Hatutan.com (18 Outubru 2023), Díli- Iha loron 24 fulan-Juñu 2022, Komisaun Anti Korrupsaun (CAC, sigla portugés) submete ona relatóriu investigasaun final bá Ministériu Públiku (MP) kona-bá kazu  projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P) ne’ebé CAC mós deskobre katak iha indísiu fó prejuizu bá Estadu.

Lee Mós: Notísia Investigativu Kazu Set-top Box RTTL,E.P Lori Hatutan.com Manan Prémiu Francisco Borja da Costa no Manan Mós Prémiu Bernardino Guterres

Konteúdu hosi relatóriu ne’e, CAC konsege identifika arguido sira, inklui prejuízu indireta no direta bá Estadu ho valor  liu $60,000.00.

Prokuradór Jerál Repúblika (PGR-Sigla Português), Alfonso Lopez. Foto/Dok

Tinan ida liu ona (fulan-Juñu 2022-2023) kazu ne’e pendente hela iha Ministériu Públiku tanba ne’e deskonfia Prokuradór Jerál Repúblika  (PGR, sigla portugés), Alfonso Lopez “budu” prosesu kazu ne’e to’o agora la iha informasaun no laiha transparente bá públiku kona-bá kazu ne’ebé envolve arguido eis-Ministru Asuntu Parlamentár no Komunikasaun Sosiál (MAPKOMS), Francisco  Martins da Costa Pereira Jerónimo.

Bazeia bá rezultadu provas dokumental no sasin hamutuk na’in-17, CAC konsege identifika arguido na’in-haat (4) ne’ebé involve iha krime abuzu bá podér, partisipasaun ekonomia iha negósiu, konflitu  interese no burla agravada relasiona ho projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P).

 Bá prosesu krime ne’e, Hatutan.com   halo konfirmasaun ho PGR Alfonso Lopez, Kuarta (18/10/2023), iha ámbitu konferensia internasionál kona-ba “Promove Labarik Sira-Nia Moris-Di’ak no Dezenvolvimentu Optimu iha Timor-Leste”  iha Timor Plaza, maibé PGR Alfonso Lopes nu’udár mós Prezidente Konsellu Superiór Ministériu Públiku rejeita fó komentáriu tanba nia hakarak foku deit bá atividade konferensia internasionál kona-ba “Promove Labarik sira-nia Moris-di’ak no Dezenvolvimentu Optimu iha Timor-Leste”.

“Imi husu maka asuntu atividade ne’e, deskulpa. Mindset ne’e agora hanoin de’it bá iha atividade ne’e,” PGR Alfonso Lopes hatán pergunta jornalista Hatutan.com ne’ebé husu prosesu kazu projetu instalasaun Set-top Box RTTL,E.P ne’e to’o iha ne’ebé ona.

Informasaun husi CAC katak averiguasaun bá kazu projetu instalasaun Set-top Box RTTL,E.P konklui ona, nunee enkamiña ona ba Ministériu Públiku, maibé to’o ohin loron seidauk iha rezultadu lori  bá iha Tribunál.

Bá kazu projetu instalasaun Set-top Box RTTL,E.P ne’e, CAC konsege identifika prejuizu direta bá Estadu ho montante $7,680.00 ne’ebé identifikadu liuhosi Set Top Box hamutuk 256 ne’ebé kompañia indikadu DILI ETERNAL INNOVATION INFORMATION, Lda, seidauk halo instalasaun, maibé prejuizu ne’e sei aumenta makas bainhira kontinua halo inspesaun no kontinuasaun bá benefisiáriu hirak ne’ebé simu ona STB iha suku besik atus ida resin iha munisípiu lima, hanesan Díli, Aileu, Ermera, Liquiça no Bobonaro, tanba STB barak maka seidauk halo instalasaun no benefisiáriu rasik maka halo instalasaun la’ós kompañia no prejuizu indireta seluk ne’ebé Estadu sofre hamutuk $674,581.7 no prejuizu ida-ne’e hetan bainhira halo komparasaun entre estimasaun kustu bá instalasaun STB ne’ebé halo hosi RTTL.EP ho valor $225.400 ho valor kontratu bá projetu ne’ebé maka asina husi eis-Ministru MAPKOMS no kompañia DILI ETERNAL INNOVATION INFORMATION (DEII) Lda ho valor $899.981.70.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia eis Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda, nu’udár sósiu hosi Melánia da Silva Fernandes Capela, ne’ebé tempu ne’ebá asume knaar Sekretaria iha Gabinete Prezidente FFTL.

Lee Mós: Hafoin Ferias Judisiáriu PGR Sei Ko’alia Kazu Set-top Box RTTL,E.P

Bazeia bá prova investigasaun bá kazu projetu instalasaun  Set-Top box Rádiu Televizaun Timor Leste, Empreza Públika (RTTL,E.P), Komisaun Anti Korrupsaun (CAC, sigla portugés) konstitui ona eis Ministru Asuntu Parlamentár no Komunikasaun Sosiál (MAPKOMS), Francisco  Martins da Costa Pereira Jerónimo, hosi suspeitu bá arguido.

CAC konstitui eis-Ministru Francisco  Martins da Costa Pereira Jerónimo  nu’udár arguido tuir baze legal ka Kódigu Prosesu Penál (KPP) artigu Artigu 91 (Notifikasaun), alínea 3  ne’ebé hateten, funsionáriu judisiál, ajente polisiál  ka autoridade seluk ne’ebé lei fó kompeténsia maka halo notifikasaun tuir despaxu ka ho orden ofisioza hosi sekretaria judisiál. 

Lee Mós: HAK Sujere Ba PDHJ Atu Ajuda MP Aselera Kazu Set-top Box RTTL,E.P

Jornalista: Gloria Maia