Hatutan.com, (21 Abríl 2023), Viqueque- Prezidente Partidu Congressu Nasional Rekonstrusaun Timorense (CNRT), Kay Rala Xanana Gusmão, promete katak bainhira CNRT ukun iha períodu 2023-2028 sei halo buat rua prinsipál bá povu no nasaun.

Lee Mós : Dezenvolve Uma-Lisan ho Kria Moeda Timor Sai Prioridade APMT

 Programa prinsipál rua ne’e mak; ida, salva Estadu Direitu Demokrátiku no rua, lori dezenvolvimentu ekonómiku bá povu.

Kay Rala Xanana, hatudu bandeira Konsellu Nasionál Rezidénsia Timor (CNRT, sigla portugés). Foto/Vito Salvadór

Xanana Gusmão hateten, Estadu  direitu demokratiku Timor-Leste tenke iha ai-riin haat ne’ebé forte, maibé tuir nia haree katak falta ai-riin tolu ne’ebé seidauk metin tamba Prezidente Repúblika la deside buat hotu-hotu, tenke iha Parlamentu Nasionál ne’ebé forte, Governu ne’ebé forte atu bele hadi’a  iha setór justisa.

Xanana afirma, partidu polítiku hotu ne’ebé eziste tenke hatene no dehan bá povu hakarak halo saida bá rai-ne’e no povu ida-ne’e. Tamba ne’e bainhira povu Viqueque fó fiar bá partidu CNRT sei halo dezenvolvimentu lao iha Timor-Leste to’o ba povu hotu-hotu, la’ós dezenvolve de’it sidade, maibé tenke too iha área remotas.

“Agora komesa ona atu koalia kona-bá ekonómia, kadoras mai mak la konsege fó servisu ba ema hotu-hotu, maibé joven no estudante sira prepara an para iha ekonómia ne’ebé sei deskute no deskute nafatin atu foinsa’e sira partisipa iha ekonómia ida-ne’e hahú kedas too iha kraik, área rurais sira no ida-ne’e mak CNRT atu halo no sei halo bainhira ukun,” Kay Rala Xanana Gusmão haktuir bá militante no simpatizante sira iha komisiu aberta ne’ebé halo iha Kampu Futeból Seloi, Munisípiu Viqueque, Sesta (21/04/2023).

Xanana Gusmão subliña independénsia la signifika  hetan bandeira ida, inu nasionál ida, Prezidente Repúblika ida no moris kontinua nune’e hela, maibé independênsia tuir erói no mártires sira nia mehi mak hadia rai ida-ne’e no hadi’a povu nia moris.

Iha Viqueque Xanana deklara nia sentimentu kontente no orgullu haree partidu seluk fó konfiansa bá CNRT, maibé CNRT lakontente ho ida-ne’e deit no CNRT la hanoin katak CNRT sobu daudauk ona partidu seluk.

CNRT kontente tamba hetan konfiansa hosi povu la’ós kontente tamba atu hetan Primeiru-Ministru, ka vise Primeiru-Ministru, maibé simu todan ida atu kontinua luta kombate ki’ak no konflitu hodi lori dezenvolvimentu to’o iha área rurais.

Kampaña partidu CNRT iha Munisípiu Viqueque, Sesta (21/4/2023). Foto/Vito Salvadór

“Joven sira ne’ebé bo’ot ona, iha ona esperiénsia desentralizasaun sei hahú, assembleia munisipál, atu bele iha ukun nain ne’ebé bele halo servisu di’ak liután ba povu, iha seitór edukasaun, saúde hodi tau profesionál saude besik povu, profesór sira bá too iha área remota atu povu bele sente katak ukun an ne’e iha valor, iha folin, sira nia ran, sira nia sakrifisiu iha folin se lae susar tebetebes,” Xanana Gusmão afirma.

Biban ne’e, Vise Prezidente Partidu CNRT, Gil da Costa Monteiro “Oan Soru”, hateten nasaun ne’e presija ema hotu nia hamutuk, Viqueque oan sira brani kumu-liman tebe rai, mate ka moris ukun rasik an. Tamba ne’e hahú hosi ohin ba oin Viqueque oan tenke hamutuk ona kumu-liman bá dezenvolvimentu nasionál.

“CNRT mosu ho vizaun atu fó solusaun bá povu nia moris ho lider ida visionáriu hanesan Kay Rala Xanana Gusmão,” Gil Oan Soru afirma.

Nia  rekomenda ba Viqueque oan hotu atu tenke fó votu  agradesimentu iha tinan ida ne’e bá Kay Rala Xanana Gusmão atu bele hadi’a no lori dezenvolvimentu ekonómiku bá povu nia moris no lori kadoras mai Beaço.

“Hakarak kadoras mai Beaço no fronteira Timor-Leste ho Indonézia rezolve, maka iha loron 21 fulan Maiu tenke vota bá partidu CNRT,” Gil da Costa Monteiro Oan Soru tenik.

Agradese ba povu Viqueque oan hotu ne’ebé ohin hamutuk ho partidu CNRT, tamba iha kampaña sira partidu CNRT nian antes ne’e iha períodu sira ne’ebé liubá ema labarak hanesan ne’e.

Koordenadór partidu CNRT Munisípiu Viqueque, Anacleto Freitas, husu bá estrutura partidu CNRT hahú husi postu administrativu to’o iha suku no aldeia atu fila husi kampaña ne’e kontinua hato’o ba militante no simpatizante, inklui maun-alin sira ne’ebé namkari iha Munisípiu Viqueque laran tomak katak eleisaun parlamentár hanesan referêndum segundu bá dezenvolvimentu nasionál no povu nia moris diak.

Nia afirma, CNRT ida uluk mak hakotu funu no halibur partidu polítiku sira hotu hodi liberta pátria no povu no partidu CNRT ohin loron halibur partidu hotu-hotu liu husi simu afiliasaun hosi partidu polítiku sira seluk tamba hakarak atu hadia povu nia moris.

Koordenadór ne’e mos garante katak CNRT sei hetan votu hamutuk 15.000, no garante sei hetan vitória iha Munisípiu Viqueque.

Iha kampaña aberta partidu CNRT ne’e simu mos afiliasaun husi partidu polítiku sira seluk hanesan Partidu Libertasaun Populár (PLP), Partidu Demokrátiku (PD), FRETILIN no mós movimentu sira ne’ebé hakarak apoiu partidu CNRT hodi lori Prezidente Partidu CNRT Kay Rala Xanana Gusmão bá Palásiu Governu hodi servi povu no hadia rai-ne’e.

Jornalista: Vito Salvadór