Hatuta.com, (15 Novembru 2023), Díli– Rekrutamentu bá funsionáriu kazuál hamutuk na’in-157 ne’ebé atu koloka iha diresaun  foun  ne’ebé atu hamosu iha Ministériu Interiór (MI) la kumpre bá rekizitu legal sira prosesu rekrutamentu forsa traballu iha instituisaun Estadu nian.

Rekrutamentu ne’e la obedese bá prinsípiu boa governasaun no deskonfia nakonu ho pratika nepotizmu tanba “bolu de’it” kompañeru sira hosi partidu CNRT.

Funsionáriu kazuál MI nian halibur iha arredór MI nian atu transporta bá tuir formasuan iha Ritabou, Postu Administrativu Maliana, Munisípiu Bobonaro, 15 Novembru 2023. Foto/Supply

Iha rejime jerál  funsaun públiku ka estatutu funsaun públiku  kona-bá rekrutamentu forsa traballu.  Informasaun ne’ebé iha katak instituisaun Estadu ida-idak   bele uza beins servisu  halo rekrutamentu ne’ebé la presiza Funsaun Públiku, maibé pratika komún   tenke halo anúnsiu bá públiku liuhosi órgaun komunikasaun sosiál sira ne’ebé eziste, inklui portal  ka sítiu eletróniku kada ministériu nian.

Rekrutamentu ne’e tenke refleta bá Planu Asaun Anuál (PAA) hodi aloka  nia orsamentu hafoin bele halo anúnsiu públiku bá rekrutamentu. Maibé, informasaun ne’ebé Hatutan.com asesu hosi fontes oioin, katak prosesu tomak rekrutamentu ne’e la halo anúnsiu públiku, maibé derrepente de’it pesoál sira ne’ebé selesionadu nia naran taka ona iha kuadru avizu Ministériu Interiór nian.

Iha mós informasaun katak membru Parlamentu Nasionál ida hosi Bankada CNRT (fontes informasaun ne’e  la temi Deputadu/a ne’e nia identidade) mak halo selesaun, halo kontaktu  via telefónika pesoál no halo entrevista bá hirak ne’ebé nia naran publika iha kuadru avizu.

Prosesu ne’e laiha transparénsia no la refleta bá prosedimentu boa governasaun, tanba derrepente de’it ema nia naran taka sai iha kuadru avizu no hirak ne’ebé selesionadu telefone direta hodi prepara aan tuir formasaun iha formasaun iha Ritabou, Postu Administrativu Malina, Munisípiu Bobonaro.

Informasaun ne’ebé Hatutan.com rekolla hosi fontes balun ne’ebé pertense iha prosesu rekrutamentu ne’e no husu atu la públika nia identidade, inklui fontes balun ne’ebé liu selesionadu prosesu rekrutamentu ne’e hateten, pesoál kazuál na’in-300 ne’e, inklui nia an rekruta no tuir formasaun atu koloka iha Diresaun Nasionál Apoiu Prevensaun Konflitu (DNAPC, sigla portugés).

Kuarta dadeer (15/11/2023), funsionáriu kazuál  na’in-300 ne’e transporta ona bá Ritabou, Postu Administrativu Maliana, Munisípiu Bobonaro hodi partisipa iha formasaun durante fulan ida. Sira ne’ebé selesionadu ho espíritu partidária (kampanáriu CNRT-red)  ne’e asina tiha ona termu kontratu iha fulan-Novembru 2023.

Funsionáriu kazuál MI nian halibur iha arredór MI nian atu transporta bá tuir formasuan iha Ritabou, Postu Administrativu Maliana, Munisípiu Bobonaro, 15 Novembru 2023. Foto/Supply

Liga ho informasaun sira deskonfia ne’e, Hatutan.com halo konfirmasaun ho Ministru Interiór (MI), Francisco da Costa Guterres,  iha Paládiu Governu, Kuarta (15/11/2023), hateten pesoál hirak  ne’e kazuál hodi tuir formasaun iha Rairobo kona-bá mediasaun nian, oinsa atu tulun polísia sira iha komunidade nia-leet.

“Ha’u la halo rekrutamentu foun, se halo rekrutamentu foun ha’u tenke prosesa tuir dalan legal tenke liu husi Funsaun Públika, ne’e kazuál sira bá pás estabildiade iha postu sira, tanba ne’e maka antes haruka sira bá postu sira tenke prepara aan, atu nune’e,  bele komprende saída maka mediasaun, sira ne’e kazuais tanba ne’e lapersija bá Funsaun Públiku atu halo rekrutamentu,”  Ministru Francisco da Costa Guterres, responde Hatutan.com hafoin partisipa reuniaun Konsellu Minsitru sira-nian.

Ministru Francisco Guterres esklarese katak formasaun ne’e importante atu muda sira-nia mentalidade sai di’ak liután, hodi bele ba ajuda polísia sira, komunidade atu kria pás no establidade iha komunidade nia-leet nune’e kontibui dezenvolimentu di’ak iha Estadu ne’e nia laran. 

“Ami halo intervista ne’e la’ós haree bá kór partidu, ami buka mediadór ne’ebé mai ho kapasidade para tuir treinu, tanba so uluk maka tenke ba jura maybe agora ne’e lae, o hatene o intende o iha koñesimentu maka ba,” Ministru Francisco Guterres afirma.

Kazuál sira ne’ebé maka Governu prepara atu bá halo mediasaun sai mediadór hodi ajuda komunidade iha kada postu, ajuda polísia no lider komunitáriu sira hodi rezolve problema. Ne’ebé kazuál sira-ne’e hamutuk ema-157.

Jornalista: Gloria Maia