Hatutan.com, (06 Novembru 2023), Díli- Prezidente Repúblika (PR), José Ramos-Horta, hato’o agradesimentu bá povu Brunei Darussalam no liurai Hassanal Bolkiah ibni Omar Ali Saifudden III bá apoiu bilaterál ne’ebé estabelese ho Timor-Leste desde 2002.

Lee Mós: Brunei Darussalam Sei Simu Traballadór Timoroan

PR Ramos-Horta hasoru malu ho Liurai Hassanal Bolkiah ibni Omar Ali Saifudden III iha Brunei Darussalam, Segunda (06/11/2023). Foto/Média GPR

Prezidente Repúblika José Ramos-Horta hato’o deklarasaun agradesimentu ne’e bainhira hasoru malu ho Liurai boot Brunei Darussalam Majestade Hassanal Bolkiah ibni Omar Ali Saifudden III iha Palásiu Nurul Iman,  Brunei Darussalam, Segunda (06/11/2023).

“Iha okaziaun ha’u nia vizita Estadu bá dahuluk mai iha Brunei Darussalam, hakarak agradese no hato’o obrigadu ua’in bá Majestade Hassanal Bolkiah ibni Omar Ali Saifudden III bá solidariedade no apoiu ne’ebé metin hosi tempu bá tempu, desde Timor-Leste restaura independénsia iha tinan 2002 liubá. Apoiu ne’ebé konsistente ho jenerosidade iha prosesu Timor-Leste harii nia nasaun no integrasaun rejionál ba membru ASEAN,” Ramos-Horta hateten liuhosi komunikadu imprensa ne’ebé Hatutan.com asesu hosi Gabinete Média Palásiu Prezidensiál.

“Hakarak agradese bá sua Majestade Hassanal Bolkiah ibni Omar Ali Saifudden III ne’ebé simu ha’u ho delegasaun ho di’ak nakonu ho amizade,” Ramos-Horta tenik.

Iha tempu ne’ebé nakonu ho dezafiu no obstákulu, Brunei Darussalam hamriik hanesan fatin bá dame no fraternidade. Nune’e, Ramos-Horta louva ho Majestade nia lideransa ne’ebé prudente no nakonu ho laran luak durante tinan sira ikus ne’e hodi lider no kuidadu nasaun ne’e hanesan hela fatin ne’ebé armonia no prósperu bá povu iha nasaun ne’e.

“Mesmu ita iha nivel dezenvolvimentu ne’ebé lahanesan, Brunei Darussalam no Timor-Leste sai hanesan nasaun ki’ik liu iha família ASEAN nian, ne’ebé iha obstákulu no oportunidade hanesan. Tamba ne’e, vizita ida ne’e fó oportunidade ne’ebé ideal bá ita atu troka hanoin kona-ba ita-nia relasaun bilaterál sira, asuntu rejionál no globál sira no atu esplora dalan sira atu hametin liután no lori ita-nia relasaun bá nivel aas, liu husi Akordu Estratéjiku Parseria Kompriensivu ida bá médiu no longu prazu,” Prezidente Repúblika José Ramos-Horta  afirma.

Ramos-Horta hein atu troka vizaun no fahe esperiénsia kona-bá maneira di’ak liu atu la’o bá oin iha tempu turbulente ida ne’e.

Ramos-Horta aproveita oportunidade ne’e hodi hato’o obrigadu ua’in ba Embaixadór Brunei Darussalam bá Timor-Leste, Wan Hadfi Latif bá esforsu ne’ebé haka’as an atu habelar no hametin liután a relasaun bilaterál no amizade espesiál sira.

“Ha’u hein katak Maromak ne’ebé kbiit boot liu hotu no Maromak ne’ebé laran-sadi’a liu sei kontinua fó ninia bensan ho matenek ne’ebé boot bá ita no povu Brunei Darussalam,” Ramos-Horta hateten.

Jornalista: Vito Salvadór