Hatutan.com, (27 Outubru 2023), Bobonaro—Primeiru-Ministru (PM), Xanana Gusmão hasai ona despaxu númeru 10/PM/X/2023 kona-bá tolerância de ponto bá  loron tomak iha loron 27 fulan-Outubru 2023.

Lee Mós: Mákina X-Ray iha Batugade ho Salele Funsiona ho Di’ak

Abitante sira nadodon iha Postu Integradu Batugade hodi halo viajen bá Kupaun-Indonézia, Sesta (27/10/2023). Foto/Lazaro Pereira Quefi

Intensaun hosi tolerância do ponto ne’e atu fasilita funsionáriu públiku no ajente administrasaun públiku sira ne’ebé haknaar an iha instituisaun Estadu atu bele halo movimentu bá ida-idak nia suku hodi partisipa iha eleisaun suku ne’ebé atu hala’o iha loron 28 fulan-Outubru 2023.

Aproveita desizaun Governu nian ne’e, timoroan ho idade tinan 17 bá leten ne’ebé nia kartaun eleitorál pertense bá suku sira la’ós iha sidade Díli halo ona movimentu bá munisípiu no suku ida-idak atu bele ejerse sira-nia direitu votu iha eleisaun suku, tinan ne’e.

Tuir observasaun Hatutan.com nian iha estasionamentu bus sira iha Becora no Tasi-Tolu, inklui iha Delta nian, abitante sira barak hadau-malu bus atu halo viajen bá sira-nia munisípiu.

Iha mós abitante balun ne’ebé utiliza rasik sira-nia transporte privadu hanesan karreta ho motór halo viajen sai hosi sidade kapitál Timor-Leste hodi bá sira ida-idak nia munisípiu ka ida-idak nia suku atu vota iha eleisaun suku iha loron 28 fulan-Outubru 2023.

Abitante balun mós aproveita tolêrancia de ponto ne’e halo viajen estranjeiru liuhosi aeroportu internasionál Prezidente Nicolau Lobato no balun liuhosi postu fronteira terrestre Batugade, Postu Administrativu Balibo, Munisípiu Bobonaro.

Tuir observasaun Hatutan.com nian iha postu integradu fronteira Batugade, Sesta (27/10/2023), hatudu katak timoroan, inklui mós sidadaun estranjeiru ka sidadaun Indonézia (WNI, sigla Indonézia) liu na’in-600 mak forma nadodon iha fatin Migrasaun Postu Integradu Batugade nian hodi halo pasajen sai hosi área jurizdisaun Timor-Leste hodi liubá Timor Osidentál ka Provínsia Kupaun, Indonézia.

Abitante sira nadodon iha Postu Integradu Batugade atu halo viajen bá Kupaun-Indonézia, Sesta (27/10/2023). Foto/Lazaro Pereira Quefi

Hatutan.com tenta halo entrevista ka dada-lia ho abitante balun hodi husu kona-bá tansá la partisipa iha eleisaun xefe suku ne’ebé sei hala’o iha territóriu Timor laran tomak  iha loron 28 fulan-Outubru 2023, maibé sira dezvia no lakohi fó komentáriu.

Hosi timoroan na’in-lima  ne’ebé Hatutan.com hakbesik dada-lia ho sira, maibé sira doko-ulun de’it ho hamnasa hodi lakohi ko’alia buat ruma ka lakohi hatán pergunta ruma.  

Hosi komunikasaun ho fontes Servisu Migrasaun iha Postu Integradu Batugade, Postu Administrativu Balibo, Munisípiu Bobonaro, ne’ebé husu atu labele publika nia identidade haktuir katak deskonfia abitante timoroan hirak ne’ebé halo viajen bá Kupaun maioria funsionáriu públiku no ajente administrasaun públiku.

“Ha’u hanoin sira aproveita tolerância de ponto iha Sesta ohin hodi halo viajen, pasa ferias ka vizita família, tanba abitante timoroan hirak ne’e maioria mai hodi Díli atu bá Kupaun,” fontes Migrasaun ne’e haktuir.  

Fontes ne’e husu bá autoridade kompetente sira, liuliu Governu atu halo Lei ka Dekretu-Governu nian atu bele regula Timoroan sira, liuliu funsionáriu públiku ho ajente administrasaun públiku labele halo viajen sai hosi territóriu Timor-Leste iha lorin ida antes eleisaun jerál, eleisaun prezidensiál, inklui eleisaun suku.

“Ami labele atua ka impede ema ruma nia viajen, maske sira aproveita tempu tolerâcia do ponto halo viajen iha loron ida molok eleisaun suku. Ami presiza baze legal ruma atu bele atua tuir Lei. Mas, bá ida-ne’e ami sira servisu iha Migrasaun la bele impede tanba la vinkulativu iha Lei,” fontes Migrasaun ne’e hateten.

Jornalista: Lazaro Pereira Quefi