Hatutan.com, (27 Novembru 2023), Díli—Prezidente Repúblika (PR), José Ramos-Horta kondekora professór na’in-86 ne’ebé fó sira nia kontribuisaun, dedikasaun, pasiénsia no domin hodi eduka jerasaun timoroan no dezempeña ona sira nia servisu durante períudu tolu, hahú hosi tempu Portugés, tempu Indónezia no tempu ukun rasik-an.

Prezidente Repúblika (PR), José Ramos-Horta kondekora professór na’in-86 iha Palásiu Prezidensiál Nicolau Lobato Bairru-Pité, Segunda (27/11/2023). Foto: Elio dos Santos da Costa.

Manorin-na’in 86 ne’e kompostu hosi profesora na’in 52 no professór na’in-34, ho kategoria Grau Medalla professór no professora na’in-35, kategoria Grau Medalla Insigna professór no professora na’in 41, no kategoria Medalla Méritu professora na’in-10.

Lee Mós: Kondekorasaun bá Veteranu no Estranjeiru Iha Manatuto, Governadór NTT Konsidera Hanesan Prémiu

Prezidente Repúblika konsidera professór sira importante loos tanba sira  tau-matan bá Jardín infantíl, Pré-primária, primária, lisliska Sekundáriu no Universidade.

Desde 2010 Ramos-Horta ko’alia ona kona-bá kondekorasaun bá professór sira, iha momentu ne’ebá halo tiha ona kondekorasaun bá professór balun, hanesan halo bá enfermeiru, médiku no motorista ambulánsia.

“Laiha osan subsídiu bá professór sira, maibé iha Finlándia ema maioria respeita liu mak professór sira. Ne’e hatudu valor étika sosiedade nian,” Xefe Estadu Ramos-Horta hateten iha diskursu serimónia kondekorasaun ne’ebé hala’o iha Palásiu Prezidensiál Nicolau Lobato Bairru-Pité, Segunda (27/11/2023).

Kondekorasaun ne’e ekontese tanba Ministériu Edukasaun (ME) mak halo lista identifikasaun, balun hanorin tinan 50, balun hanorin besik tinan 60 ona, maibé laiha ema ida mak rekoñese sira, no ne’e hatudu mizeria iha sosiedade ne’ebé la hatene rekoñese professór sira.

Xefe Estadu haktuir kona-bá esforsu professora timoroan sira ne’ebé dala ruma tenke la’o ho distánsia ne’ebé dook no presiza oras tolu to’o lima atu to’o iha fatin hodi hanorin estudante sira.

Iha professór sira barak ne’ebé husu atu Prezidénsia Repúblika halo hela eskola iha fatin ne’ebé sira hanorin tanba kondisaun grave no Prezidénsia halo liu hosi fundus ne’ebé iha.

Xefe Estadu preokupa laiha tanba Governu ida mak deklara katak, edukasaun, saúde no agrikultura, mak prioridade númeru um iha país ne’e. Buat hotu-hotu importante maibé tenke tau prioridade ba iha seitór tolu ne’e.

Xefe Estadu nota katak, professór sira nia moris difísil loos, kondisaun, vensimentu, alimentasaun, saúde no buat seluk tán hotu-hotu difísil loos, tanba ne’e ba oin sei haree atu tau prioridade hodi dignifika no valoriza sira nia servisu ne’ebé nakonu ho domin no dedikasaun.

Iha fatin hanesan, Ministra Edukasaun, Dulce de Jesus hateten, iha ámbitu komemorasaun loron manorin nian, ne’ebé monu iha loron 5 fulan Outubru tinan ne’e, Ministériu Edukasaun hakarak rekoñese, konsidera hodi fó kondekorasaun ba manorin na’in sira nia dedikasaun, kontribuisaun, pasiénsia no domin hodi eduka jerasaun timoroan atus ba atus ha Timor-Leste laran tomak.

Iha faze dahuluk ba tinan ida-ne’e, kondekorasaun sei fó atensaun liu ba manorin na’in sira ne’ebé dezempeñia ona sira nia servisu durante periodu tolu (3), Periodu tempu Portugés, tempu Indónézia no tempu ukun rasik-an.

“Ministériu Edukasaun servisu hamutuk ho Diretór Edukasaun munisípiu sira, nomós entidade sira seluk buka tuir informasaun hodi verifika istória, esperiénsia servisu no informasaun sira seluk ne’ebé iha relevánsia ho manorin nain  sira,” Dulce de Jesus hateten.

Ministériu Edukasaun mós, identifika Manorin na’in ne’ebé dedika-an extraordinária iha área remota iha kondisaun laiha transporte, laiha saláriu, aihan, matéria eskolár sira seluk hodi apoia, maibé manorin nain sira ne’e ho vontade, dedikasaun no paixaun tomak hari sala eskola rasik no hanorin labarik sira la sura tempu no klima. Agora daudaun Ministériu foin identifika naran na’in rua, husi postu Maubise no Postu Laga.

Iha loron 27 Novembru 2023, iha Palásiu Presidente Nicolau Lobato, Dili Prezidente Repúblika, José Ramos-Horta kondekora professór no profesora antigu sira ne’ebé barak servisu liu ona tinan 50 no balun liu tinan 60, Ministériu Edukasaun konsiente katak sei iha Professór antigu barak ne’ebé karik seidauk simu kondekorasaun no sei iha professór barak ne’ebé merese simu kondekorasaun tanba sira-nia prestasaun servisu extraordináriu iha área remotas.

Tanba ne’e, Ministériu Edukasaun sei kontinua esforsu atu rekolla dadus  professór antigu-sira ne’ebé seidauk simu kondekorasaun iha tinan ne’e.

Ministeriu Edukasaun nia esperansa katak tinan oin  sei inklui mós kategoria sira-ne’ebé rigorozu liután, hanesan manorin sira-ne’ebé exelente iha prosesu aprendizazen, deskobre sientifika ho dedikasaun espesífiku ruma.

“Agradese, hakru’uk ho onra ba mestre sira ne’ebe iha sira nia luta diária, kontinua fo motivasaun ba alunus sira, la sura oras, la sura kolen, sem husu rekompensa atu ezerse sira-nia profisionalizmu ho forma ne’ebé diak liu, hodi kontribui iha área edukasaun hodi tulun Estadu konstrui rai doben Timor-Lesten” nia hateten.

Iha fatin hanesan,Professór Urbano de Freitas Gaio, hosi EBC Númeru 1 Tirilolo Baucau, sente kontente tanba falta fulan sanolu-tán kompleta tinan 50 sai hanesan manorin na’in, desde tinan 1974 to’o ohin loron.

“Ha’u kontente tanba Estadu iha vontade atu rekoñese ami nu’udár professór ne’ebé serbí nasaun Timor Leste. Foin primeiravez simu kondekorasaun kona-bá edukasaun nian,” nia agredese.

Jornalista : Vito Salvadór