Hatutan.com, (30 Agostu 2023), Díli- Primeiru-Ministru (PM), Kay Rala Xanana Gusmão, deklara katak iha 30 Agostu 1999 povu hili ona ukun rasik an no oras ne’e povu hili IX Governu Konstitusionál hodi fo hikas konfiansa no responsabilidade bo’ot atu servi nasaun ho domin no defende povu nia interese.

Lee Mós: Xanana Promete CNRT Ukun Halo Buat Rua bá Nasaun ho Povu

Primeiru Ministru, Xanana Gusmão. Foto/Elio dos Santos da Costa

Xanana Gusmão hateten lia-hirak ne’e bainhira partisipa iha misa agradesimentu bá selebrasaun loron Konsulta Popular (REFENDUM) bá da-24 (30 Agostu 1999-30 Agostu 2023) iha igreja parokia Imakulada Conceição, Balide, Díli.

Xanana hateten, Timor-oan hotu tenke agradese bá Maromak, bá loron diak ida-ne’e, fó hanoin fali mai Timor-oan  tinan hirak liubá povu ho korajen no barani tebes bele hasoru problema no dezafius, barak mak mate, kanek, terus maibé ho hakarak lolos deit bá ukun rasik an.

Advertisement

“Povu hili tiha ukun an iha 1999 no foin lalais liu husi eleisaun povu hili ita atu fó hikas konfiansa no responsabilidade bo’ot bá Governu ida-ne’e,” Xanana Gusmão hateten.

“Tinan seluk ita sei mai iha ne’e atu agradese. Agradese karik, ita halo buat di’ak ruma ho Maromak Nia tulun, husu deskulpa karik ita loko an tamba ita sai boot tiha ona, haluha tiha ita nia knar.”

Xefe Governu  ne’e husu Maroma Nia tulun no Nia grasa atu Governu bele hala’o nia nia knar ho diak, ho transparência, responsabilidade, rona bá malu no liu-liu ho domin bá rai no povu ida-ne’e.

Xanana hamulak hodi dehan konfiansa ne’ebé povu hili la’ós priviléjiu maibé ne’e hanesan konfiansa ida ne’ebé kada membru IX Governu Konstitusionál tenke lori ho responsabilidade no domin.

“Povu hili tiha ona ukun an, agora povu hili ita atu kaer ukun ho umildade, esforsu, ho korajen atu servi no defende povu nia interese. Iha uma-lulik be Maromak Nian ne’e, ita husu Maromak Nia bensaun bá ita hotu ne’ebé hakotu ona ita-nia komprimisiu atu servi. Servi diak bá! Maromak tulun ami bá, bei ala sira mós sei tulun ami, tulun atu ami halao didi’ak ami nia servisu, hodi fó onra bá sira nia sakrifísiu, Maromak tulun ami bá!,” Xanana Gusmão hamulak.

Advertisement

Partisipa iha selebrasaun misa agradesimentu bá tinan 24 loron konsulta popular ne’e, membru IX Governu Konstitusionál, Deputadu sira Parlamentu Nasionál, sarani sira no mós relijiozu sira. Hafoin misa agradesimentu iha igreja parokia Imakulada Conceição Balide, kontinua ho prosisaun no tau ai-funan iha Semiteriu Santa Kruz.

Jornalista: Vito Salvadór

Advertisement