Hatutan.com, (26 Abríl 2023), Díli–Provedoria dos Direitus Humanos e Justiça (PDHJ) nafatin akompaña kazu José Bernardo de Jesus Soares ne’ebé mate ho tali iha kakorok iha Sela Detensaun Polísia Nasionál Timor-Leste (PNTL) Munisípiu Díli.

Lee Mós : Komandante Jerál PNTL “Taka-Ibun” Bá Prosesu Investigasaun Kazu José Bernardo Mate Iha Sela Caicoli

José Bernardo de Jesus Soares, tinan 21, hela iha Audian, Kampu Futeból nia sorin ne’ebé mak lakon vida iha Sela Detensaun Komandu Polísia Munisípiu Díli, tama bá detensaun iha 01 Setembru 2022, tanba sai suspeitu bá kazu baku-malu ne’ebé rezulta vítima hetan ofensa integridade grave no baixa iha sela ICU Hospitál Nasionál Guido Valadares (HNGV) no ikus mai hakotu iis.

Provedór dos Direitos Humanos e Justiça, Virgílio da Silva Guterres ‘Lamukan’. Foto/Elio dos Santos da Costa

Suspeitu ka vítima mate iha sela detensaun iha tuku 19:0 kalan Otl, ho tali tara iha karokok. Hafoin mate, Polísia Munisípiu Díli kontaktu kedan bá família hodi bá haree no akompaña lori bá mortuáriu HNGV hodi hein desizaun bá autópsia.

“PDHJ akompaña nafatin, ita hatene katak Ministériu Publiku halo akuzasaun ona, ha’u hanoin iha Tribunál ona. Ita hein ho akompanamentu buat ne’ebe mak PDHJ  sei akompaña ne’e maka provedoria iha biban barak hateten ona katak iha responsabilidade rua, ida responsabilidade kriminal ne’ebe mak agora la’o iha tribunál no ida seluk mak responsabilidade institusional” Provedoria dos Direitos Humanos e Justiça, Virgílio da Silva Guterres ‘Lamukan’ hateten hodi responde  jornalista sira iha edifísiu CNC!I.P Balide, Díli, Kuarta (26/4/2023).

Provedór Virgílio Guterres afirma, tamba José Bernardo  mate iha propriedade estadu nian, nia la’ós mate iha fatin seluk. Tanba ne’e, Estadu tenke asume responsabilidade ida-ne’e, tamba sidadaun lakon nia direitu bá moris iha propriedade Estadu nian.

Nia hateten, PDHJ laiha kompeténsia katak sidadaun ne’e mate tamba saida, maibé realidade katak sidadaun ne’e mate. Signifika, lakon nia direitu bá moris  no nia família mós lakon nia direitu iha ninia membru família.

“PDHJ sei akompaña hela. Kestaun kriminál ne’e agora iha ona Tribunál ita hein prosesu julgamentu,” Provedór Virgílio Guterres hateten.

Buat ne’ebé maka provedora hakarak aviza ne’e mak parte hotu ne’ebé mak implika iha laran, tenke ho prosesu ne’ebé mak la’o ona, atu nune’e, Tribunál bele hetan ka fó desizaun ida ne’ebé  pelu menus justu bá família no mós ba públiku.

“Ha’u hanoin tamba kazu ne’e sériu depois inklui lakon vida, entaun Ministériu Públiku presiza tempu atu rekolla evidénsia rekolla buka sasin hodi bele iha akuzasaun, portantu ne’e kompeténsia Ministériu Públiku atu haree ida-ne’e, importante mak prosesu tama iha Tribunál,” Virgílio da Silva Guterres tenik.

Lee Mós : Investigasaun Bá Kazu José Bernardo Sei Konklui Iha Marsu Nia Rohan

Jornalista Estajiáriu : Lazaro Pereira Quefi