Hatutan.com, (17 Jullu 2023), Díli-Ekipa konjunta kompostu hosi Polísia Nasionál Timor-Leste (PNTL), Departamentu Investigasaun Kriminál (DIK), Servisu Informasaun Militár (J2), Servisu Informasaun Polísia (SIP) inklui Autoridade Aduaneira (Alfándega) ho Unidade Anti Fraúde,  halo apreensaun bá sigarru ilegál ne’ebé hatama hosi Atambua, Timor Osidentál, Indonézia.

Lee Mós : Timor Leste Gagalkan Pengiriman 6,8 Ton Pupuk Ilegal

Autoridade sira halo apreensaun bá sigarru ilegál ne’ebé hatama hosi Atambua, Timor Osidentál, Segunda (17/07/2023). Foto/Elio dos Santos da Costa

Sigarru marka Surya 12 ho kuantidade sloop 21, tabaku pohon sagu ne’ebé tau hamutuk iha saku ualu (8) nia laran ne’e hatama hosi suspeitu na’in-tolu (3) ho inisiál MI, RS ho JPB. Ekipa konjunta sira halo apreensaun bá sasán ilísitu hirak ne’e, Segunda (17/07/2023), tuku 14:00 Otl, iha área Portu Tibar, Suku Tibar, Postu Administrativu Bazartete, Munisípiu Liquiça.

Diretór Nasionál bá Komformidade iha Alfándega, Ivo Gomes hateten razaun sira halo apreensaun bá sasán sira-ne’e tanba kategória hanesan merkadória Ilisitu. Ida ne’e, sentidu katak, sasán ne’ebé tama no sai laiha autorizasaun hosi autoridade.

Ekipa konjunta sira-ninian atuasaun ne’e baze bá Dekretu-Lei númeru 14/2016, kona-bá Rejíme Kontrolu Tabaku iha artigu 8, 9 to’o 10.

Ivo Gomes hatutan, importadór sé de’it mak atu halo importasaun sigarru mai Timor-Leste, tenke  hetan autorizasaun hosi Ministériu Saúde. Ninia nikotina, tenke menus hosi  miligrama 1, karbono monóxide tenke menus hosi  miligrama 10, ninia TAR tenke menus hosi miligrama 10.

“Sigarru sira-ne’e, la prienxe rekezitu, ami kategória hanesan sasán kontra bandu. Sasán sira ne’e, parte hosi área Batugade mak mai. Sira ne’e sasán hanesan kontra-bandu, lori tama mai Díli, kuandu seguransa la deteta, sira bele fa’an fali iha estrada, loja ki’ik-oan sira ne’e. Ida-ne’e, merkadória kontra-bandu, lei la autoriza,” Ivo Gomes hateten tán.

Oras ne’e dadaun, evidénsia hirak ne’e, entrega ona Ekipa Investigasaun Kriminál PNTL hodi halo identifikasaun. Nune’e bainhira konklui tiha prosesu ne’e entrega bá Ministériu Públiku (MP) atu halo análiza, no hodi prosesa tuir lei ne’ebé vigora.

Jornalista: Rogério Pereira Cárceres