Hatutan.com, (23 maiu 2023), Díli—Missaun Observasaun Eleitorál (MOE) hosi Komunidade País Lian Portugés (CPLP) observa katak, eleisaun Parlamentár tinan 2023 iha Timor-Leste (TL), hala’o ho livre no transparente.

MOE CPLP lidera hosi Embaixadór, José Marcos Barrica, Repúblika Angola kompostu hosi observadór na’in 12 ne’ebé nomeia hosi Estadu-membru no hosi Sekretariadu Ezekutivu organizasaun nian marka prezensa iha Timor-Leste entre loron 15 to’o 24 fulan-maiu, hodi observa eleisaun Parlamentár 2023. Foto/Elio dos Santos da Costa.

Tanba ne’e, MOE CPLP kongratula autoridade sira hosi Repúblika Demokratika Timor-Leste ne’ebé hala’o eleisaun ne’e.

Lee Mós: Rezultadu Final STAE: CNRT Hetan Kadeira 31 no FRETILIN Kadeira 19

“MOE CPLP deskobre katak, Sentru votasaun sira-ne’e identifika duni no fásil atu assesível ba votante sira. Sira iha materiál no kondisaun ne’ebé apropriadu ba sira-nia funsionamentu hodi assegura segredu ba votasaun,” Embaixadór, José Marcos Barrica hateten liu hosi konferénsia imprensa ne’ebé hala’o iha Otél Novo Turizmu, Tersa (23/05/2023).

Tuir nia, prosedimentu abertura ne’e hala’o ho loloos, hanesan hatudu kaixa votasaun ne’ebé mamuk no sira-nia sinál, nune’e mós prosedimentu taka no sura ho inísiu no tempu taka votasaun nian ne’ebé nia marka hela iha fatin votasaun.

CPLP hala’o missaun observasaun ba Eleisaun Parlamentár iha Republika Demokratika Timor-Leste, ne’ebé hala’o iha loron 21 fulan-maiu tinan 2023.

MOE CPLP lidera hosi Embaixadór, José Marcos Barrica, Repúblika Angola kompostu hosi observadór na’in 12 ne’ebé nomeia hosi Estadu-membru no hosi Sekretariadu Ezekutivu organizasaun nian marka prezensa iha Timor-Leste entre loron 15 to’o 24 fulan-maiu.

Aleinde akompaña enseramentu kampaña hosi partidu polítiku sira, MOE hala’o sorumutu ho órgaun Administrasaun no Jestaun Eleitorál sira, hanesan Komisaun Nasional eleisaun (CNE) no Sekretariadu Tékniku Administrasaun Eleitorál (STAE) inklui promove sorumutu ho forsa Polítika oin-oin, hanesan sira ne’ebé iha kadeira Parlamentár, ho konfiansa ne’ebé sira hatudu kona-bá organizasaun eleisaun.

Ekipa lima, fahe ba Munisípiu sira iha Dili ekipa 2, Baucau, Ermera no Aileu ho ekipa 1, MOE observa Sentru votasaun 76, ne’ebé korresponde ba votante besik 143.775, besik 16% hosi eleitór ne’ebé rejistadu.

Iha Munisipiu sira iha Dili, Liquiça no Manatuto, MOE CPLP estabelese kolaborasaun ho ekipa observadór g7+, ne’ebé observa totál Sentru votasaun 81, korresponde ba votante 88.223 ne’ebé rejista ona, maizumenus 10% hosi eleitór ne’ebé iha.

Prosesu votasaun ne’e hala’o ho maneira ne’ebé ordenadu no organizadu, iha ambiente ne’ebé hakmatek.

Membru sira hosi kuadru sira-ne’e asegura ho imparsialidade no profisionalizmu, kumprimentu ba prosedimentu votasaun nian, nune’e mós klarifika eleitór sira no fó prioridade ba votante sira ho nesesidade espesiál.

 MOE CPLP haree iha mos númeru joven iha membrus Konsellu, no mós númeru feto ne’ebé aas, ne’ebé persentajen 48% iha fatin observasaun sira. Importante mós atu rejista dezempeñu ne’ebé loos ba forsa seguransa sira iha fatin votasaun.

Prezensa hosi Inspetór sira hosi Sentru votasaun hotu-hotu, ne’ebé tuir eleisaun hosi inisiu to’o ikus, inklui sura votus no dezenvolve minutu sira, ne’ebé hamutuk ho prezensa observadór internasionál no elementu Nasionál sira.

“MOE CPLP konsidera katak kualkér fallansu no omisaun ne’ebé akontese la afeta integridade prosesu eleitorál no sei la iha impaktu ba rezultadu sira. Iha sentidu ida-ne’e, MOE CPLP konsidera katak aktu eleitorál ne’e hala’o tuir prinsípiu demokrátiku no direitu Polítiku ne’ebé hakerek iha Konstituisaun Republika Demokratika Timor-Leste, tuir regra eleitorál nian,” nia subliña.

MOE CPLP kongratula autoridade sira hosi RDTL ne’ebé hala’o eleisaun livre no transparente, bazeia ba prosesu kredivel, ne’ebé permite partisipasaun sidadaun sira-nian iha prosesu Polítiku país nian.

MOE CPLP fó mós parabéns ba povu TL ba maneira Ezekutivu ne’ebé sira ezerse sira-nia direitu ba votasaun, kontribui ba haforsa demokrasia no Estadu direitu iha nasaun ne’e.

Jornalista: Vito Salvadór