Hatutan.com, (22 Novembru 2021), Dili—Conferênsia Episcopal Timorense (CET) nomeia Padre Justino Tanec nu’udár reitor Instituto Superior Filozofia no Teolojia (ISFIT) D. Jaime Garcia Goulart Fatumeta, Dili ba períudu 2021-2026.

Reitór foun ISFIT hamutuk ho estrutura iha serimónia pose ne’ebé hala’o iha salaun São Pedro no São Paulo, Fatumeta, Segunda (22/11/21). Foto/ISFIT.

Iha serimónia posse, parte sekretariadu CET lee karta terminasaun mandatu ba reitór sesante Padre Domingoa Alves ho númeru referénsia 28/CET/X/2021 ne’ebé agradese ba serbisu no dedikasaun hodi dezelvolve institutu akadémiku ISFIT to’o termina funsaun.

Alende ne’e, lee mós karta provizaun ho númeru 29/CET/X/2021, Prezidente CET no atuál Bispu Dioseze Maliana Dom Norberto do Amaral deside fó mandatu ne’e ba reitór foun Padre Justino Tanec, hodi kontinua implementa no asegura funsionamentu di’ak instituisaun ne’e tuir kualidade no kompeténsia ne’ebé reitór foun iha, nune’e instituisaun akadémika ne’e la’o ba oin ho susesu liu tán konta ho buat ne’ebé reitór sesante halo ona.

Iha mós despaixu hosi Comissão Nasional Educação Catolica Timor Leste (CONECTIL) ho númeru 15/CONECTIL/XI/2021, hateten CONECTIL estabelese iha tinan 2014 hosi CET ho objetivu atu administra no tau-matan ba eskola Katolika sira iha territóriu nasionál hahú hosi Pré-Primária to’o nível as-liu hanesan Ensinu Superiór.

Konsidera ISFIT nia ejizénsia atu bele apoia rekursu umanu ba Timor Leste, tanba ne’e nesesáriu tebes atu hola desizaun hodi nomeia hikas reitór foun ho estrutura sira, tuir baze legál iha Konstituisaun Repúblika Demokrátika Timor Leste (RDTL) artigu 59, lei baze edukasaun 14/2008, 29 Outubru, dekretu númeru 32/2009 kona-bá rejime jurídiku ensinu superior no estatutu ISFIT.

Iha provizaun hosi CONECTIL ne’e nomeia padre Justino Tanec hanesan Reitór ho Padre António Quenser do Carmo hanesan Vise Reitór I asuntu ekonómiku, Elídio Agusto Guterres Vise Reitór III Asuntu Estudantil no koopersaun.

Mandatu estrutura atuaá ba tempu períudu ida no iha posibilidade hetan extensaun bazeia ba avaliasaun hosi CONECTIL.

Reitór foun ISFIT hamutuk ho estrutura no mós estrutura sesante iha serimónia pose ne’ebé hala’o iha salaun São Pedro no São Paulo, Fatumeta, Segunda (22/11/21). Foto/ISFIT.

Iha diskursu Reitór sesante Padre Domingos Alves, hateten hafoin husik knaar nu’udár Reitór iha Semináriu Maiór Interdiosezanu São Pedro no São Paulo, simu kedan knaar nu’udár Prezidente Komisaun Instaladora ISFIT nian hodi hahú asentua servisu balun nu’udár aliserse dahuluk ba ISFIT nia ezisténsia.

“Servisu sira ba instalasaun ISFIT nian kompleta ho kriasaun dekretu kona-bá institutu superiór númeru 1/2013. Servisu ho estrutura ida kiik no simplest tebes, maibé ikus mai lori susesu ba ISFIT ne’ebé hetan akreditasaun instituisionalmente ho autorizasaun provizóriu ba funsionamentu ho karater exepsionál no temporál hosi Ajénsia Nasionál Avaliasaun no Akreditasaun Akadémika (ANAAA) bazeia ba diploma ministeriál númeru 37/GN-ME/XII/2016/,” Padre Domingos Alves, hateten.

Liu tiha situasaun insusesu ne’e, ekipa reitoria no gabinete tomak hosi unidade sira ne’ebé eziste iha ISFIT, halo esforsu hodi submete hikas pedidu akreditasaun iha 2017 no hetan akreditasaun iha 2019 ne’ebé ikus mai realiza primeira graduasaun iha tinan 2020 ba departementu filozofia no Teolojia.

Reitór sesante agradese mós ba funsionáriu no dosente hotu ne’ebé durante períudu naruk ida servisu hamutuk hodi lori susesu ba ISFIT no husu atu kontinua servisu hamutuk ho estrutura foun hodi servi Uma Kreda no sosiedade Timor-Leste liu hosi edukasaun ida kualidade no garante moris di’ak ema nian.

“Obrigadu ba hotu-hotu, ba vise reitór sira, ba dekanu fakuldade sira, ba funsionáriu sira iha administrasaaun, funsionáriu sira iha bioblioteka, pessoál limpeza no mós ema hotu ne’ebé ho domin no dedikasaun servisu ba ISFIT. Hau prontu no konta nafatin ho ha’u ba susesu tomak ISFIT nian,” Padre Domingos Alves agradese.

Hafoin simu posse, Padre Justino Tanec hato’o vizaun ba oin hakarak ISFIT sai hanesan imajen Igreja akolladora. Signifika Igreja ida akumulativu la’ós de’it Padre no Madre sira nian, maibé sarani sira hotu nian.

“Imi hotu nia matenek, imi nia konsellu no imi nia amizade liu hosi dedikasaun kotidiana ho Espiritu fiar nian iha umildade sai hanesan ami nia forsa atu lori susesu tomak iha nonok nia laran ba Igreja no rai ne’e nia di’ak,” Padre Justino Tanec, hateten.

Reitór foun ne’e sei kontinua obra sira ne’ebé Reitór sesante ho estrutura halo ona no sei mellora di’ak liután servisu atu servi sosiedade no Igreja liu hosi edukasaun.

Tuir relatóriu finansas, ISFIT iha saldo atuál $318.426.47 iha banku komersiál rua ne’ebé estudante sira ba halo pagamentu direta sira nia propinas no ida seluk atu depozita osan ISFIT nian.

Padre Justino Tanec moris iha knua Oelcaem, Suku Taiboko Sub Rejiaun Pante Makasar, Rejiaun Administrativa Espesiál Oecusse Ambeno (RAEOA), iha loron 10 fulan Agosto tinan 1980.

Padre Justino Tanec hanesan oan mane dahuluk hosi maun alin na’in ualu hosi aman Carlos Tanec no Maria Taec (Inan+).

Iha tinan 1996 to’o 1999 hahú formasaun sai nailulik iha Semináriu Menór Nossa Senhora de Fátima Balide (SENOFA) no hala’o nia estudu iha Eskola Secundária Católica Colégio São José Balide.

Frekuenta formasaun Anu Propedeútiku iha Semináriu SENOFA, hosi tinan 1999 to’o 2000. No kontinua hala’o formasaun Anu Espiritualidade iha Semináriu São João Maria Vianney Dare, iha  tinan 2000 to’o 2001.

Formasaun ba Filozofia no Teolojia iha Semináriu Maiór Interdiosezanu São Pedro no São Paulo Fatumeta (SPEPAL), hosi tinan 2001 to’o 2008.

Iha loron 29 fulan Juñu tinan 2010, simu Ordenasaun Diakonál hosi maktoban Dom Alberto Ricardo da Silva, Bispu Dioseze Dili iha Sé Katedral Dili.  

Iha loron 8 fulan Dezembru tinan 2010, simu Ordenasaun Saserdotál hosi liman lulik maktoban Dom Alberto Ricardo da Silva, iha Sé Katedrál Dili.

Padre Justino Tanec mestradu iha Liturjia ne’ebé frekuenta iha Bacerlona (España), hosi tinan 2014 to’o 2017.

Atualmente assume knaar nu’udár Moderadór Espirituál iha Semináriu Maiór Interdiosezanu Fatumeta, hala’o servisu mós nu’udár Dekanu Filozofia iha ISFIT  no hola parte mós iha Comissão Liturgia nasionál iha CET.

Jornalista: Vito Salvadór