Hatutan.com, (28 Setembru 2023), Díli—IX Governu Konstitusionál esforsu hela atu rezolve problema kaderneta pasaporte ne’ebé VIII Governu husik hela, iha ne’ebé Ministru Justisa (MJ) Amándio Amandio de Sá Benevídes promete dala barak hodi fó garantia katak, iha fim fulan Setembru tinan ne’e sei rezolve, infelizmente ohin Primeiru Ministru (PM), Kay Rala Xanana Gusmão deklara katak, bá kestaun ne’e la fásil tanba kaderneta ne’e la’ós imprime iha rai laran.

Primeiru Ministru (PM), Kay Rala Xanana Gusmão.

“Pasaporte ne’e la’ós bu’at fásil, se fásil karik ita imprime de’it iha Silvia. Ministru Justisa ba tiha ona Finlándia no kompañia ida iha Singapura nian mak sei lori to’o mai iha Setembru, Outubru ne’e kal la’o ona, bu’at ne’e la’ós fásil,” Kay Rala Xanana Gusmão hateten iha Palásiu Prezidensiál Nicolau Lobato Bairru-Pité, Kinta (28/09).

Lee Mós: Fixu, Fim Setembru Kaderneta Pasaporte 16.000 To’o TL

Maski nune’e,  Xefe Governu promete katak, sei rezolve problema kaderneta pasaporte ne’ebé durante ne’e sai preokupasaun hotu-hotu nian, maski la’ós buat fásil.

“Karik buat ne’e fásil, ita bele iha ne’e lalais hela maibé horisehik mós ami ko’alia kona-bá ida-ne’e. Ne’ebé agora ne’e atu la’o,  buat hotu-hotu ita aprezenta. Ne’e mós tenke ho kuidadu tebe-tebes, tanba uluk há’u rona iha sidadaun Indonézia mós simu pasaporte Timor. Ema hosi Xina balun mós simu pasaporte Timor. Ne’e mai hosi ne’ebé ita la hatene, falsu karik ne’ebé ita tenke kuidadu didi’ak ba buat ida-ne’e,” Xanana Gusmão subliña.

Primeiru Ministru argumenta, la’ós dehan Ministériu Justisa la servisu maibé buat ne’e mak tenke tuir nia dalan ne’ebé fó seguransa loloos.

“Ohin mós ho Prezidente Repúblika ami ko’alia kona-bá prazu. Tanba tinan rua de’it maibé ita nia labarik sira servisu iha Korea, Irlándia, Austrália to’o tinan rua sira tenke fila fali mai Timor atu renova. Ne’ebé atu haree to’ok, se bele estende ninia prazu ne’e atu lalika ba mai,” nia hateten.

Iha diskursu pose bá membru IX Governu Konstitusionál, Kay Rala Xanana Gusmão hateten katak, Governu sei halo ezersísiu ba orsamentu retifikativu maka mantein ho orsamentu orijinál iha Orsamentu Jerál Estadu (OJE) 2023 ho nia montante billaun $2.1, ne’ebé sei utiliza hodi rezolve problema ai-moruk, pasaporte inklui vítima dezastre naturál durante loron 120.

Iha loron 04 fulan Jullu tinan ne’e, Ministru Justisa (MJ), Amandio de Sá Benevídes  promete mós katak, karik iha ona garantia maka iha loron 120, kaderneta pasaporte bele to’o ona Timor.

Iha Tersa 15 Agostu 2023, Ministru Justisa, Amândio de Sá Benevides informa mós bá Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, katak,  
Prosesu akizasaun ba kaderneta pasaporte remata ona, no kompañia manán-na’in iha Finlándia halo hela imprime no iha ona serteza katak, fulan Setembru nia rohan 16.000 kaderneta to’o Timor-Leste.

Maski nune’e, ohin tama ona ba loron 28 fulan Setembru, maibé seidauk iha informasaun ka novidade ruma kona-bá promesa ne’e.

Lee Mós: Loron 120 Rezolve Kadernéta Pasaporte Timor-Leste

Jornalista: Vito Salvadór