Hatutan.com (29 Setembru 2023), Díli— Polísia Nasionál Timor Leste (PNTL), liu hosi ekipa konjunta kompostu hosi Servisu Investigasaun Kriminál Nasionál (SIKN), Servisu Informasaun Polísia Nasionál (SIPN) Aranha Oeste, Forsa Polísia (FP), junta ho Servisu Nasionál Intelijensia(SNI), halo vizilánsia durante loron 3 no konsege asegura joven na’in-9 ne’ebé komete krime furtu argavadu hodi na’ok motór iha kapitál Díli.

Polísia Nasionál Timor Leste (PNTL), halo vizilánsia durante loron 3 no konsege asegura joven na’in-9 ne’ebé komete krime furtu argavadu hodi na’ok motór iha kapitál Díli. Foto: PNTL.

Durante halo survelénsia, ekipa asegura uluk suspeitu na’in-4 iha área Tasi-tolu, na’in-4 seluk iha área Caicoli no ikusliu kaptura na’in-1 iha área Bebora.

Lee Mós: Perturba Órden Públika Tenke Kaer Hatama bá Kadeia

Ekipa mós rekolla evidénsia motór beat kor metan rua laiha xapa matríkula, inklui telemóvel tolu ho marka I-phone, Samsung no Oppo hosi suspeitu sira.

“Iha prosesu identifikasaun suspeitu sira deklara motorizada hirak ne’e foti iha fatin sira iha Dili laran hanesan Taibessi, Tasi-tolu no balun hosi Munisípiu Covalima. Sira mós deklara katak, evidénsia balun sira fa’an ona ba ema seluk ne’ebé sira rasik la koñese ho presu ne’ebé barratu tebes,” Hatutan.com sita komunikadu.

Suspeitu na’in-9 ne’e ho inisiál RDP alias (RB), AJDS alias AD, RML, AMA, RDS, JSS, ACF, LCA no LDP. Antes ne’e, suspeitu hirak ne’e komete ona kazu hanesan hadau telefone iha dalan públiku, ataka membru seguransa, sobu loja no na’ok telefone iha kalan bainhira ema hotu deskansa.

Xefe SIP Nasionál orienta ona ekipa konjunta dezenvolve kazu no fahe ekipa halo vizilánsia totál hodi rekolla tán evidénsia seluk inklui sindikatu sira ne’ebé involve iha kazu refere.

Oras-ne’e daudaun evidénsia sira ne’e iha ona PNTL nia liman, nune’e husu ba komunidade ne’ebé durante ne’e motór no telefone lakon bele mai direta iha edifísiu SIKN iha Kuartél Jerál PNTL Caicoli Díli, lori ho dokumentu komprovativu hodi halo konfirmasaun.

Jornalista: Rogério Pereira Cárceres