Hatutan.com, (20 Maiu 2023), Díli— Prezidente Repúblika (PR), José Ramos-Horta konsidera implementasaun projetu Greater Sunrise tenke halais duni, maibé Greater Sunrise ne’e rasik labele sai nu’udár karau-inan hodi fó susu no taka polítiku sira-nia hahalok sala no iresponsável.

Konsiderasaun ne’e Ramos-Horta hato’o iha diskursu komemorasaun loron restaurasaun independénsia ba dala XXI, ne’ebé hala’o iha Palásiu Prezidensiál Bairru-Pité, Sábadu (20/05/2023).

Lee Mós: MPM Rekoñese Involvimentu Xanana Gusmão Iha Prosesu Dezenvolvimentu Greater Sunrise

Prezidente Repúblika (PR), José Ramos-Horta hala’o pas revista ba formatura, iha komemorasaun loron restaurasaun independénsia ba dala XXI, ne’ebé hala’o iha Palásiu Prezidensiál Bairru-Pité, Sábadu (20/05/2023). Foto/Elio dos Santos da Costa.

“Ita tenke la’o lalais liu kona-bá implementasaun projetu Greater Sunrise, maibé Greater Sunrise labele sai nu’udár karau-inan hodi fó susu no taka polítiku sira-nia hahalok sala no irresponsável,” Xefe Estadu, hateten.

Daudaun ne’e Timor-Leste (TL) klasifikadu nu’udár mizerável iha lista Banku Mundiál kona-bá tempu ne’ebé gasta atu aprova investimentu.

Tuir Horta, iha nasaun seluk hanesan Singapura no Vietnam, prosesu hosi A to’o Z hodi tama no sirkula dokumentu to’o aprova lori oras balun ka loron balun de’it.

“Iha Timor-Leste Instituisaun Estadu nian mak taka dalan, hapara investimentu. Lala’ok ne’e la’o hanesan kadiuk besik tinan ruanulu ona no la’o hanesan ne’e, Timor-Leste sei hetan estatutu mizerável ne’ebé so’e iha ‘lafatik foer’ nian, natoon hodi hala’o krime organizadu, violénsia no sei sai hanesan Estadu Falladu,” nia hateten.

Maibé, Xefe Estadu dehan la’ós atu sai hanesan ne’e tanba  Timor-Leste moris mai hosi mehi no hosi matebian sira sei bele hetan tutun aas iha Foho Ramelau no hateke tun no hale’u TL bele haree nasaun ida riku, ho ema moris ho ksolok, ho dame iha uma-ka’in no iha eskola, iha bairru no iha estrada, ho labarik no feto sira la tauk atu la’o bá-mai, no laiha violénsia doméstika, violénsia kontra labarik, hanesan moris ho Maromak nia bensaun ba família timór tomak.

Iha tinan sanulu nia laran tuirmai, Timor-Leste sei nakonu ho manu fuik hirak iha nia ai-laran, tasi ne’ebé ema la estraga ho foer, Natureza livre hosi plástiku no lixu la degradável, hatuur ekonomia ho enerjia moos no renovável.

Ho nune’e, asua’in sira no beiala sira hotu toba iha dame nia laran no povu sei moris ho ksolok.

Jornalista: Vito Salvadór