Hatutan.com, (21 Abríl 2023), Díli-Musulmanu hotu iha mundu no iha Timor-Leste, Sesta, 21 fulan-Abríl 2023, selebra loron-boot Idul Fitri 1444 H. Aproveita momentu vitória bá musulmanu sira hafoin hala’o jejún loron 40 nia-laran, Marí Alkatiri hala’o asaun solidariedade hodi apoia material konstrusaun bá juventude Katólika São João Baptista, Daisoli, Postu Administrativu Aileu Vila, Munisípiu Aileu.

Marí Alkatiri simbolikamente entrega materiál konstrusaun bá Sentru Juventude Katólika São João Baptista, Daisoli, Aileu iha CCF, Díli, Sesta (21/4/2023). Foto/Rogério Pereira Cárceres

Konsentra iha Sede Comite Central FRETILIN (CCF), Comoro, Díli, Sekretáriu jerál partidu Frente Revolusionáriu Timor-Leste Independente (FRETILIN)  Marí Alkatiri, fó apoiu ne’e atu bele ajuda juventude sira finaliza sira-nia fatin ka sentru hodi halibur Aileu oan sira no organiza malu hodi kontribui bá atividade Igreja lokál Aileu no kontribui bá dezenvolvimentu nasionál.

“Sira halo ona konstrusaun ruma iha ne’ebá mak, sei falta atu konklui, falta semente saka 50, ho ajuleizu tuir dezeñu ne’ebé iha, entaun, ha’u hanesan ponte, ha’u husu fali ema seluk, iha responde kedas urjénsia, komu ha’u la bá Aileu iha tempu badak, ha’u husu maluk sira, para atu mai Díli hodi entrega bá sira, agora duni, iha loron Idul Fitri,” Marí Alkatiri hateten.

Iha biban ne’e, reprezentante juventude Suku Daisoli, Abríl Mendonça Fátima hato’o sira-nia agradesimentu klean bá Marí Alkatiri, tanba ho apoiu ne’e, bele tulun ona sira, hakmaan ona naha-todan balu mak durante ne’e enfreta.

“Orgullu no agradese tebtebes bá ajudus sira. Apoia sira sei lori bá atu halo konstrusaun atividade fíziku ruma, ami juventude ida ne’ebé hanaran, Foinsa’e Juventude Katólika São João Baptista Daisoli. Sekretáriu jerál ami konsidera hanesan belun bá ami juventude sira, tanba liu de’it hosi mensajen, nia bele responde ona ami nia ezijénsia sira durante ne’e,” Abríl Mendonça agradese.

Juventude Aileu Oan ne’e, antuziazmu tebes bá ajudus sira hosi fundadór nasaun nian, no tuir nia, ida ne’e bele responde ona buat ne’ebé sira durante ne’e sira sente kuran iha prosesu konstrusaun harii Sentru Juventude Daisoli.

Sentru Juventude iha Daisoli ne’e sei halibur hotu juventude suku hamutuk lima mak hanesan, Daisoli, Fatubossa, Lahai, Lekitura, Aldeia Dailór ho  Suku Bandodato.

Jornalista: Rogério Pereira Cárceres