Hatutan.com, (18 Maiu 2023), Díli- Partidu Congresso Nasionál Reconstrução Timorense (CNRT) promete bainhira fila bá ukun sei hadi’a kualidade edukasaun no saúde inklusiva iha Timor-Leste atu bele hadia kresimentu rekursu umanu no kontribui bá dezenvolvimentu nasionál.

Lee Mós : Xanana Promete bá Povu Oé-Cusse: CNRT Sei Haree Fali Lei ho Lejizlasaun RAEOA Nian

Kampaña ikus partidu CNRT nian iha Tasi-Tolu, Díli, Kinta (18/5/2023). Foto/Elio dos Santos da Costa

Programa prinsipál sira ne’ebé CNRT aprezenta durante kampaña eleitorál tau Edukasaun no Saúde inklusiva iha prióridade númeru um ho intensaun atu hadia kresimentu rekursu umanus ne’ebé adekuadu iha sósiu-ekonómia, kulturál no sosiál hodi haburas no promove kualidade moris sidadaun sira nian atu bele ativu iha prosesu hotu-hotu bá dezenvolvimentu nasionál.

Prezidente partidu CNRT, Kay Rala Xanana Gusmão hateten, CNRT sei tau mós prioridade bá dezenvolve kapitál umanu, hadi’a kualidade no asesu bá ensinu, kualidade ensinu bá labarik no foin-sa’e sira, kualidade ensinu tékniku vokasionál hodi responde bá nesesidade merkadu traballu, hadi’a rekursus umanus hodi hasa’e kualidade ensinu hadi’a jestaun merenda eskolar atu promove nutrisaun, promove siénsia no teknolojia iha ensinu superiór no estabelese ho hakbiit sentru formasaun tékniku profisionál no sentru empregu atu fasilita foin-sa’e asesu bá servisu.

Xanana afirma hadi’a no habelar kualidade servisu saúde, asegura kualidade servisu saúde primária bá povu tomak iha área rurais, hadi’a prestasaun servisu saúde ospitalar ne’ebe iha kualidade iha área urbana, munisípiu no nasionál.

“Seitór edukasaun iha Timor-Leste sei hasoru problema boot iha kualidade ensinu. Saúde mós kontínua sai preokupasaun povu nian, tamba ne’e, CNRT iha kompromisu atu hadi’a. CNRT halo ona sorumutu ho reprezentate no reitor hosi universidade lubuk ida, liu-liu universidade privadu sira no halo ona diskusaun no tau ideia hamutuk hodi buka solusaun bá problema edukasaun no saúde iha Timor-Leste. Ita tenke hadia liu mak kualidade de ensinu hodi hatuur buat hotu tuir nia dalan atu bele prepara jerasaun foun hodi kaer nasaun nia destinu iha futuru,” Kay Rala Xanana Gusmão hato’o bá militante no simpatizante sira iha kampaña ikus partidu CNRT nian  ne’ebé hala’o iha Tasi-Tolu, Díli, Kinta (18/05/2023).

Xanana Gusmão hatutan, tempu too ona povu atu deside fila-fali liu hosi eleisaun parlamentár tinan ne’e, hodi hili partidu CNRT ne’ebé iha vizaun no misaun ho programa ne’ebé integra ho Planu Estratéjiku Dezenvolvimentu Nasionál (PEDN) hodi lori povu bá prosperidade.

CNRT iha kompromisu atu salva Estadu Direitu Demokrátiku hodi hatuur hikas orden bá kada órgaun soberania sira atu povu bele sente dezenvolvimentu.

Ai-leba sira ho entusiazmu hola parte iha kampaña partidu SNRT nian iha Tasi-Tolu, Díli, Kinta (18/5/2023). Foto/Elio dos Santos da Costa

Iha 2017 populasaun iha Timor-Leste kuaze 2% mak seidauk asesu bá eletrisidade no too ohin loron Governasaun ida ne’e, tuir Xanana, seidauk rezolve hotu, tan ne’e, CNRT promete bainhira fila bá ukun sei rezolve atu povu hotu-hotu bele asesu bá eletrisidade.

CNRT mós kontinua tau prióridade ba infraestrutura bazika liu-liu estrada ligasaun munisípiu bá postu administrativu to’o iha suku hotu no aldeia sira, atu bele, fasilita populasaun sira lori sira-nia produtu bá merkadu.

CNRT mós sei kontinua promove desportu, arte, no kultura bá foin-sa’e sira atu hotu-hotu partisipa iha atividade sira ne’ebé bele kontribui ba pás no estabilidade nasional.

“Ita sei halo esforsu atu implementa polítika desentralizasaun munisipál atu povu iha kada munisípiu iha asembleia rasik no iha reprezentante ne’ebé besik liubá povu no servisu di’ak liután bá povu nia interese no desenvolvimento bá rai-ne’e,” Xanana Gusmão dehan.

Prezidente Partidu CNRT ne’e subliña sei lori kadoras Greater Sunrise mai Timor-Leste atu ajuda ekonomia Timor-Leste nian.

Xanana Gusmão mós iha kompromisu polítika ho povu bainhira CNRT manan no bá ukun sei finaliza fronteira Terestre ho Indonézia tuir lei internasionál atu Timor-Leste bele esplora nia rikusoin sira hodi bele ba tau tan iha fundu petrolíféru.

Populasaun Munisípiu Díli ne’ebé orgaun Eleitorál Sekretariadu Tékniku Administrasaun Eleitorál (STAE) rejista atu partisipa iha eleisaun Parlamentár, tinan ida ne’e, hamutuk 187. 462, mane 98.529 (53%)  no feto 88.933 (47%).

Kampaña ikus partidu CNRT ne’ebé halo iha munisípiu Díli ne’e hetan seguransa másimu husi Polísia Nasionál Timor-Leste (PNTL) no hetan mos observasaun direita husi órgaun eleitorál Comissão Nasionál das Eleições (CNE), Provedoria dos Direitos Humanos e Justiça (PDHJ) no observadór Nasionál no Internasionál sira hanesan INDDICA, g7+ no mós sira seluk.

Jornalista: Vito Salvadór