Hatutan.com, (07 Fevereiru 2023), Díli- Xefe Estadu  José Ramos-Horta, husu bá autoridade lokál sira iha teritoriu nasionál no liu-liu iha Munisípiu Díli atu kontinua tau atensaun bá problema ambiental hodi kontribui bá pás iha sosiedade.

Lee Mós : AMD Husu Komunidade Ajuda Hamoos Lixu iha Uma-Ninin

Lixu soe arbiru iha kapitál Dili. Foto/Hatutan.com

Prezidente Repúblika, José Ramos-Horta husu atu autoridade lokál sira hatudu sira nia lideransa bá meiu ambiente. Tanba realidade hatudu katak tinan bá tinan problema lixu iha Díli laran  prejudika ema nia saúde.

Ramos-Horta hateten, Governu halo kampaña bá kuda ai iha fatin-fatin, maibé la halo sedimentu balun atu kuidadu ai, animal estraga no at liu tan, ema ka komunidade sira laiha sensibilidade bá ambiente hodi soe lixu arbiru hodi hamate ai-horis sira ne’ebé kuda.

“Xefe Aldeia no Xefe Suku sira, favor eduka imi nia populasaun para labele soe lixu arbiru bá mota laran, tamba komunidade sira halo fali mota laran ne’e hanesan lixu, depois udan mai tama bá tasi, no oho ahu-ruin ka koral, ikan sira no estraga hotu biodiversidade tasi nian halo ita sai kiak tamba ita-nia hahalok rasik,”  Prezidente Repúblika José Ramos-Horta hateten iha diálogu ho líder komunitáriu sira Munisípiu Díli nian iha Palásiu Prezidensiál, Tersa (07/02/2023).

Xefe Estadu hatutan, uluk iha mandatu dahuluk hanesan Prezidente Repúblika halo kampaña nasional suku moos, ho aktividade kompetisaun suku moos bá iha sidade Díli laran tomak atu iha konkursu públiku ida hodi hili suku ne’ebé moos liu, atu manan prémiu ho montante osan $1000.00, no osan ne’ebé iha autoridade suku nian bele sei utiliza bá nesesidade suku nian konforme saida mak suku hakarak halo.

Kampaña nasionál ne’e atu rezolve problema lixu, tamba ne’e Prezidénsia Repúblika iha ona hanoin atu motiva no enkoraja hikas komunidade sira kuidadu ambiente hodi labele soe lixu arbiru.

“Problema kolera, saúde públiku no moras hada’et sira seluk mai hosi lixu, tamba ne’e autoridade lokal sira tenke halo esforsu atu komunidade sira tau matan ho seriedade bá problema lixu,” Ramos-Horta afirma.

Iha okaziaun ne’e Xefe Suku Colmera, Arménio Aleixo da Silva hateten, ambiente hola parte mós bá dame, bainhira komunidade moris moos, tau lixu iha fatin hatudu katak komunidade hadomi ambiente no hosi ambiente ne’ebé moos halo ema moris saudavel no hakmatek.

Xefe Suku Colmera, Arménio Aleixo da Silva. Foto/Elio dos Santos da Costa

Nia afirma Prezidente Repúblika José Ramos-Horta iha nia mandatu dahuluk iha ona programa kompetisaun suku moos, no sei kontinua iha mandatu daruak nian ne’e tamba Xefe Estadu hakarak enkoraja no motiva komunidade sira atu labele soe lixu arbiru, kuidadu ambiente, no moris mos no saudavel.

Xefe Suku Fatuhada, Marcelino Soares hateten, autoridade lokál iha papel importante iha komunidade nia-leet,  nune’e sei halo esforsu atu tau matan áa sosiedade nia moris hakmatek liuhosi garante limpeza no kuidadu ambiental bá pás.

“Ami autoridade lokal ne’e iha papel importante bá komunidade nia moris hakmatek tamba ne’e sei esforsu atu hamutuk ho komunidade sira kuidadu ambiente liu-liu la bele soe lixu arbiru,” Hateten Marcelino Soares.

Jornalista: Vito Salvadór