Hatutan.com, (28 Abríl 2023), Dili— Militante hosi partidu politiku balun tuda malu iha Postu Administrativu Uatulari, Munisipiu Viqueque tuda malu rezulta ema na’in-16 sai vitima ka hetan kanek no uma hamutuk hitu hetan estragus.

Insidente tuda malu entre ema deskoñesidu ho militante partidu Frente Revolusionáriu Timor-Leste Independente (FRETILIN) hafoin kampaña ho tipu diálogu iha Suku Afaloicai, Postu Administrativu Uatulari, Munisipiu Viqueque, Kinta (27/04/2023). Foto/Facebook.

Portavós Komandu Jerál Polísia Nasionál Timor-Leste (PNTL), Superintendente Xefe Polísia Arnaldo de Araújo haktuir katak, bazeia bá kalendáriu kampaña eleitorál ne’ebé fó sai ona hosi Comissão Nacional de Eleições (CNE) katak, iha Kinta (27/04/2023), partidu Frente Revolusionáriu Timor-Leste Independente (FRETILIN) mak hala’o nia atividade kampaña ho tipu diálogu ho militante sira iha Suku Afaloicai, Postu Administrativu Uatulari, Munisipiu Viqueque.

Lee Mós: Hafoin Kampaña Iha Viqueque, Militante CNRT Hetan Tuda Hosi Ema Deskoñesidu

Superintendente Xefe Polísia Arnaldo de Araújo dehan, kazu konfrontu ne’e mosu bainhira militante sira hosi Partidu FRETILIN fila hosi fatin kampaña iha Suku Afaloicai, Uatulari.

“Insidente tuda-malu ne’e rezulta vítima na’in-16 ho uma hitu hetan estragus tanba militante sira ho fatuk mak tuda-rahun,” Superintendente Xefe Polísia, Arnaldo de Araújo hateten liuhosi konferénsia imprénsa iha Kuartél Jerál Caicoli, Sesta (28/04/2023).

Nia konta tuir kronolojia katak, bainhira ho karreta sei nadodon tuituir dalan, derrepente de’it ema deskoñesidu balun ho fatuk tuda hasoru militante sira ne’e iha dalan. Nune’e, militante sira ne’e tun hosi karreta foti mós fatuk hodi tuda hasoru.

Hafoin konfrontu, militante sira  ne’e obriga PNTL Eskuadra Uatilari atu aselera investigasaun kazu ne’e ho urjénsia.

Iha momentu ne’e kedan ekipa Operasaun konjunta, Kompostu hosi PNTL liuhosi Unidade Espesial Polísia (UEP), Batallão Ordém Públika (BOP), Komandu PNTL Munisipiu Viqueque ho membru FALINTIL Forsa Defeza Timor-Leste (F-FDTL), tun kedan iha terrenu hodi hola medida atuasaun no hakalma.

Maske nune’e, militante barak mak sente la satisfás nune’e sira hotu hakbesik bá iha PNTL Eskuadra Uatulari, husu no obriga membru PNTL sira pikéte hela atu halo investigasaun bá kazu ne’e ho lalaís.

Maibé, tanba ho profesionalizmu ne’ebé PNTL iha no hetan mós apoia seguransa hosi F-FDTL, konsege hakalma komunidade no militante sira ne’e, ikus mai sira deside fila-fali bá ida-idak ninia hela fatin.

“Sira mós komprende iha situasaun ida ne’ebá, ida-idak bele fila bá sira nia fatin, tanba de’it PNTL nia atuasaun di’ak, PNTL bele ko’alia bá sira ho profesionál, ho ida ne’e maka sira fila-fali bá sira-nia fatin,” Komandante Arnaldo informa.

Infelizmente, PNTL rasik seidauk identifika ka kaptura sidadaun ruma ne’ebé deskonfia sai autór prinsipál bá iha kazu insidente ne’e tanba kazu ne’e mosu, Polísia mós to’o tarde.

“Maibé, hakarak hateten katak, agora daudaun PNTL identifika hela ema sira ne’ebé mak hakarak estraga ita-nia festa demokrásia ida ne’e, liu-liu iha Viqueque. Polísia sei buka hatene liután, sé mak involve iha ne’ebá. Tanba iha momentu ne’ebá, ema barak tebtebes, no PNTL labele identifika ema ida-pur-ida. Ita hein katak, iha tempu badak, PNTL iha nia maneira halo nusá bele haree ida ne’e no bele rekolla informasaun kle’an tán kona-bá situasaun ida-ne’e,” Komandante Arnaldo hateten.

Vitima sira ne’e transporta ona bá Postu Saúde Uatulari Villa hodi hetan asisténsia médika.

Jornalista: Rogério Pereira Cárceres