Hatutan.com, (19 Abríl 2023), Baucau— Abertura kampaña iha Postu Administrativu Vemase, Munisipiu Baucau, Kuarta (19/04/2023), Partidu Frente Revolucionário Timor-Leste Independente (FRETILIN) komprometidu hakarak fila ba ukun hodi hadi’a Sistema edukasaun ne’ebé kualidade, investe makas hodi hadi’a Sistema atendimentu iha área saúde no lori bee-moos ba povu.

Abertura kampaña Partidu Frente Revolucionário Timor-Leste Independente (FRETILIN), iha Postu Administrativu Vemase, Munisipiu Baucau, Kuarta (19/04/2023).

“Tenke hadi’a sistema Edukasaun ne’ebé mak laiha kualidade, tenke halo teste ba professór sira no fó formasaun di’ak ba sira. Sira ne’ebé mak la hatene lalika hanorin. Tenke buka ema matenek hodi hanorin, atu fó oportunidade ba ema hotu hodi sai matenek,” Sekretáriu Jerál Partidu FRETILIN, Mari Bim Amude Alkatiri, hateten iha komisiu.

Lee Mós: Abertura Kampaña KHUNTO iha Ainaro, Aprezenta Programa Prioridade Tolu

Alkatiri dehan, eskola ida di’ak maka eskola ida ne’ebé hahú  hosi baze to’o universidade, maibé pré-Eskolár ida to’o tinan hitu tenke iha tratamentu espesiál liu-liu iha área nutrisaun sira, tenke hetan hahán lorloron ho kualidade, hodi sira nia kakutak bele nakloke ba koñesementu.

Nia mós preokupa iha seitór saúde ne’ebé mak prodús doutór barak, maibé la kria kondisaun di’ak ba sira hodi hala’o serbisu, la iha ai-moruk atu kura ema moras sira, nune’e povu fó fiar ba partidu FRETILIN maka sei hadi’a sistema no kria kondisaun dignu ba pessoál saúde sira atu sistema ne’e bele funsiona nafatin.

Bainhira FRETILIN ukun sei hadi’a mós Governu ida di’ak hodi gasta osan oitoan maibé halo dezenvolvimentu barak la’ós Governu ida gasta osan barak, maibé la halo buat ida.

Governu ida tenke halo jestaun ho rasionál, la’ós jestaun gasta osan de’it ne’e governu ne’ebé la serve ba ba povu, tanba ne’e FRETILIN tenke hamutuk ho nia aliadu sira hodi harii Governu ida di’ak no Governu funsiona hanesan isin ida de’it.

“FRETILIN kontinua tau prioridade ba bee-moos hodi kanaliza ba ema ida-diak nia uma. Tanba ne’e importante hodi hado’ok an hosi moras, laiha bee-moos no saneamentu, tanba laiha saneamentu labele hadook an hosi moras,” nia hateten.

Nune’e mós Prezidente Partidu FRETLIN, Fransisco Guterres Lu-Olo, husu ba militante no simpatizante sira atu lori hikas fali Partidu ne’e ba ukun hodi hadi’a povu no nasaun ida-ne’e, tanba ukun an tinan 20 resin ona, maibé povu nafatin halerik buat barak iha sira nia moris loro-loron.

Lu-Olo hateten, tinan 20 povu Timor-Leste restaura nia independénsia nune’e tuir loloos, ohin loron povu hetan ona moris di’ak maibé realidade povu ne’e sei terus nafatin no susar iha sira moris, sei falta osan ba sira hodi selu oan sira nia eskola hodi asesu ba edukasaun no falta ai-moruk hodi trata sira nia saúde.

“Tinan 20 la’ós oitoan, maibé liu tiha tinan 20 ita sei haree ita nia inan feton sira, ita nia maun no alin sira no emar sira sei dada iss nafatin, sei halerik ba buat oi-oin kona-ba sira nia moris ne’ebé mak sei mukit nafatin, aihan falta ba sira, osan falta ba sira hodi selu oan sira nia eskola. Ai-moruk laiha atu kura sira nia moras, ferik ho katuas mate iha hadak leten, iha sira nia uma okos, laiha posibilidade atu bele salva sira nia vida,” Lu-Olo hateten.

Kamapaña dahuluk ne’e hetan observasaun hosi observadór nasionál no internasionál, no hetan seguransa hosi Polísia Nasionál Timor Leste.

Jornalista: Elio dos Santos da Costa