Hatutan.com, (23 Juñu 2023), Díli—Parlamentu Nasionál (PN) VI Lejislatura, kompleta ona estrutura meza atu bele lidera diskusaun sira plenária durante mandatu hahú 2023 to’o 2028.

Kompozisaun meza Parlamentu Nasionál VI Lejislatura, Segunda (26/06/2023). Foto/Elio dos Santos da Costa.

Estrutura meza PN ida-ne’e lidera maioria hosi bankada Congresso Nacional de Reconstrucção Timorense (CNRT).

Lee Mós: Estrutura Governu Da-Sia Involve Ema Besik 50

Baze bá artigu 19, eleisaun bá vise sira Prezidente PN nian, Sekretáriu, Vise-Sekretáriu bá rejimentu Parlamentu Nasionál nian.

Iha sesaun daruak, plenária PN VI Lejislatura ne’e, meza hahú kedan anúnsia lista sira kandidatura nian bá kompozisaun meza PN mak hanesan, Vise PPN 1 deputada Maria Terezinha da Silva Viegas (CNRT), Vise 2 deputadu Alexandrino Afonso Nunes (PD), Sekretária Meza Virgínia Ana Belo (CNRT), Vise 1 Maria Tereza da Silva Guterres (PD) no Vise 2 Bendita Moniz Magno (CNRT).

Hafoin anunsia kandidatu sira ne’e, hosi meza orienta kedan bá prosesu votasaun, hodi hili kompozisaun meza PN nian.

Nune’e, rezultadu votasaun bá kandidatura sira ne’e ho votus a-favór 43, abstensaun 20, nulu 1,  la vota 1 hosi bankada FRETILIN maka Deputadu António Klau.

“Obrigadu bá señores deputadus ba ita-nia votasaun, téknikus sira no ha’u hetan ona rezultadu votasaun nian. Ita iha votus a-favór 43, abstensaun 20, votus nulus 1. Nain 64  ezersér sira-nia votasaun, ida la vota, maibé, buletim votu nian foti iha ne’e. Ho razaun ida ne’e, katak, ita-nia votasaun remata no meza eleita ona,” Prezidente Parlamentu Nasionál (PPN), Maria Fernanda Lay deklara rezultadu votasaun iha plenária PN, Segunda (26/06/2023).

Ho rezultadu ne’e, PPN Frenanda Lay, konvida kedan deputada sira ne’ebé eleita ona, atu sa’e kedan ona bá tuur iha sira-ninia fatin, hodi kompleta meza PN nian, atu bele fahe servisu, tanba servisu barak mak sira tenke halo.

Iha biban ne’e, Maria Fernanda Lay husu bá deputadu sira iha bankada Parlamentár nian ne’ebé tenke aviza tuir artigu 11, númeru 2, katak, aprezenta pur-eskrítu hodi indika sira-ninia deputadu sira ne’ebé sei kompoen bankada, bá prezidente ida, vise prezidente rua.

“Husu atu ita-boot sira hato’o antes do fim do dia. Tanba ita iha possível atu konvoka konferénsia dos lideres bankadas, hodi haree atividades lubuk ida ne’ebé ita sei hala’o tuir mai,” Fenanda Lay hateten.

Jornalista: Rogério Pereira Cárceres