Hatutan.com, (07 Setembru 2023), Díli—Vise-Ministru Finansas, Helder Lopes seidauk bele ko’alia buat ruma kona-bá nia nomeasaun bá Governadór Banku Sentral Timor-Leste (BCTL, sigla portugés).  

Vise-Ministru Finansas, Helder Lopes. Foto/Elio dos Santos da Costa

“Ha’u mós la hatene. Imi rona informasaun hosi se? ha’u foin rona ne’e hosi imi. Ha’u la hatene buat ida. Tenke hein lai dokumentu ofisiál,” Helder Lopes hateten hodi responde Hatutan.com liuhosi telefónika, Kinta (07/09/2023).

Informasaun ne’ebé Hatutan.com  asesu hosi fontes membru  Governu  balun ne’ebé husu atu labele publika nia identidade hateten katak iha tempu hirak nia laran mai ne’e, Helder Lopes tenke rezigna aan ka simu ezonerasaun hosi Primeiru-Ministru (PM), Xanana Gusmão hodi asume knaar foun nu’udár Governadór BCTL hodi troka Abrão de Vasconcelos.  

Helder Lopes simu pose nu’udár Vise-Ministru Finansas iha Governu da-9 ne’ebé lidera hosi Primeiru-Ministru (PM), Xanana Gusmão iha loron 01 fulan-Jullu 2023.  

Iha tinan 2015, Helder Lopes mós asume ona kargu Vise-Ministru Finansas iha Governu da-6. Helder Lopes  remata nia lisensiatura iha Universidade Nasionál Timor Lorosa’e (UNTL) iha Departamentu Ekonomia no Agrikultura iha tinan 2007 no iha 2010 remata nia estudu Mestradu iha Ekonomia no Agrikultura iha Michigan State University (MSU) iha Estadus Unidus Amérika (EUA).

Molok asume knaar hanesan Vise-Ministru iha 2015, Helder Lopes servisu hanesan Xefe Gabinete iha Ministériu Finansas no sai mós hanesan dosente iha UNTL, Dili Institute of Technology (DIT) ho Institute of Business (IOB) hodi hanorin matéria  ekonomia mikro ekonomia  no ekonomia makro, inklui analiza sira iha relasaun ho komérsiu internasionál no jestaun estratéjiku.

Jornalista: Cipriano Colo