Hatutan.com, (12 Jullu 2023), Díli-Komandu Jerál Polísia Nasionál Timor-Leste (PNTL), Kuarta (12/07/2023), ofisialmente nomeia Superintendente-Xefe Orlando Gomes, lidera PNTL Munisípiu Díli hodi troka Superintendente-Xefe Natércia Eufrasia Soares Martins.

Lee Mós : Komandu PNTL Nomeia Superintendente Xefe Natércia Martins Lidera Munisípiu Díli

Superintendente-Xefe Natércia Eufrasia Soares Martins ho Superintendente-Xefe Orlando Gomes. Foto/Média PNTL

Biban hanesan Komandu Jerál PNTL nomeia mós Superintendente Xefe Natércia Eufrásia Soares  Martins, komanda hikas servisu  administrasaun iha kuartel jerál PNTL.

Nomeasaun sira ne’e  bazeia bá despaixu hosi Gabinéte Komandu jerál, númeru 241/CG-PNTL/VII/2023, hodi nomeia Superintendente Xefe Orlando Gomes, bá kargu Komandante Munisipiu Dili no despaixu númeru 240/CG-PNTL/VII/2023 nomeia Superintendente Xefe Natercia Eufrasia Soares Martins  bá kargu Komandante Administrasaun Jerál PNTL.

Molok ne’e, iha Kuarta 28 fulan-Dezembru 2022, Polísia Nasionál Timor-Leste (PNTL), liuhosi Komandu Jerál nomeia Superintendente Xefe, Natércia Eufrásia Soares Martins, hodi lidera komandu Munisípiu Díli.

Komandante foun bá PNTL Munisípiu Díli, Superintendente Xefe Orlando Gomes dehan, nia ho protidaun hodi simu konfiansa hosi ninia komandu atu hala’o funsaun ho responsabilidade tomak, nune’e bele lidera fali munisípiu ne’ebé ho nia kompleksidade boot.

“Ha’u simu kna’ar foun ne’e atu sai hanesan responsábilidade bo’ot bá Munisípiu Dili, ha’u iha planu ida bá Munisípiu Dili atu servisu hamutuk ho ita lider sira iha Munisípiu Díli ho ita-nia komunidade sira liu-liu joven sira inklui mós ita-nia veteranu sira atu fó ita-hotu nia kontribuisaun hodi kontribui bá Munisípiu Díli,” Superintendente Xefe  Orlando Gomes hateten.

Komandante sesante Unidade Espesial Polísia ne’e dehan, nia bá atu lidera komandu Díli, no sei haree buat sira ne’ebé atu hadi’a, tenke hadi’a, hodi mellora liután servisu sira, liu-liu asegura pás no estabilidade iha kapitál nasaun.

Superintendente-Xefe Orlando Gomes. Foto/Média PNTL

“Ita hotu-hotu servisu hamutuk kapitál Dili ne’e bele hakmetek no ita sei kontínua hasa’e volume no ita sei iha trasa operasaun bá iha Díli laran ita servisu hakas aan sé uainhira ita hadomi ita-nia rain ita tenke esforsu maka’as,atu nune’e, ita bele garantia situasaun hakmetek,” Orlando hateten.

Komandante Orlando Gomes, orienta ona mós bá komandante operasionál Munisípiu Dili,  atu trasa planu ruma oinsá mak bele hasa’e liután volume operasaun iha fatin risku sira. Operasaun sira iha área jurisdikasaun Dili nian, sei hetan apoiu másimu hosi Unidade Espesiál Polísia (UEP), Unidade Patrullamentu Marítima (UPM), Unidade  Patrollamentu Fronteira (UPF).

Komandu Jerál PNTL mós  nomeia ona Superintendente-Asistente Domingos Gregório Soares, bá kargu Komandante Munisipiu Manatuto. Superintendente Damião da Silva Correia, bá kargu komandante Interinu iha Unidade Espesial Polisia (UEP).

Superintendente Asistente Silvério de Araújo, bá kargu Segundu Komandante Interinu iha Unidade Espesial Polisia (UEP). Inspetór-Xefe Zeca da Costa Mouzinho, bá kargu Komandante Interinu iha Batalhão de Manutencão e Ordém Públika.

Xefe Departamentu Tránzitu nian no Seguransa Rodoviária, sei lidera hosi Superintendente-Asistente Luis da Costa, Superintente-Asistente Basílio de Jesus, bá kargu Segundu Komandante CFP, no Superintendente João Belo dos Reis, bá Xefe Departamentu Investigasaun Kriminál (DIK).

Nomeia ona mós Superintendente Polisia Calisto Gonzaga bá kargu Komandante Munisipiu Covalima, no Superintendente João da Costa, bá kargu Komandante Munisipiu Viqueque.

Jornalista: Rogério Pereira Cárceres