Hatutan.com, (17 Abríl 2023), Díli- Prezidente Repúblika (PR), José Ramos-Horta, husu atu Sekretariadu Tékniku Administrasaun Eleitorál (STAE) kria kondisaun no fasilita jornalista hotu hosi mídia estatál no mídia privada  sira vota livre iha sentru votasaun ne’ebé sira halo kobertura bá.

Lee Mós : FRETILIN-PLP-KHUNTO Asina Nota Entendimentu Plataforma Pré-eleitoral

Ekipa Jornalista Hatutan.com hamutuk na’in-neen (6) hetan kartaun kredensiál bele vota móvel iha eleisaun prezidensiál, 29 fulan-Marsu 2022. Foto/Dok.Hatutan.com

Xefe Estadu preokupa no ladún kontente ho ho desizaun ne’ebé STAE iha hodi autoriza no fasilita de’it jornalista sira iha media estatál hanesan Rádiu no Televizaun Timor-Leste, Empreza Públiku (RTTL.E.P) no Tatoli. I.P mak vota livre iha sentru votasaun ne’ebé jornalista sira halo kobertura, enkuantu jornalista seluk ne’ebé servisu bá mídia nasionál privadu laiha oportunidade atu vota livre.

“Kona-bá desizaun STAE nian atu jornalista sira hosi media privada la vota livre, ne’e labele, ne’e diskriminasaun. Ita hakarak para hotu-hotu partisipa, kria kondisaun para jornalista sira hotu-hotu bele vota livre iha fatin ka estañu votasaun sira ne’ebé jornalista sira halo kobertura bá,” Prezidente Repúblika José Ramos-Horta hateten bá jornalista sira iha salaun konferénsia Ministériu Negósiu Estranjeiru no Kooperasaun, Díli, Segunda (17/04/2023).

Xefe Estadu hato’o nia duvida hodi dehan, iha tinan lubuk ida bá kotuk jornalista hotu bele vota livre tanbasá mak tinan ne’e labele.

“Di’ak liu STAE lalika politiza ida-ne’e. STAE iha maneira atu politiza buat partidária, jornalista sira iha ne’ebé-ne’ebé kria kondisaun para sira bele vota, entaun sira hatete sentru paralelu ne’e, uluk halo tiha ona sentru paralelu tuir lei anteriór,” Ramos-Horta afirma.

Jornalista: Vito Salvadór