Hatutan.com, (14 Fevereiru 2023), Díli- Prezidente Repúblika (PR), José Ramos-Horta, hateten prezensa Xefe Kaza Militár iha prosesu buska no apreensaun iha rezidénsia Longuinhos Monteiro nian tamba hetan autorizasaun hosi nia hanesan Komandante Supremu Forsa Armadas, maibé la’ós atu halo intervensaun bá servisu órgaun judisiál, seguransa no defeza nian.

Lee Mós : Xefe Kaza Militár Prezidénsia Repúblika “Mosu” iha Buska no Apreensaun iha Rezidénsia Longuinhos Monteiro

Prezidente Repúblika, José Ramos-Horta. Foto/Elio dos Santos da Costa

Prezidente Repúblika, José Ramos-Horta bá jornalista sira iha fatin Inséndiu Becusse Sentru,  Díli, Tersa (14/2/2023), afirma Kona-bá prezensa Xefe Kaza Militár Majór Francisco da Silva ho nia Adjuntu Superintendente Polísia João Belo no eskoltu hodi akompaña buska no apreensaun bá iha rezidénsia Longuinhos Monteiro ne’e hetan autorizasaun hosi nia rasik atu akompaña hanesan testamuña no la’ós atu halo intervensaun.

“Prezidente Repúblika nu’udár Komandante Supremu Forsa Armada no nu’udar Prezidente bá Konselu Superiór Defeza Seguransa (KSDS), ha’u haruka atu bá haree hanesan testemuña tékniku indepedente la halo buat ida bá haree de’it.” Prezidente Repúblika José Ramos-Horta hateten.

Polísia Sientífika Investigasaun Kriminál (PCIC, sigla portugés) Kinta 9 fulan-Fevereiru 2023, ezekuta mandadu  foun hosi Tribunál Distritál Díli (TDD) hodi halo buska no apreensaun iha rezidénsia Longuinhos Monteiro iha Aldeia Trans, Suku Vatu Voro, Loes, Postu Administrativu Maubara, Munisípiu Liquiça.

PCIC ho nia ekipa to’o iha rezidénsia atuál Asesór prinsipál Prezidente Repúblika,  José Ramos-Horta nian ne’e, hale’u tuku 11.00 Otl, hodi ezekuta mandadu buska no apreensaun foun hosi TDD. Maibé, Xefe Kaza Militár interinu Majór Francisco da Silva ho nia adjuntu  Superintendente Polísia João Belo,  husu PCIC atu hapara lai buska no apreensaun ne’e.  

Fontes  balun iha PCIC ne’ebé rejeita  fó nia identidade informa bá Hatutan.com katak Xefe Kaza Militár no nia adjuntu marka prezensa iha terrenu ka iha rezidénsia Longuinhos Monteiro nian ne’e tanba sira dehan, sira hetan orientasaun direta hosi Prezidente Repúblika, José Ramos-Horta, atu akompaña prosesu ne’e. Basá, Longuinhos Monteiro hanesan mós asesór prinsipál ida iha Palásiu Prezidensiál.

Kona-bá interpretasaun públiku nian katak aktu ne’e hanesan intervensaun indireta hosi Prezidente Repúblika bá iha servisu órgaun judisial no servisu seguransa no defeza nian, xefe Estadu argumenta katak husik sira ko’alia bá, loloos husu fali se elementu balun ne’ebé marka prezensa iha Loes ne’e sira nia mandatu atu marka prezensa iha ne’eba ka la’e tamba hanesan Xefe Estadu lahalo intervensaun polítik.

“Se polísia militár iha ne’eba ne’e polísia militár nia servisu, SNI bá iha ne’ebá ne’e SNI nia servisu husu mak ida ne’e, há’u la halo intervensaun ruma liga ho servisu autoridade sira nian iha terrenu,” Ramos-Horta  afirma.

Jornalista: Vito Salvadór