Hatutan.com, (16 Agostu 2023), Díli—Prezidente Parlamentu Nasionál (PPN), Maria Fernanda Lay, sei reprezenta Xefe Estadu, José Ramos-Horta hodi partisipa iha reuniaun organizasaun internasionál Comunidade Pízes sira ne’ebé ko’alia Lian Portugés (CPLP) ne’ebé sei realiza iha São Tomé e Príncipe hahú hosi loron 21 to’o 24 fulan Agostu 2023.

Prezidente Parlamentu Nasionál (PPN), Maria Fernanda Lay hala’o enkontru regulár ho Prezidente Repúblika (PR), José Ramos-Horta, iha Palásiu Prezidensiál Bairru-Pité, Kuarta (16/08/2023). Foto: Elio dos Santos da Costa.

Tanba ne’e, Maria Fernanda Lay konsulta ho Xefe Estadu kona-bá ajenda ne’ebé mak sei ko’alia durante enkontru ne’e.

Lee Mós: PPN Aniceto Guterres Partisipa Abertura Sesaun Solene XI Asembleia Parlamentár-CPLP

“Ha’u husu Xefe Estadu tanba iha desizaun ne’ebé tenke foti durante reuniaun iha CPLP. Sira husu ita sai hanesan uma-na’in bá CPLP iha 2025-2027. Ne’ebé, ha’u husu autorizasaun Xefe Estadu. Maibé Xefe Estadu la aseita tanba ita mós sei tama bá ASEAN iha 2025,” Maria Fernanda Lay hateten hafoin enkontru ho Ramos-Horta iha Palásiu Prezidensiál Nicolau Lobato, Kuarta (16/08/2023).

Prezidente PN sei hato’o durante reuniaun CPLP katak, Timor Leste labele aseita atividade internasionál rua dala ida de’it.

“CPLP dala ruma ita sei adi’a bá tinan rua seluk mai no ita sei simu uluk mak ASEAN ninian iha tinan 2025,” nia subliña.

CPLP estabelese iha 17 Jullu 1996 hosi nasaun fundadór sira mak hanesan Angola, Brasil, Cabo Verde, Guiné-Bissau, Moçambique, Portugal no São Tomé e Príncipe.

Iha tinan 2002, depois de konkista independénsia, Timor-Leste  akollidu hanesan nasaun integrante.

Tanba ne’e, Estadu membru CPLP mak hanesan, nasaun Angola, Brazil, Cabo Verde, Guiné-Bissau, Guiné Equatorial, Moçambique, Portugal, São Tomé e Príncipe no Timor-Leste.

CPLP hanesan organizasaun internasionál ida ne’ebé formada hosi nasaun sira Luzófonu ho objetivu atu  halo aprofundamentu bá amizade mútua no Kooperasaun entre ninia nasaun  membru sira.

CPLP ninia sede iha Lisboa, Portugal, ho nia atuál Eekretáriu Ezekutivu maka  Zacarias da Costa, hosi Timor-Leste; no Armindo Brito Fernandes, hosi São Tomé e Príncipe, hansan Diretór-Jerál.

Jornalista: Vito Salvadór