Hatutan.com, (31 Maiu 2023), Díli- Ministru Obras Públika (MOP), Abel Pires, konsidera konstrusaun bá ponte foun Becusse, Díli, la’ós emerjénsia no Governu foun mak bele rezolve tuir prosesu normal.

Lee Mós : Dezeñu Ponte Foun Becusse Konkluídu no Entrega Ona bá ADN

Ekipamentu pezadu sira sobu ponte Becusse iha tempu ne’ebá maibé seidauk harii fali ponte foun no utiliza hela ponte provizóriu. Foto/Dok.Hatutan

Ministru Obras Públika, Abel Pires hateten, ponte sira ne’ebé Governu sobu tamba konsidera iha risku inundasaun bá komunidade sira tamba ne’e sobu bazeia ba avaliasaun tékniku ho razaun seluk mak ponte iha risku atu monu mesak tamba tuan liu ona.

Nia afirma agora atu halo preparasaun bá ponte foun tenke liu husi prosesu normal, iha ne’ebé Ajensia Dezenvolvimentu Nasionál (ADN)  tenke verifika depois mak avansa bá konstrusaun.

“Agora ne’e ponte Becusse temporáriu funsiona no lao diak hela ne’ebé laiha urjensia. Iha ne’ebá risku inundasaun laiha ona no populasaun sira nia movimentasaun no transporte mós lao diak hela ne’ebé prosesu la’o normal,” Ministru Abel Pires hateten hodi reponde  bá jornalista sira iha Palásiu Governu, Kuarta (31/05/2023).

Nia subliña kona-bá obra sira ne’ebé Governasaun da-ualu la konsege finaliza, Governu foun mai bele finaliza laiha problema. Tamba orsamentu bá konstrusaun ponte foun Becusse sei hein verifikasaun huoi parte ADN mak foin bele hatene nia montante ne’e hira.

Governante ne’e mos hatutan atinjimentu ne’ebé halo iha MOP durante asume responsabilidade nu’udár Ministru Obras Públika mak konsege finaliza estrada lubuk ida, halo tenderizasaun bá projetu bee-moos nian iha munisípiu lubuk ida, hanesan Baucau, Viqueque, Manufahi, Lautém no sei halo mós lansamentu bá estrada iha Munisípiu Bobonaro, konstrusaun estrada iha Laga no Baguia la’o dadauk, Letefoho nian lansa tiha ona no Hatu-Builico mai Ai-Tutu ADN verifika ona.

Primeiru-Ministru Taur Matan Ruak, hafoin hala’o tiha observasaun bá estragus sira hosi inundasaun ne’ebé akontese iha loron 04 fulan-Abríl 2021, fó instrusaun bá Vise Primeiru-Ministru no Ministériu Obras Públika atu sobu tiha ponte Becusse tanba la viável atu kontinua utiliza, tanba ponte refere sempre provoka inundasaun iha área Becusse no Taibesi nian bainhira udan-boot.

Desizaun ida-ne’e Xefe Governu foti bazeia bá lamentasaun no preokupasaun komunidade sira ne’ebé hela besik ponte refere, tanba dezde ponte ne’e harii, komunidade ne’ebé hela besik ponte ne’e sempre sai vitíma iha tempu udan-boot, tanba matéria sendimentasaun ne’ebé mota boot lori, bá belit hotu iha ponte riin ne’ebé harii ho tipu box six cells, nune’e mota dezvia fali bá komunidade sira-nia hela fatin.

Jornalista: Vito Salvadór