Hatutan.com, (08 Novembru 2023), Díli—Governu liu hosi reuniaun Konsellu Ministru (KM) iha loron 08 Novembru 2023, seidauk iha desizaun finál atu taka Grupu Arte Marsiais (GAM) no Grupu Arte Rituais (GAR), tanbá sei halo elaborasaun dadus relasiona ho perturbasaun órden públiku.

Reuniaun Konsellu Ministru, Kuarta (08/11/2023). Foto: Elio dos Santos da Costa.

Vise-Ministru Assuntu Parlamentár, Adérito Hugo da Costa hateten, Konsellu Ministru ne’e maski normál, maibé  hó karákter extraordináriu tanba liga ho akontesimentu esporádiku liuliu ho perturbasaun órden públiku, la’ós de’it iha Lourba, maibé iha Dili, Watukarbau inklui Bacau.

Lee Mós: Sosiedade Sivíl Sujere Governu Investiga Abut Problema Molok Taka GAM-GAR

Governu konsidera assuntu ne’e esporádiku teb-tebes nune’e Konsellu Minsitru involve mós parte  Komandu Jerál Polísia Nasionál Timor-Leste ho Servisu Nasionál Intelizensia atu kollabora no rekolla dadus hotu hafoin Konsellu Ministru sei haree atu prodús efeitu desizaun ruma iha tempu badak.

Reuniaun Konsellu Ministru, Kuarta (08/11/2023). Foto: Elio dos Santos da Costa.

“Tanba ne’e seidauk iha desizaun finál atu taka arte marsiais no arte rituais. Agora sei elabora hela dadus tanba akontesimentu ne’e esporádiku no halo povu hakfodak tanba ninia nível ne’e grave tebes bá Estadu, ba povu nune’e povu barak mak espressa lamentasaun bá aktu sira ne’e. Entaun, ne’e la’ós assuntu fásíl tebes atu tuur de’it iha oras ida-rua bele rezolve,” Adérito Hugo hateten hafoin enkontru KM, iha Palásiu Governu, Kuarta (08/11/2023).

Governu toma responsabilidade oinsá atu haree no toma medida ida ne’ebé mais korretu no efetivu liu, nune’e bele hapara ona aktu violénsia ne’ebé perturba órden públiku no perturba politika atu dezenvolve país ne’e rasik.

Reuniaun Konsellu Ministru, Kuarta (08/11/2023). Foto: Elio dos Santos da Costa.

“Orientasaun Primeiru Ministru nian maka involve entidades sira liga ho defeza seguransa nian, rekolla informasaun. Tanba ne’e ami orienta ona entidades hotu atu rekolla dadus no faktus sira liga ho perturbasaun orden públiku ne’ebé komete husi Grupu no individu sira, hafoin ita halo analiza didi’ak foti desizaun ho korreta,” nia hateten.

Iha tempu badak desizaun sei sai, Konsellu Minsitru analiza ho kuidadu teb-tebes situasaun ida-ne’e, atu foti desizaun tanba nia konsidera kazu ida ne’e la’ós foin primeira vez, jestaun Estadu atravez Governu anteriór hosi tinan 2009 mai 2016-2017 bá alterasaun Lei Arte Marsiais nian, kriasaun KRAM ho inisiativa Governu anteriór reativa, buat sira ne’e hotu mós subsidiu apoiu hosi jestu Governu nian liu bá, laiha rezultadu ne’ebé di’ak.

Jornalista: Gloria Maia/Vito Salvadór