Hatutan.com, (07 Maiu 2023), Aileu- Partidu Congresso Nasionál Reconstrução Timorense (CNRT) promete reforma setór  justisa no administrasaun públika hodi garante boa-governasaun no hatuur lolós justisa bá ema hotu hanesan.

Lee Mós : CNRT Fila Bá Ukun Implementa Hikas PEDN no Xanana Primeiru-Ministru

Partidu CNRT lideradu Komandante Em-Xefe FALINTIL, Kay Rala Xanana Gusmão promete hametin dezenvolvimentu ekonómia nasionál liu husi promove área produtividade no diversifikasaun ekonómika.

Partidu CNRT halo kampaña iha Munisípiu Aileu, Domingu (07/05/2023). Foto/Vito Salvadór

Bainhira povu fó fiar bá CNRT hodi Governa rai-ida ne’e iha tinan 2023-2028 hadi’a jestaun finansa públika, hadi’a transparénsia no akontabilidade, aselera no hadi’a implementasaun reforma fiskál no preserva ka haburas jestaun fundu petrolíferu.

Atu planu hirak ne’e hetan susesu, CNRT iha kompromisu polítiku oinsá atu hametin dezenvolvimentu ekonómika no halo reforma iha setór justisa no administrasaun públiku hodi garante implementasaun programa sira ne’ebé hatuur ona iha polítika partidu CNRT nian iha Planu Estratéjiku Dezenvolvimentu Nasionál (PEDN) ne’ebé sai hanesan matadalan ka sasukat atu bele esplora potensialidade sira ne’ebé munisípiu no postu administrativu sira iha territóriu nasionál iha.

Liuhosi kampaña polítika iha iha Kampu Futeból Munisípiu Aileu, Domingu (07/05/2023), prezidente Partidu CNRT, Kay Rala Xanana Gusmão, hateten CNRT iha nia programa rasik, sei haru’uk bá militante no simpatizante sira inklui apoiantes sira atu hatene saida mak CNRT sei halo iha períodu tinan lima mai bainhira povu fó fiar hodi ba kaer ukun.

CNRT nia programa sei kobre área hotu-hotu, hahú husi Edukasaun, Saúde, Agrikultura, Ekonomia, Administrasaun, Justisa sira seluk.

Programa sira ne’ebé CNRT iha sai hanesan sasukat ida atu povu iha desizaun hodi fó votu iha loron eleisaun, 21 fulan-Maiu 2023.

Xanana Gusmão fundamenta katak programa sira CNRT nian  ne’e mak halo povu sai na’in bá dezenvolvimentu nasionál no lori povu bá hetan moris di’ak.

“Programa sira ne’ebé partidu CNRT iha halo imi hatene tanbasá mak hili CNRT, no husi programa ne’ebé partidu CNRT iha mak imi mós hakarak ha’u ba kaer fila fali pasta Primeiru-Ministru, tamba ne’e ha’u sei bá atu servi imi hotu no lori rai ne’e lao bá oin,”  Xanana Gusmão bá militante sira CNRT sira ne’ebé halibur malu iha kampaña CNRT nian ne’e.

Prezidente Partidu CNRT ne’e hatutan atu povu hotu sente benefísiu husi ukun an, buat boot ida ne’ebé presiza ko’alia mak ekonomia. Povu barak, liuliu ferik no katuas sira halo sakrifísiu barak bá luta bá ukun an tamba ne’e tempu ona atu sira goza liuhosi diversifikasaun ekonómika ne’ebé lori benefísiu bá ema hotu.

Ko’alia kona-bá ekonomia maka ko’alia kona-bá hakbesik Governu mai povu ne’e mak desentralizasaun, katak iha kada munisípiu hanesan munisípiu Aileu iha nia Governu rasik, parlamentu rasik iha ne’ebé reprezentante povu ka deputadu mai husi postu administrativu sira hodi mai tuur iha Parlamentu iha munisípiu no sei servisu besik liu ho povu.

“Ita dehan lori Governu hakbesik ba povu ne’e tamba la’ós bá tuur atu simu de’it osan  no goza priviléjiu Estadu nian, maibé lao bá too iha área sira remota identifika povu nia situasaun moris lori mai iha governu munisipál atu buka solusaun,” Xanana esplika.

Koordenadór Partidu CNRT Munisípiu Aileu, Rogério Araújo Mendonça hateten, estrutura partidu CNRT iha Munisípiu Aileu husi nível munisípiu, postu administrativu too ba iha nurep no selcom hotu-hotu iha kompromisu ida atu servisu makas hodi lori Kay Rala Xanana Gusmão bá Primeiru-Ministru.

Nia afirma, CNRT iha programa rasik no iha kompromisu eleitorál ne’ebé halo bá militante no simpatizante iha Munisípiu Aileu mak reforma administrasaun Munisípiu Aileu.

Koordenadór munisípiu Aileu hatutan bá inan-aman no povu tomak iha Munisípiu Aileu ne’ebé sente sai hanesan vítima tamba ema seluk uza hodi atinje sira nia objetividade bá ukun tenke hamriik hamutuk ho CNRT hodi hadi;a no servisu hamutuk ba dezenvolvimentu iha Munisípiu Aileu.

Segundu Vise-Prezidente Partidu CNRT, Gil da Costa Monteiro Oan Soru hateten povu Aileu nia votu mak sei determina destinu jerasaun Aileu oan nian.

Nia afirma, povu Aileu nia votu vale bá rai ida-ne’e no povu ida-ne’e, no jerasaun futuru tamba povu nia dignidade lolós mak moris di’ak no moris iha dezenvolvimentu ekonómiku ida di’ak no ida ne’e sei akontese liu husi fó votu ba CNRT iha eleisaun parlamentár, 21 fulan-Maiu 2023.

Númeru eleitór iha Munisipiu Aileu ne’ebé mak Sekretariadu Tékniku Administrasaun Eleitorál (STAE) rejista atu partisipa iha eleisaun Parlamentár  hamutuk  34.962, mane 18.661  (53%) no feto 16.301 (47%). Eleitór sira ne’e kompostu hosi Postu Administravu Aileu-vila, 17.305, mane 9047 no feto 8258, Postu Administravu Laulara 4.640, mane 2.405 no feto 2.235, Postu Administravu Liquidoe 4.885, mane 2.878 no feto 2.007, Postu Administravu Remexio 8.132, mane 4.331 no feto 3.801.

Kampaña partidu CNRT ne’e hetan seguransa másimu husi Polísia Nasionál Timor-Leste (PNTL) no hetan mos observasaun direita husi órgaun eleitorál Comissão Nasionál das Eleições (CNE) no Provedór Direitu Humanus no Justisa (PDHJ).

Jornalista: Vito Salvadór