Hatutan.com, (05 Outubru 2023), Díli—IX Governu Konstitusionál liu hosi Ministru Obras Publika (MOP), Samuel Marçal hala’o hela investigasaun bá projetu barak iha Díli laran ne’ebé paradu hela.

Ministru Obras Públika, Samuel Marçal. Foto/Elio dos Santos da Costa.

Ministru Obras Públika, Samuel Marçal dehan, dau-daun ne’e iha hela faze investigasaun bá problema saida mak akontese iha progressu konstrusaun bá projetu hirak ne’e, hodi buka solusaun.

Lee Mós: Projetu Dada Eletrisidade iha Manufahi ho Kustu $446,000 Paradu

“Iha problema oin-oin de’it. Solusaun mak tenke tun ba detekta tanba problema ne’e la hanesan. Ida-idak ho nia problema, balun ita bele rezolve  lais, balun he’in oitoan no balun tenki Konsellu Ministru mak deside. Ita buka nafatin atu rezolve problema sira ne’e tuir Lei,” Samuel Marçal hateten bá Hatutan.com hafoin hala’o limpeza bá valeta iha aldeia 05, Suku Fatuhada, Kinta (05/10/2023).

Tuir dadus, durante ne’e Ministru Samuel Marçal identifika ona projetu barak kompostu hosi projetu jardim, balun valeta,  balun estrada, drainazen no seluk tán.

Kuadru, projetu kontrusaun no instalaun jardim iha Timor Lodge. Foto: Leopoldina de Carvalho.

Kona-bá projetu konstrusaun jardim iha Timor Lodge nia oin área Comoro ne’ebé seidauk remata, Ministru ne’e mós rekoñese katak, nia mós rona nia problema, no promete sei buka hela dadus,  tanba sa mak problema.

“Maibé ita tenke buka bá rezolve, ko’alia ho komunidade iha ne’ebá, haree problema ne’e saida de’it atu ita rezolve,” Samuel Marçal hateten.

Iha sorin seluk, enjeñeiru hosi projetu kontrusaun no instalaun jardim iha Timor Lodge, Tomas Viegas haktuir problema Jardim Timor Lodge ne’ebé ho nia montante osan kontratu $269,929.38 ho tempu kontratu durasaun tinan ida, maibé seidauk remata tanba enfrenta problema oioin.

“Iha failansu ida rua kona bá fiu. Kona-bá uma ida agora sobu dau-daun parte Lorosae nian ne’ebá seidauk sai. Problema mak komunidade hirak ne’e hakarak indeminizasaun maibé osan projetu ne’e kona-ba indeminizasaun ne’e laiha. Projetu ne’e mós foin tau osan sorin kuaze 100.000-resin,” Site Enginer bá Projetu Jardim Timor Lodge, Tomas Viegas hateten ba Hatutan.com iha lokál projetu.

Tuir Enjeñeiru sira katak, problema hirak ne’e difikulta tebes sira nia servisu tanba labele konklui sira nia projetu tuir tempu kontratu ho Governu.

“Tanba ita atu halo servisu la di’ak maibé ami mós tenta ezekuta tuir fatin ne’ebé iha terrenu depois mak ita tenta ba sorin. kIha karta hira mak owner ho Xefe suku tenta fó ona ba komunidade sira maibé laiha reasaun ruma kona-bá sira atu sai,” Tomas Viegas hateten.

Kuadru, projetu konstrusaun jardim toleránsia Kampung Alor. Foto: Leopoldina de Carvalho.

Kona-bá Projetu konstrusaun jardim toleránsia Kampung Alor mós enfrenta problema hanesan, tanba ne’e mak to’o oras ne’e seidauk remata.

Site Enginer, Febriano dos Santos haktuir, projetu ne’e ho montante $268, 890,38 ho durasaun tempu kontratu fulan haat, maibé seidauk bele konklui tuir nia tarjetu tanba hasoru dezafiu oin-oin.

“Iha failansu oitoan, mosu dezentendimentu oitoan ho komunidade sira, depois klima ne’ebé halo nia la’o tarde tebes,” nia hateten ba Hatutan.com iha lokál projetu, Kinta (05/10/2023).

Nia dehan, tuir loloos antes hahú projetu ne’e, komunidade sira nia ai oan mós iha no presiza rezolve tiha mak foin bele halo servisu tanba ne’e maka estende fali to’o agora no sasan sira hameno hosi rai liur mós seidauk to’o mai maski kompañia gasta ona kuaze $140.000-resin.

Jornalista: Leopoldina de Carvalho