Hatutan.com. (18 Abríl 2023), Díli—Rezultadu survey hosi Alumni Parlamentu Foinsa’e Timor-Leste (APFTL) hatudu katak joven sira-nia preferénsia hili partidu CNRT ho persentajen 39,9, hili partidu FRETILIN (28,5%), hili  Partidu Demokrátiku (18,3%), hili partidu KHUNTO (5,7%) no respondente 7,6% hili seluk.  

Lee Mós : Survey M-SRI: Maioria Respondente Hili CNRT no Hakarak Xanana Primeiru-Ministru

Survey ne’ebé ofisiálmente aprezenta hosi prezidente Alumni Parlamentu Foinsa’e Timor-Leste (APFTL), Zaulino Gomes da Silva ne’e hala’o iha salaun edifísiu Alumni Parlamentu Foinsae Timor-Leste nian iha Becora, Díli, Tersa (18/4/2023).

Survey hosi APFTL kona-bá joven sira-nia preferensia hili partidu polítiku. Foto/Repro

Survey Alumni Parlamentu Foninsae Timor-Leste ne’e hahú hala’o hosi fulan-Fevereiru to’o fulan-Abríl 2023 ne’ebé envolve respondente juventude na’in-350 hosi munisípiu 11.

Survey APFL nian ne’e hatudu mós katak razaun joven sira deside hili partidu polítiku ho porsentajen 37,89 tanba figura, 37,58% deside hili partidu politiku tanba vizaun, 13,68% tanba istoria no seluk 10,88%.

Iha survey ne’e jovens sira-nia preferensia bá asuntu sira ne’ebé presiza Governu prioritiza mak hanesan setór edukasaun 26,96%, infrastrutura 24,24%, saúde 18,81%, ekonomia 8,15%, kampu traballu 7,21%, agrikultura 5,21%, sosial 3,13%, no seluk 6,37%.

Metodolojia

Survey  APFTL nian ne’e uza aprosimasaun kuantitativa deskritiva & korelasionál, hodi sukat relasaun sira entre variavel ida ho variavel sira seluk, ho nivel konfidensial 95% no erru marzinál 5%. Halo entrevista semi estruturada ho jovens hamutuk 350 hosi munisípiu 11, maneira hili respondente utiliza metodu amostrajen asidentál.

Distribuisaun idade maka hosi tinan 17 to’o tinan 35, ho idade media respondente sira maka tinan 24. Iha distribuisaun jéneru respondente sira, mane iha 56%, feto iha 40% no non-bináriu iha 4%.

Porsentajen survey APFTL nian kona-bá razaun jovens sira hili partidu polítiku. Foto/Repro

Iha eskala konfiansa polítika agrupa dimensaun tolu: Kapasidade lideransa, integridade no paixão.

Eskala satisfasaun demokrasia iha dimensaun tolu: Sistema demokrasia, mekanizmu eleisaun no mos rezultadu hosi demokrasia.

Variavel dependente, eskala partisipasaun polítika sukat hosi dimensaun hitu: Interesse bá asuntu polítika, halo diskusaun kona-bá assuntu polítika, frekuensia envolvimentu iha organizasaun polítika, frekuensia partisipa iha eleisaun sira, frekuensia hasoru-malu ho kuadru polítiku ne’ebé iha pozisaun iha Parlamentu Nasionál ka Governu, frekuensia hasoru-malu ho autoridade lokál sira, Liberdade halo asaun protestu ka demonstrasaun.

APFTL rekoñese katak survey ne’e nia rezultadu bele hamosu insatisfasaun iha públiku, maibé nu’udar organizasaun juventude APFTL barani publika tanba ida-ne’e mai hosi joven sira-nia hanoin no interese rasik.

Survey ne’e inisiativa hosi APFTL rasik, la hetan apoiu ruma hosi instituisaun estadu, ajénsia nasionál, internasionál, liu-liu laiha relasaun ruma hosi Partidu Polítika, ho hanoin ida atu bele garante nia rezultadu ida ne’ebé ho objetividade.

Jornalista Estajiáriu : Lazaro Pereira Quefi/Direce Sandra Gomes