Hatutan.com, (05 Juñu 2023), Díli-Lideransa Troika FRETILIN nu’udár mós Segundu Jerasaun membru Komité Sentrál FRETILIN (CCF), Tito Critovão da Costa “Lere Anan Timur” deklara iha reuniaun alargada CCF nian iha Tower, Fatuhada, Díli, katak, nia mak fó informasaun bá José Agostinho Sequeira “Somotxo” kona-bá planu atu halo demisaun hasoru Somotxo, Rui Maria de Araújo, Luis Lobato ho Osório Florindo.

Lee Mós : FRETILIN Halo Enkontru Reflesaun Maratona no Rekoñese Derrota iha ElPar 2023

Tenente Jenerál (reformadu), Tito Cristóvão da Costa “Lere Anan Timur”. Foto/Elio dos Santos da Costa

Iha enkontru lideransa troika ho membru CCF no kuadru importante sira partidu FRETILIN nian iha salaun Tower, Fatuhada, Díli, Domingu (4/6/2023), lideransa troika ka komisaun organizadora bá enkontru ne’e la konvida Somotxo, maibé nia marka prezensa tanba simu konvite direta hosi Lideransa Troika FRETILIN, Lere Anan Timur.

Iha enkontru ne’ebé prezide hosi lideransa Troika FRETILIN, Marí Alkatiri, Francisco Guterres “Lú Olo” no Lere Anan Timur, la koalia ajenda kona-bá planu atu halo demisaun bá militante na’i-4 ne’e, maibé Lere pronunsia katak nia duni mak fó informasaun bá Somotxo no husu Somotxo mós partisipa iha reuniaun ne’e atu bele inteira planu sira iha relasaun atu halo demisaun bá sira.

Iha reuniaun ne’e Lere Anan Timur deklara katak José Agostinho Sequeira “Somotxo” nia kontribuisaun bá FRETILIN dezde luta libertasaun nasionál, boot liu membru CCF sira seluk.

Biban ne’e, José Agostinho Sequeira “Somotxo” hateten, tuir loloos, nia laiha ona direitu atu partisipa iha reuniaun nível konsellu polítiku no membru ativu CFF nian ne’e, tanba nia rasik, oras ne’e, hanesan ona eis membru CCF no militante baibain. Maibé, tanba konvida hosi lideransa Troika FRETILIN, Lere Anan Timur, katak, nia (Somotxo) tenke partisipa mós iha reuniaun ne’e, tanba ninia kontribuisaun bá partidu FRETILIN hahú kedan prosesu luta ukun-rasik aan mai to’o ohin loron, boot liu membru CCF sira seluk.

“Ohin, troika hanesan halo sensura oitoan. Sensura signifika dehan katak, sé mak fó informasaun. Entaun, Jenerál Lere  Anan Timur, ohin, koalia, ha’u! ha’u maka fó informasaun informasaun bá Somotxo, no ha’u mak bolu nia mai partisipa iha reuniaun ne’e, tanba kamarada sira ne’ebé tuur iha ne’e, ninia sakrifísiu la’ós hanesan Somotxo. No ha’u hatete bá nia, para labele sai hosi FRETILIN, tanba nia tenke hanoin ninia maluk sira mate ne’e, ho ninia família ne’ebé mós mete-mohu bá defende FRETILIN no defende ukun rasik aan,” José Agostinho Sequeira “Somotxo” haktuir mensajen Lere Anan Timur nian bá jornalista sira.

“Jenerál Lere Anan Timur publikamente ko’alia ida-ne’e, mno ha’u koalia nafatin ida ne’e, iha ha’u nia pozisaun,” tenik Somotxo.

La Diskute Kona-bá Demisaun

Eis Membru CCF, José Agostinho Sequeira Somotxo. Foto/Elio dos Santos da Costa

Iha Sábadu (03/06/2023), haleu tuku 16:00 lokraik Otl  to’o tuku 19:00 kalan Otl, lideransa sira Troika FRETILIN nian, kompostu hosi prezidente troika no atuál Sekretáriu jerál Mari Alkatiri, prezidente Francisco Guterres “Lú-Olo”, no Lere Anan Timur, hanesan membru Segunda Jerasaun CCF halo enkontru ida.

Iha informasaun katak, rezultadu hosi sorumutuk ne’e katak, CCF planeadu atu demite ka hasai eis membru CCF na’in-haat mak hanesan, Luis Lobato, José Agostinho Sequeira “Somotxo”, Rui Maria de Araújo ho Osorio Florindo. Ho nune’e, iha kalan haleu tuku 22:00 Otl, eis membru CCF na’in-haat ne’e, halo kedan konferénsia imprénsa liuhosi média, hodi fó reajen no ho sira-nia pozisaun bá desizaun ne’ebé atu mosu bá sira. 

Desizaun atu atu halo demisaun bá eis membru CCF no militante nain-haat ne’e la konsege, (karik muda bá tempu seluk), tanba iha reuniaun traballu ne’ebé hala’o iha Domingu (04/03/2023), CCF hala’o de’it avaliasaun sira kona-bá eleisaun parlamentár foin lalais.

“Loloos, ohin ne’e, akontese. Depende ami nia sala. Ami nia sala ne’e to’o ona iha ne’ebé? Maibé, kala seidauk haree sala ne’e, atu pecat, ka atu expulsa hosi partidu ne’e mak seidauk. Rezolusaun seidauk sai. Ne’ebé, ami hein, ami sei halo tán, halo tán, depois fali ami nian sala ne’e boot ona para pecat, kala sira pecat ona,” Somotxo haktuir .

Somotxo dehan, sé desizaun bá demisaun ka espulsaun ne’e mak ohin akontese duni, sente katak, nia mós sai vítima ida, tanba hetan expulse hosi CCF. Maibé, nia la hatene objetivu loloos, no hanesan militante sente mós dúvida, tanba militante de’it mós bele espulsu.

Durante avaliasaun kona-bá rezultadu eleisaun parlamentár 2023 nian bá FRETILIN nia “derrota” ne’e, Somotxo kontínua aprezenta sira-ninia proposta tolu nu’udár ezijénsia bá lideransa atuál maka, husu atu halo auto-demisaun (rezigna aan rasik), halo kongressu extra-ordináriu, no eleisaun direta. Maibé, atuál deputadu FRETILIN  iha kinta-lejislatura ne’e mós dehan, sé de’it mak eleitu ka eleje hosi kongresu, ka atu foti de’it mós, ohin kedan, sira tenke kontra, tanba Somotxo haree katak, sira-nia objetivu foti malu ka eleje malu atu lidera ne’e, manán. Maib’e, sé la manán, konserteza, sira-nia ekipa prevee tiha ona.

“Ami prevee uluk kedas, para atu troka lideransa. Ne’e mak ha’u dehan bebeik katak, lideransa atuál, la’os alternativu para fó vitória FRETILIN nian. Akontese mós, ita seidauk komprende. Ne’ebé, ami sei kaer nafatin ida ne’e, ami nia liafuan ho derrota FRETILIN ninian. Ida ne’e, hanesan buat ida ke ema nein, tilun diuk hotu. Tán ida ne’e maka, la’ós fásil bá ami, nein fásil bá sira,” Somotxo hateten.

CCF Hatán bá Somotxo ho nia Grupu

Membru CCF, José Manuel “Nakfilak”. Foto/Elio dos Santos da Costa

Portavós no atuál membru ativu CCF, José Manuel “Nakfilak” hatán, partidu boot hanesan FRETILIN hatene oinsá mak atu fó solusaun bá nia problema rasik. Tanba ne’e, reuniaun CCF nian  ne’e nu’udár reuniaun traballu.

José Manul Nakfilan informa katak reuniaun ne’e la koalia kona-bá prosesu demisaun bá eis membru CCF nain-haat tanba ne’e, la’ós órgaun, la halo deliberasaun ida.

“Ami ohin la diskute kona-bá ida ne’e. Imi rona solusaun saida?. Organizasaun iha nia regras, iha nia estatutu, iha nia rejimentu, iha buat lubuk ida  tenke konsidera. La’ós ema ida to’o mai reklama, seluk mai reklama, bainrua, seluk mai husu tán, depois, ita tenke responde. Regras iha para ita la’o,” José Manuel Nakafilak hateten

José Manuel Nakfilak dehan, partidu nia laran mosu ideia kontroversial ne’e normál. Ne’e demokrásia. Horibainhira mak organizasaun boot ida, laiha diverjénsias no opinioens. Ne’e dinámiku organizasaun nian.

Membru CCF ne’e mós konsidera deklarasaun hirak hato’o hosi eis membru CCF nain-haat liuhosi konferénsia imprénsa iha fatfatin, ne’e, ‘ilegál’, tanba fatin loloos atu halo kontestasaun ruma ne’e iha Sede CCF, Comoro-Díli.

“Klaru! Partidu iha nia sede ka lae. Imi bá haree took, kuandu partidu rejistu ne’e, tau iha ne’ebé. Sede nasionál iha ne’ebé?, iha Otél, iha restaurante, iha kampu futeból, iha ne’ebé? Sede ninian iha komite sentrál ne’ebá, iha Comoro. Fatin iha. Okey. Ne’e mak ohin ha’u dehan, organizasaun iha nia regras, iha nia prinsípius, iha nia estatu para atu lori ita,” José Manuel “Nakfilak” afirma tan.

Jornalista: Rogério Pereira Cárceres