Hatutan.com, (15 Fevereiru 2023), Díli- Prezidente Repúblika (PR), José Ramos-Horta, husu Governu liuhosi Ministériu Saúde atu tau atensaun máximu bá kondisaun no fasilidade  klínika matan iha Hospital Nasionál Guido Valadares (HNGV). Nune’e,  bele fasilita Timoroan sira halo tratamentu matan iha rai laran.

Pasiente matan halo operasaun iha Klínika Matan iha HNGV, Kuarta (15/02/2023). Foto/Elio dos Santos da Costa

Klínika matan iha HNGV  uluk hanaran East Timor Eye Program  amigu sira hosi Austrália mak harii, tamba ne’e bainhira Prezidente Repúblika vizita hikas klínika refere hodi haree besik liután kondisaun no servisu sira iha klínika ne’e no ekipamentu sira ne’ebé instaladu.

East Timor Eye Program agora entrega bá estadu Timor-Leste no hola parte ona ba diresaun Oftamologia HNGV, maibé sei iha falta barak loos, liga ho rekursu umanus no ekipamentu maske sufisiente, maibé lanaton atu atende populasaun tomak Timor laran.

“Há’u apelu ba Governu labele para programa formasaun bá rekursu umanus tamba formasaun ne’e maka importante no kada tinan Governu tenke tau orsamentu bá formasaun médiku espesialista iha área Oftalmologia tamba iha foho ituan liu, iha Suai no Baucau ida ka rua deit. Governu tenke tau matan ba klínika matan ne’e, atu tulun fasilita Timoroan sira, hapara transferénsia  bá li’ur no mellora kondisaun klinika iha ospitál sira rai laran,” Prezidente Repúblika José Ramos-Horta bá jornalista sira bainhira vizita ba klínika Oftamologia iha HNGV, Kuarta (15/02/2023).

Advertisement

Xefe Estadu hatutan Governu iha tinan sira nia laran ne’e nunka tau orsamentu lolós bá setór saúde, no nunka tau orsamentu lolós bá ospitál, iha HNGV sala VIP de’it ladún iha kondisaun, kulisaun sira tuan, haris fatin avaria, situasaun sira ne’e akontese tamba Governu la tau orsamentu lolós bá setór saúde.

“Ospitál ne’e prioridade, ita haruka ema moras lubuk ida bá Jakarta, Bali, Malázia no Singapura ho orsamentu millaun ba millaun kada tinan, nusa latau osan ne’e hodi dezenvolve ospitál sira iha Timor-Leste ho diak,” Ramos-Horta subliña.

PR Ramos-Horta vizita Klínika Matan iha HNGV, Kuarta (15/2/2023). Foto/Elio dos Santos da Costa

Parabéns ba unidade Oftamologia HNGV, ba médiku espesialista sira tantu estranjeiru no mos Timoroan ne’ebé hatudu vontade servisu hodi servi povu ne’e mai halo tratamentu iha klínika ne’e.

Xefe Departamentu Klínika Matan HNGV, Julia Rosalina César Magno hateten, iha klínika matan HNGV, kazu mai iha oin-oin, hahú hosi labarik too adultériu sira no mai ho moras matan ne’ebé mak diferente, no iha klinika matan HNGV rasik loron ida bele atende pasiente matan hahu husi 75 too 150 kada loron.

Hosi pasiente sira ne’e iha mos kazu katarata katak pasiente sira ne’ebé mai ho problema matan lahare, kada loron bele halo operaaun ba pasiente nain 10 too 20, no oráriu ba operasaun hahú husi segunda to Kinta-Feira.

Iha sala operasaun klinika matan, iha kama rua no kada loron doutor nain rua mak sei halo operasaun ba pasiente sira ne’e.

Advertisement

“Haree hosi dadus 2022 nian, kada fulan klínika matan HNGV atende pasiente 500 too 800, no iha fulan balu númeru ne’e bele reduz no mós bele sa’e too 1000,” Julia Rosalina César Magno hateten.

Númeru pasiente matan ne’ebé sempre mai halo tratamentu bá matan iha klínika matan HNGV maioria ho idade 45 bá leten, no barak liu mai ho katarata no reflectir error ho oklu ne’e mós barak.

Espesialista matan iha Timoroan iha na’in-lima (5), estranjeiru 5na’in-lima (5) kompostu hosi  Austrália na’in-ida, Nepal  na’in-ida no na’in-tolu seluk hosi Cuba.

Iha mós espesialista matan Timoroan pos graduasaun hosi ospitál referal Suai na’in-rua no total hamutuk servisu iha klínika matan na’in-12.    

Iha orsamentu jerál Estadu tinan 2023 bá HNGV ho total orsamentu millaun $13 no hosi osan ne’ebé iha, bá saláriu no vensimentu hamutuk millaun $6, millaun $3 aloka bá ekipamentu médiku, no kuaze millaun $4 bá manutensaun no estensaun bá sala sira HNGV.

Advertisement

Jornalista: Vito Salvadór