sei ko’alia ho Tribunál Rekursu no juiz sira ne’ebé hola desizaun la’ós katak loos hotu kedan no Xefe Estadu sei ko’alia ho nia asesór jurídiku sira atu haree mós kazu ne’e tanba Xefe Estadu lakohi povu kiik sira lakon sira nia direitu iha Timor Leste.

Kona-bá povu ne’ebé konsentra iha Ai-meti laran ne’e hanesan solidaridade ba Manuel Gusmão no la’ós UNIZMA mak mobiliza maibé Lei mak mobiliza Primeiru CRDTL artigu 1 ko’alia kona-bá Estadu direitu demokrátiku no artigu 2 ko’alia kona-bá soberanu hatuur metin nia povu, artigu 42 povu kiik sira iha direitu atu halo manifestasaun no reuniaun no artigu 48 ko’alia kona-bá sidadaun no se-se de’it iha direitu atu hato’o keixa, hato’o reklamasaun ba autoridade ka Tribunál.

Atualmenteu iha ema na’in 2.274 mak konsentra iha rai Ai-meti laran hodi halo asaun demostrasaun la’ós atu halo ameasa ka fó presaun ba Estadu ka Tribunál, maibé sira ne’e atu hadi’a erru umanu ka desizaun errada ne’ebé mosu iha Tribunál nune’e justisa ne’e bele la’o iha Timor.

Konsentrasaun povu kiik iha Ai-meti laran ne’e sei kontinua hodi hein rezultadu hosi Tribunál Rekursu.

Jornalista: Vito Salvadór