Hatutan.com, (14 Jullu 2023), Díli-Iha mandatu IX Governu Konstitusionál períodu 2023-2028, Ministériu Interiór (MI) prioritiza hadi’a infra-estrutura sira iha Polísia Nasionál Timor-Leste (PNTL) no promete mós hadi’a prestasaun servisu membru sira PNTL nian bá atendimentu públiku.

Lee Mós : Komandu Jerál PNTL Nomeia Orlando Gomes Troka Natércia Soares Lidera Díli

Ministru Interiór, Francisco da Costa Guterres. Foto/Elio dos Santos da Costa

Ministru Interiór (MI), Francisco da Costa Guterres, hafoin halo vizita no halo mós sorumutu tékniku ho komandante jerál PNTL, Komisáriu Henrique da Costa no Segundu komandante, Komisáriu Pedro da Costa Belo, inklui Ofisial Superior sira seluk iha Kuartel Komandu Jerál PNTL, Sesta (14/07/2023),  hateten  nia parte haree ona infra-estruturas, kestaun ekipamentu sira, transporte presiza tebes atensaun.

Liuhosi sorumutuk Iha sorumutu ne’e, Ministru Francisco Guterres levante mós kestaun sira balu, oinsá mak atu bele hadi’a di’ak liután prestasaun sira iha servisu polísia nian, atu bele hala’o atendimentu públiku ho di’ak.

“Ida fali, oinsá polísia mós bele kria mekanizmu para atu haforsa instituisaun manutensaun bá pás iha Timor-Leste laran tomak, inklui mós Díli,” Ministru Francisco Guterres hateten.

Governu liuhosi Ministériu Interiór, sei haree mós kona-bá vensimentu bá membru PNTL sira, tanba durante ne’e sira halo servisu ne’ebé mak maka’as iha terrenu, maibé, sira-ninia vensimentu, dala-ruma la ajuda nesesidade família nian.

“Ita sei haree hotu. Tanba iha revizaun totál bá sira-nia karreira, sira-nia rejíme salárial para depois atu sira bele dezempeña sira-nia papél ne’e ho di’ak liután,” Governante ne’e promete.

 Dignifikasaun Membru PNTL Reformadu Na’in-158

Iha loron 01 fulan-Juñu 2023, iha seremónia posse bá membru foun sira IX Governu Konstitusionál nian, Primeiru Ministru José Alexandre Kay Rala Xanana Gusmão,  deklara atu haree fali lalais prosesu legál bá aprezentasaun forsada, ne’ebé afeta ajentes PNTL barak tebes, númeru reformadu ema na’in-158.

Ho kompromísiu ida ne’e, iha deklarasaun Ministru Francisco Guterres nian mós afirma katak, IX Governu Konstitusionál sei dignifika membru reformadu sira ne’e. Tanba ne’e, Governu sei halo uluk revizaun bá lei no estatutu sira iha PNTL.

“Kuandu ita halo ona revizaun bá estatutu, revizaun bá lei sira ne’e, katak, inklui ida ne’e hotu ona. Revee hotu. Ne’e mak dehan ita atu revee fila-fali diploma legais barak atu tenke tuir kondisaun servisu sirs,” Francisco Guterres hateten.

Governasaun IX Governu Konstituisionál ne’e mós iha planu 2024  halo preparasaun bá rekrutamentu membru PNTL foun sira no hahú lansamentu fatuk dahuluk bá harii edifísiu Kuartel Jerál foun.

“Iha tinan ne’e nia laran, ita rezolve hotu nia mekanizmu hotu, nia prosesu hotu, 2024, ita bele tama ona iha prosesu nia laran bá konstrusaun nian, sira-nia kuartel,” Ministru Francisco Guterres hateten.

Jornalista: Rogério Pereira Cárceres