Hatutan.com, (28 Setembru 2023), Díli-East Timor Trading group, maka grupu koorporativu ida ne’ebé hala’o atividade komérsiu iha Timor-Leste, hahú kedan 2002. Iha tinan-10 bá kotuk, grupu komérsiu ne’e kontribui ona taxa hamutuk millaun $55 bá reseita Estadu Timor-Leste.

PM Xanana tara tais bá Na’in East Timor Trading Group, Sakib Awan. Foto/Mídia GPM

Na’in bá East Timor Trading Group, Sakib Awan informa, nia hela iha Timor besik tinan-22 no nia empréza naran East Timor Trading Group, ne’ebé nia   kompostu hosi Burger King, Gloria Jean’s,  Cheers ne’ebé fa’an tua, uluk iha mós otel no  dadaun, emprega Timoroan 200.

“East Timor Trading mós empréza ida ne’ebé kontribui boot tebtebes bá taxa iha Timor-Leste, iha tinan-10 no  foin liubá, East Timor Trading kontribui millaun 55 bá reseitas Estadu,”  Sakib Awan,  hateten hafoin sorumutu ho Primeiru-Ministru, Kay Rala Xanana Gusmão iha Palásiu Governu, Díli, Kinta (28/09/2023).

Sakib Awan iha mehi ida no objetivu ida hosi hosi East Timor Trading, mak atu harii servisu ho porsentu ida (1%), ne’e signifika ninia empréza fó fatin servisu bá Timor-Leste hamutuk rihun 13.

“Bainhira, karik, ha’u fila-fali bá na’i Maromak, na’i Maromak sei husu, saida maka ita-boot halo iha Timor-Leste no ha’u hakarak dehan katak ha’u kontribui bá Timor-Leste nia dezenvolvimentu, ha’u kria oportunidade servisu  bá timoroan sira, ne’e maka objetivu atu bele harii kampu servisu rihun 13 iha Timor-Leste,” Sakib Awan hateten.

Buat ne’ebé durante ne’e, East Timor Trading kontribui ona bá Timor-Leste maka planu dezenvolvimentu nasionál, kontribui mós bá planu Governu nian, a-liña atividade sira ne’ebé empréza ne’e halo bá kestaun rua ne’e, bá planu dezenvolvimentu nasionál, ho mós Governu nia  planu rasik.

La’os ne’e de’it, iha mós área ne’ebé East Timor Trading sei investe atu bele kria emprégu, maka área sira hanesan manufaktureira, tuir prosesamentu mós, kona-bá agrikultura nian, no mós atu aumenta kapasidade ka esperiénsia servisu Timor oan nian,atu bele mós partisipa no kontribui iha área sira ne’e.

Hanoin Atu Hapara Produtu Importadu

Iha biban ne’e, Sakib Awan afirma, Timor-Leste iha oportunidade barak, sira hanoin katak, importante mós atu bele sasán sira ne’ebé importadu hosi liur, bele halo iha Timor-Leste para la presiza depende de’it hosi sasán ne’ebé importa hosi liur.

Ezemplu ida ne’ebé East Timor Trading iha dadaun maka projetu ne’ebé sira halo dadaun iha área Fomento II, iha ne’ebá, sira iha bloku ida, ne’ebé iha hektáre hitu (7) sei dezenvolve área ne’e iha faze tolu. Primeiru, sei investe millaun $12, iha segunfa faze sei investe millaun $32 no ikus liu, terseira faze, sei investe millaun $55 atu dezenvolve área ida ne’ebá.

“Ida ne’e, sei lori atu kompleta tinan-lima (5), ka to’o tinan-hitu (7), no hosi projetu ne’ebé ami sei halo iha Fomento II, ne’ebé naran Business Industrial Joint, ne’e sei lori tinan-lima to’o tinan-hitu, no hosi ne’ebá, sei kria empregu,” Sakib Awan hateten.

Jornalista: Rogério Pereira Cárceres